ក្រសួងសុខាភិបាលបានប្រកាសរកឃើញជំងឺកូវីដ-១៩ ប្រភេទបំប្លែងខ្លួនថ្មី «អូមីក្រុង» បានឆ្លងចូលក្នុងសហគមន៍សរុបមានចំនួនកើនឡើងជាង២០០ករណីហើយ បន្ទាប់ពីរកឃើញករណីឆ្លងជំងឺប្រភេទថ្មីនេះមានចំនួន៤០ករណីបន្ថែមទៀតកាលពីម្សិលមិញ។
សេចក្ដីប្រកាសព័ត៌មានរបស់ក្រសួងសុខាភិបាល នៅថ្ងៃទី២៤ ខែមករា ឆ្នាំ២០២២ បានឱ្យដឹងថា អ្នកជំងឺកូវីដ-១៩ ប្រភេទបំប្លែងខ្លួន «អូមីក្រុង» ដែលរកឃើញឆ្លងថ្មីកាលពីម្សិលមិញមានចំនួន ៤០នាក់។ អ្នកជំងឺទាំងនោះ មាន២៥ករណីជាការរកឃើញឆ្លងចូលក្នុងសហគមន៍ និង១៥ករណីទៀតជាការនាំចូលពីក្រៅប្រទេស។ ដោយឡែក ករណីស្លាប់ថ្មីគ្មានឡើយ ដែលធ្វើឱ្យកម្ពុជាមិនមានករណីស្លាប់ដោយកូវីដ-១៩ រយៈពេល២០ថ្ងៃជាប់ៗគ្នា។ ប្រភពដដែលក៏បានបញ្ជាក់ថា សម្រាប់អ្នកជំងឺព្យាបាលជាសះស្បើយថ្មីមានចំនួន១៩នាក់បន្ថែមទៀតផងដែរ។
ក្រសួងបញ្ជាក់ថា មកទល់ព្រឹកថ្ងៃចន្ទនេះ កម្ពុជារកឃើញករណីជំងឺកូវីដ-១៩ ប្រភេទបំប្លែងខ្លួន «អូមីក្រុង» បានឆ្លងចូលទៅក្នុងសហគមន៍មានចំនួនសរុប២១៤ករណី ប៉ុន្តែមិនមានសេចក្ដីរាយការណ៍បញ្ជាក់ពីករណីស្លាប់ដោយសារវីរុសបំប្លែងថ្មីមួយនេះឡើយ។
គិតត្រឹមព្រឹកថ្ងៃដដែលនេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន១២១ ០៦៦នាក់ ក្នុងនោះ អ្នកជំងឺព្យាបាលជាសះស្បើយចំនួន១១៧ ២៣២នាក់ អ្នកស្លាប់ចំនួន៣ ០១៥នាក់ និងករណីនាំចូលពីក្រៅប្រទេសចំនួន២០ ២៦៨នាក់៕
