បុគ្គលិកតវ៉ានៅក្រុមហ៊ុនណាហ្គាវើលដ៍ ចាត់ទុកខ្លឹមសារក្នុងសេចក្ដីថ្លែងការណ៍របស់ក្រុមហ៊ុនដែលអះអាងថា «តែងតែលើកទឹកចិត្តសហជីព» ថាជារឿងមិនពិត ខណៈថ្នាក់ដឹកនាំនិងសហជីពជិត១០នាក់កំពុងជាប់ឃុំក្នុងពន្ធនាគារនៅឡើយ។
ក្រុមហ៊ុនណាហ្គាវើលដ៍ បានចេញសេចក្ដីថ្លែងការណ៍កាលពីថ្ងៃទី២៣ ខែមករា ឆ្នាំ២០២២ ដោយអះអាងពីការប្ដេជ្ញាចិត្តរបស់ខ្លួនចំពោះសុខុមាលភាពបុគ្គលិកដោយមិនគិតពីឋានៈ និងបង្ហាញពីឥរិយាបថមិនលម្អៀង ហើយបើកទូលាយចំពោះបុគ្គលិកដែលជាសមាជិកសហជីពថែមទៀតផង។
សេចក្ដីថ្លែងការណ៍នោះបន្តថា ក្រុមហ៊ុនមិនបានយកហេតុផលសមាជិកភាពសហជីពជាលក្ខខណ្ឌក្នុងការសម្រេចកាត់បុគ្គលិកដូចការចោទប្រកាន់របស់សហជីពឡើយ។
ក្រុមហ៊ុនណាហ្គាវើលដ៍សរសេរថា៖ «ក្រុមហ៊ុនមានការយកចិត្តទុកដាក់ខ្លាំងលើការការពារប្រយោជន៍និងសិទ្ធិ ចំពោះសុខុមាលភាពបុគ្គលិក ក្រុមហ៊ុនតែងតែលើកទឹកចិត្តនិងសង្កត់ធ្ងន់ឱ្យបុគ្គលិកបង្កើតសហជីព ចាប់តាំងពីពេលក្រុមហ៊ុនចាប់កំណើតក្នុងឆ្នាំ១៩៩៥មកម្ល៉េះ»។
សកម្មជនសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ អ្នកស្រី គឹម ពិសី លើកឡើងថា នៅថ្ងៃទី២៤ ខែមករានេះ គឺជាថ្ងៃទី៣៧ហើយដែលបុគ្គលិកក្រុមហ៊ុនណាហ្គាវើលដ៍បានធ្វើកូដកម្មទាមទារឱ្យក្រុមហ៊ុនដោះស្រាយវិវាទការងារ ខណៈថ្ងៃដដែលនេះជាថ្ងៃទី២៥ ដែលថ្នាក់ដឹកនាំសហជីពត្រូវបានចាប់និងឃុំខ្លួន។
អ្នកស្រីបន្តថា ក្រុមហ៊ុនណាហ្គាវើលដ៍មិនបានលើកទឹកចិត្តសហជីពដូចសេចក្ដីថ្លែងការណ៍របស់ខ្លួនឡើយ។
អ្នកស្រី គឹម ពិសី និយាយថា៖ «អត់បានលើកទឹកចិត្តផង! ធម្មតាបងអើយ! គេមិនដែលនិយាយឱ្យខ្លួនគេអាក្រក់ទេ គេនិយាយឱ្យតែខ្លួនគេល្អ ខ្លួនគេត្រឹមត្រូវតែប៉ុណ្ណឹង! បើលើកទឹកចិត្តបុគ្គលិក គ្មាននរណាចេញមកតវ៉ារាប់ពាន់នាក់អ៊ីចឹងទេ បងឯងដឹងតែប៉ុណ្ណឹងទៅ! មនុស្សណាសុខចិត្តចេញមកហាលក្ដៅ ហាលភ្លៀង អត់ងងុយស្អុយភ្នែកខ្លួនឯង អស់សាំងអស់អីខ្លួនឯង។»
ចំណែកអ្នកស្រី កង ផារី ដែលជាអ្នកតវ៉ាក្នុងចំណោមបុគ្គលិកជាង១ ០០០នាក់ផ្សេងទៀត និយាយស្រដៀងគ្នាដែរថា ក្រុមហ៊ុនមិនបានការពារបុគ្គលិកដែលជាសមាជិកសហជីព និងមិនបានលើកទឹកចិត្តបុគ្គលិកដូចអ្វីដែលអះអាងឡើយ។
