ចាងហ្វាងគេហទំព័រមួយដែលមានជម្លោះដីធ្លីជាមួយមន្ត្រីយោធាផ្កាយ២ នៅស្រុកអន្លង់វែង ខេត្តឧត្ដរមានជ័យ បានប្ដឹងមន្ត្រីតុលាការចំនួន៤រូបទៅកាន់ក្រសួងយុត្តិធម៌ឱ្យជួយរកយុត្តិធម៌ ដោយថា មន្ត្រីតុលាការទាំងនោះបានកាត់ក្ដីឱ្យខ្លួនចាញ់ទាំងមិនអស់ចិត្ត។
លោក ប៉ែន នួន ដែលអះអាងថាជាចាងហ្វាងគេហទំព័រស្រទាប់យុវវ័យ និងជាអ្នកមានជម្លោះដីធ្លីម្នាក់ក្នុងចំណោមពលរដ្ឋ៣គ្រួសារទៀត ជាមួយមន្រ្តីយោធាផ្កាយ២ម្នាក់ ឈ្មោះ អ៊ុក គឹមលី ស្ថិតនៅភូមិសាមគ្គី ឃុំត្រពាំងប្រិយ៍ ស្រុកអន្លង់វែង ខេត្តឧត្ដរមានជ័យ។
លោក ប៉ែន នួន បានប្រសាសន៍ប្រាប់ វីអូឌី នៅថ្ងៃពុធនេះថា ដើមចមដែលនាំឱ្យគាត់ដាក់ពាក្យប្ដឹងទៅក្រសួងយុត្តិធម៌ ដោយសារតែមន្ត្រីយោធាផ្កាយ២ បានរំលោភយកដីរបស់គាត់និងពលរដ្ឋ៣គ្រួសារទៀតសរុបជិត៦០០ហិកតា។ លោកបានចោទថា ក្រោយពីមន្ត្រីយោធាផ្កាយ២ បានគប់គិតជាមួយមន្ត្រីក្រោមឱវាទ ឈ្មោះ យឹម សេន រំលោភយកកាលពីឆ្នាំ២០១៩ នៅពេលនោះ គាត់បានឡាយវីដេអូនិយាយផ្សព្វផ្សាយក្នុងនាមជាអ្នកសារព័ត៌មានម្នាក់ ក៏ប៉ុន្តែត្រូវមន្ត្រីយោធានោះប្ដឹងពីបទ «បរិហារកេរ្ត៍» និងបទ «ញ៉ុះញង់ពលរដ្ឋ» ទៅវិញ។
ក្រោយមក លោក ស៊ឹម ពិចិត្រ អតីតចៅក្រមសាលាដំបូងខេត្តឧត្ដរមានជ័យ និងលោក គង់ រតនា អតីតព្រះរាជអាជ្ញារងសាលាដំបូងខេត្តឧត្ដរមានជ័យ រួមទាំងលោក អួង វុទ្ធា ចៅក្រមសាលាដំបូងរាជធានីភ្នំពេញ និងលោក អ៊ុ សុភក្តិ ព្រះរាជអាជ្ញារងអមសាលាដំបូងរាជធានីភ្នំពេញ បានកាត់ក្ដីឱ្យគាត់ចាញ់ក្ដីមន្ត្រីយោធាផ្កាយ២។ ដោយមិនសុខចិត្ត លោកបានរកកិច្ចអន្តរាគមន៍ពីក្រសួងយុត្តិធម៌បន្តទៀត ដោយលោកចាត់ទុកការកាត់សេចក្ដីរបស់តុលាការកន្លងមកថា ជារឿងមិនអាចទទួលយកបាន។
លោកអំពាវនាវដូច្នេះថា៖ «កាត់ក្ដីអយុត្តិធម៌ឱ្យយើង សូមឱ្យគាត់ជួយផ្ដល់ភាពយុត្តិធម៌ចំពោះអ្វីដែលចៅក្រមកាត់ក្ដីឱ្យយើងសងជំងឺចិត្ត [ជិត១០០លានរៀល] ទៅឱ្យផ្កាយ២ លើសលុប ដែលយើងមិនអាចទទួលយកបាន»។
វីអូឌី មិនអាចរកប្រភពទាក់ទងទៅមន្រ្តីយោធាផ្កាយ២ ឈ្មោះ អ៊ុក គឹមលី បានទេ នៅថ្ងៃពុធនេះ។
អ្នកនាំពាក្យក្រសួងយុត្តិធម៌ លោក ជិន ម៉ាលីន មានប្រសាសន៍ប្រាប់ វីអូឌី តាមសារតេឡេក្រាមថា ក្រសួងនឹងពិនិត្យលើពាក្យបណ្ដឹងរបស់ចាងហ្វាងគេហទំព័រស្រទាប់យុវវ័យនោះ។
មន្ត្រីស៊ើបអង្កេតជាន់ខ្ពស់នៅសមាគមអាដហុក លោក ស៊ឹង សែនករុណា យល់ឃើញថា ជាទូទៅ តុលាការមុននឹងធ្វើការវិនិច្ឆយឬកាត់សេចក្ដីលើសំណុំរឿងណាមួយ គួរតែពិនិត្យមើលលើអង្គហេតុឱ្យបានគ្រប់ជ្រុងជ្រោយ ដើម្បីកុំឱ្យភាគីណាមួយទទួលរងនូវភាពអយុត្តិធម៌។
លោកជំរុញដូច្នេះថា៖ «ក្រសួងយុត្តិធម៌នៅពេលទទួលបានបណ្ដឹងពីគាត់ [ប៉ែន នួន] គប្បីចុះធ្វើការស្រាវជ្រវនិងពិនិត្យមើលករណីនេះនៅទីតាំងកើតហេតុឡើងវិញ តើវាមានស្ថានភាពបែបម៉េច! ហើយធ្វើការស្រាវជ្រាវសំណុំរឿងដែលពាក់ព័ន្ធទាំងអស់ ដើម្បីផ្ដល់យុត្តិធម៌ទៅដល់ភាគី»។
លោកបន្ថែមថា៖ «ហើយបើរកឃើញថា ភាគីណាបានប្រព្រឹត្តនូវបទល្មើសឬប្រព្រឹត្តផ្ទុយពីច្បាប់ គឺធ្វើការចាត់វិធានការតាមផ្លូវច្បាប់ ដើម្បីកុំឱ្យអ្នកទាំងអស់ហ្នឹងចេះតែប្រើប្រាស់តួនាទីរបស់ខ្លួនរំលោភបំពានទៅលើជនទន់ខ្សោយ ឬរំលោភបំពានទៅលើផ្លូវច្បាប់»៕
