ក្រុមមេដឹកនាំសហជីពនិងអ្នកនយោបាយប្រារព្ធខួប១៨ឆ្នាំនៃឃាតកម្មលើលោក ជា វិជ្ជា ប្រធានសហជីពសេរីកម្មករនៃព្រះរាជាណាចក្រកម្ពុជា។
ការប្រារព្ធពិធីនេះ បានប្រព្រឹត្តទៅនៅមុខរូបសំណាករបស់លោក ជា វិជ្ជា លើសួនច្បារច្រមុះជ្រូកវិមានឯករាជ្យ ខាងជើងវត្តលង្កា រាជធានីភ្នំពេញ។
នៅក្នុងពិធីនេះ គេឃើញមានការចូលរួម និងដាក់កម្រងផ្កាមេដឹកនាំសហជីពធំៗ សកម្មជនសង្គម និងអ្នកនយោបាយ ដូចជា លោក រ៉ុង ឈុន លោក អាត់ ធន់ លោក ជា មុនី ប្អូនប្រុសបង្កើតរបស់លោក ជា វិជ្ជា កញ្ញា សេង ធារី និងអ្នកនយោបាយលោក ថាច់ សេដ្ឋា ជាដើម។ ក្រុមអ្នកចូលរួមបានឡើងថ្លែងការណ៍ម្តងម្នាក់ៗ ជុំវិញអនុស្សាវរីយ៍របស់ពួកគេ មានចំពោះលោក ជា វិជ្ជា និងវីរភាពរបស់លោក ជា វិជ្ជា ក្នុងការតស៊ូដើម្បីសិទ្ធិសេរីភាពរបស់កម្មករនៅក្នុងប្រទេសកម្ពុជានាពេលកន្លងមក។
គួររម្លឹកជូនថា លោក ជា វិជ្ជា ប្រធានសហជីពសេរីកម្មករនៃព្រះរាជាណាចក្រកម្ពុជា ត្រូវបានឃាតករបាញ់សម្លាប់ កាលពីព្រឹកថ្ងៃទី២២ ខែមករា ឆ្នាំ២០០៤ នៅតូបលក់កាសែតក្រោយវត្តលង្កា រាជធានីភ្នំពេញ។ រយៈពេល១៨ឆ្នាំមកនេះ អាជ្ញាធរនៅមិនទាន់បាននាំខ្លួនឃាតករពិតប្រាកដ និងអ្នកបញ្ជានៅពីក្រោយខ្នងយកមកផ្តន្ទាទោសនោះទេ ក្រៅតែពីឃាតករសិប្បនិម្មិតពីររូប គឺ ប៊ន សំណាង និង សុខ សំអឿន។
មជ្ឈមណ្ឌលសិទ្ធិមនុស្សកម្ពុជា (CCHR) បានសរសេរនៅលើទំព័រហ្វេសប៊ុកដោយភ្ជាប់នូវរូបថតរបស់លោក ជា វិជ្ជាថា នៅថ្ងៃទី២២ ខែមករា ឆ្នាំ២០២២ យើងចងចាំពីការស្លាប់របស់លោក ជា វិជ្ជា មេដឹកនាំសហជីពដ៏ល្បីឈ្មោះ ដែលត្រូវបានបាញ់សម្លាប់ទាំងកណ្ដាលថ្ងៃត្រង់ នៅទីក្រុងភ្នំពេញ កាលពីឆ្នាំ២០០៤។ រយៈពេល ១៨ឆ្នាំ ក្រោយមក ពុំទាន់មានជនណាត្រូវបានចាប់ខ្លួនដើម្បីទទួលខុសត្រូវចំពោះការស្លាប់របស់លោកនៅឡើយទេ៕