អ្នកស្រីថា៖ «និយាយទៅ ធ្វើឱ្យតែល្អមើល តែមិនល្អស៊ី។ បើនិយាយភាសាសាមញ្ញ ធ្វើឱ្យគេខាងក្រៅមើលទៅគិតថាគាត់ស្រឡាញ់កូនចៅ ស្រឡាញ់បុគ្គលិកណាស់ មើលថែគ្រប់យ៉ាង ប៉ុន្តែការពិតគឺវាផ្ទុយ»។
អ្នកតវ៉ាមួយរូបទៀត គឺលោក ប៉េង សោភា លើកឡើងថា លោកបានឮខ្លឹមសារក្នុងសេចក្ដីថ្លែងការណ៍របស់ក្រុមហ៊ុននេះច្រើនលើកច្រើនសារមកហើយ។
លោកអះអាងថា៖ «ក្រុមហ៊ុនតែងតែថាខ្លួនឯងមិនដែលរំលោភសិទ្ធិសហជីព តែធាតុពិតក្នុងគម្រោងកាត់បន្ថយបុគ្គលិកនេះ គឺដើម្បីតែរំលាយសហជីពទាំងស្រុង ដោយសារតែក្នុងគម្រោងនេះ អ្នកដែលមានឈ្មោះកាត់ គឺថ្នាក់ដឹកនាំសហជីពទាំងអស់ និងអ្នកសកម្មការងារជាមួយសហជីព»។
លោក ប៉េង សោភា បន្តថា បើទោះក្រុមហ៊ុនណាហ្គាវើលដ៍ចេញសេចក្ដីថ្លែងការណ៍បែបនេះក៏ដោយ ក្រុមកូដករនៅតែបន្តតវ៉ាទាមទារឱ្យក្រុមហ៊ុនចូលតុចរចា ដើម្បីដោះស្រាយនូវសំណើទាំង៩ចំណុច ហើយត្រូវដោះលែងថ្នាក់ដឹកនាំសហជីពដែលជាតំណាងចរចារបស់ពួកគាត់ដែលកំពុងតែជាប់ឃុំនៅគុកព្រៃស។
តំណាងក្រុមហ៊ុនណាហ្គាវើលដ៍ លោក Mike Ngai បដិសេធឆ្លើយតបជាមួយវីអូឌីនៅថ្ងៃចន្ទនេះ។
អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួរ មានប្រសាសន៍ថា ក្រសួងការងារនៅតែបន្តបំពេញតួនាទីជាអ្នកសម្របសម្រួលសម្រាប់បុគ្គលិកដែលមានបំណងចង់បានការសម្របសម្រួល។
លោកបន្តថា៖ «នោះគឺការយល់ឃើញរបស់គាត់ គ្មានអ្នកណាមួយដែលអាចបង្ខំការយល់ឃើញរបស់គាត់បានទេ។ អ្វីដែលយើងនិយាយ គឺមានតែផ្អែកទៅលើការពិត ហើយនិងការប្រៀបធៀប ហើយនិងចរិតលក្ខណៈនៃអាជីវកម្មនីមួយៗ ក៏ដូចជាសកម្មភាពសេដ្ឋកិច្ចនីមួយៗអ៊ីចឹង»។
អ្នកគ្រប់គ្រងកម្មវិធីការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស របស់អង្គការសង់ត្រាល់ លោក ឃុន ថារ៉ូ ថ្លែងថា ខ្លឹមសារដែលក្រុមហ៊ុនលើកឡើង គឺផ្ទុយពីការអនុវត្តជាក់ស្ដែង។ លោកថា ចាប់តាំងពីឆ្នាំ២០០៩ រហូតដល់ឆ្នាំ២០១៣ ក្រុមហ៊ុនធ្លាប់បានធ្វើទុក្ខបុកម្នេញសហជីព ដោយបញ្ឈប់ថ្នាក់ដឹកនាំសហជីព ប្រតិភូសហជីពជាលក្ខណៈទ្រង់ទ្រាយធំ រហូតមានការប្ដឹងទៅអង្គការអន្តរជាតិ និងប្ដឹងតុលាការជាដើម។
លោក ឃុន ថារ៉ូ បន្តថា មកដល់ឆ្នាំ២០២០ ក្រុមហ៊ុនល្បែងមួយនេះនៅតែបន្តគំរាមកំហែងថ្នាក់ដឹកនាំនិងសមាជិកសហជីព នៅពេលដែលអ្នកទាំងនោះជំរុញឱ្យក្រុមហ៊ុនមានការដំឡើងប្រាក់ឈ្នួលសមរម្យ និងទាមទារឱ្យមានសុវត្ថិភាពនៅកន្លែងការងារ។
លោកបានគូសបញ្ជាក់ថា៖ «អ៊ីចឹងវិធានការចុងក្រោយនេះ វាបង្ហាញជាក់ស្ដែងហើយថា ការបញ្ឈប់មេដឹកនាំសហជីព សកម្មជនសហជីព ដែលជាង៨០ភាគរយ ភាគច្រើនពួកគាត់ជាសមាជិក ថ្នាក់ដឹកនាំ សកម្មជនសហជីព។ អ៊ីចឹងអាហ្នឹងគឺវាច្បាស់លាស់ហើយ រឿងដែលក្រុមហ៊ុនថាគាត់មិនរើសអើងសហជីពហ្នឹង។ ខ្ញុំគិតថាវាផ្ទុយពីការអនុវត្តជាក់ស្ដែង»។
លោក ឃុន ថារ៉ូ មើលឃើញថា វិវាទការងារក្រុមហ៊ុនល្បែងមួយនេះអាចដោះស្រាយបាន លុះត្រាដោះលែងថ្នាក់ដឹកនាំសហជីព និងដោះស្រាយជាកញ្ចប់ដើម្បីបញ្ចប់រឿង ទើបអាចទៅរួច។
សហព័ន្ធសហជីពអន្តរជាតិ បានផ្ញើលិខិតមួយកាលពីថ្ងៃទី១៨ ខែមករា ទៅកាន់លោកនាយករដ្ឋមន្ត្រី ហ៊ុន សែន ដោយអះអាងថា វិវាទការងាររបស់ក្រុមហ៊ុនណាហ្គាវើលដ៍ គឺកើតចេញពីការបរាជ័យជាយូរណាស់មកហើយពីសំណាក់ភាគីក្រុមហ៊ុន ក្នុងការគោរពសិទ្ធិកម្មករនិងសហជីព ចំពោះកិច្ចចរចាដោយសមូហភាព ដើម្បីទទួលបានប្រាក់ឈ្នួលនិងលក្ខខណ្ឌការងារកាន់តែប្រសើរ។
លិខិតនោះបន្តថា ក្រុមហ៊ុនណាហ្គាវើលដ៍ មិនបានគោរពតាមគោលការណ៍របស់រដ្ឋាភិបាលលើការងារ សុវត្ថិភាព និងការការពារសុខភាពក្នុងអំឡុងពេលមានជំងឺកូវីដ-១៩នោះទេ។
ផ្ទុយទៅវិញ បុគ្គលិកនិយោជិតចំនួន១ ៣២៩នាក់ត្រូវបានបញ្ឈប់ពីការងារ ដោយមិនបានពិគ្រោះយោបល់ក្រោមច្បាប់ការងារកម្ពុជា ខណៈក្នុងចំណោមនោះមានចំនួន១ ១០០នាក់គឺជាសមាជិកសហជីពផងដែរ។
កាលពីថ្ងៃទី៥ ខែមករា ថ្នាក់ដឹកនាំនិងសកម្មជនសហជីពចំនួន៨នាក់ ក្នុងនោះមានប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ ផង ត្រូវបានតុលាការសម្រេចឃុំខ្លួនបណ្ដោះអាសន្នក្រោមការចោទប្រកាន់ពីបទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍» ក្រោយពីពួកគេធ្វើកូដកម្មអហិង្សាទាមទារគោរពសិទ្ធិសហជីព និងលក្ខខណ្ឌការងារប្រសើរក្នុងក្រុមហ៊ុន៕