តុលាការកំពូលនៅថ្ងៃពុធនេះ បានបើកសវនាការជំនុំជម្រះបណ្ដឹងសារទុក្ខមេធាវីការពារក្ដីឱ្យឧកញ៉ា អ៊ឹង ម៉េងជឺ ប្រឆាំងនឹងសេចក្ដីសម្រេចរបស់សាលាឧទ្ធរណ៍ដែលបានទម្លាក់ចោទបទចោទប្រកាន់ និងដោះលែងឧកញ៉ា ថោង សារ៉ាត់ រួមទាំងបក្ខពួក៣នាក់ឱ្យមានសេរីភាពវិញ។
ឧកញ៉ា ថោង សារ៉ាត់ និងអង្គរក្ស៣នាក់ ដែលត្រូវបានចៅក្រមសាលាដំបូងរាជធានីភ្នំពេញកាត់ទោសឱ្យជាប់ពន្ធនាគារអស់មួយជីវិតនោះ ត្រូវបានសាលាឧទ្ធរណ៍ទម្លាក់ចោលបទចោទប្រកាន់ និងដោះលែងឱ្យមានសេរីភាព កាលពីអំឡុងខែវិច្ឆិកា ឆ្នាំ២០២០ ខណៈអង្គរក្សម្នាក់ទៀតត្រូវតុលាការរក្សាបទចោទប្រកាន់ និងបន្តឃុំខ្លួននៅពន្ធនាគារដដែល។
លោក ថោង សារ៉ាត់ និងអង្គរក្ស៤នាក់ ត្រូវបានតុលាការក្រុងភ្នំពេញផ្ដន្ទាទោសឱ្យជាប់ពន្ធនាគារម្នាក់ៗអស់មួយជីវិត ដោយចោទពីបទ «ឃាតកម្មគិតទុកជាមុន» និងបទ «សមគំនិត» ក្នុងសំណុំរឿងបាញ់សម្លាប់ឧកញ៉ា អ៊ឹង ម៉េងជឺ ដែលជាថៅកែស៊ីម៉ងត៍ត្បូងពេជ្រកាលពីឆ្នាំ២០១៤។
ប៉ុន្តែក្នុងចំណោមមនុស្សទាំង៥នាក់នោះ គឺមាន៤នាក់ត្រូវបានតុលាការទម្លាក់ចោលបទចោទ និងដោះលែងឱ្យនៅក្រៅឃុំបណ្ដោះអាសន្ន ខណៈម្នាក់ទៀតឈ្មោះ សៀង វាសនា ត្រូវបានតុលាការបន្តរក្សាបទចោទប្រកាន់ និងឃុំខ្លួននៅពន្ធនាគារដដែល។
មេធាវីការពារក្ដីឱ្យឧកញ៉ា អ៊ឹង ម៉េងជឺ គឺលោក តេង បូរ៉ា បានប្រាប់ចៅក្រមអំឡុងសវនាការថា សាលាដំបូងរាជធានីភ្នំពេញបានរកឃើញឧកញ៉ា ថោង សារ៉ាត់ និងបក្ខពួក៣នាក់ពិតជាបានជាប់ពាក់ព័ន្ធសំណុំរឿងបាញ់សម្លាប់ឧកញ៉ា អ៊ឹង ម៉េងជឺ កាលពីឆ្នាំ២០១៤មែន។
មេធាវីរូបនេះថា ចៅក្រមសាលាដំបូងរាជធានីភ្នំពេញបានកាត់ទោសឱ្យឧកញ៉ា ថោង សារ៉ាត់, ឈ្មោះ ហួយ ចាន់ថុល, ឈ្មោះ មាស សម្បត្តិ ហៅ ទូច, ឈ្មោះ ឃុន ចិត្រា និងឈ្មោះ សៀង វាសនា ជាប់ពន្ធនាគារអស់មួយជីវិតដែរ ប៉ុន្តែចៅក្រមសាលាឧទ្ធរណ៍បែរជាសម្រេចទម្លាក់ចោលបទចោទប្រកាន់ និងដោះលែងឧកញ៉ា ថោង សារ៉ាត់ និងបក្ខពួក៣នាក់ឱ្យមានសេរីភាពទៅវិញ។
លោក តេង បូរ៉ា ចាត់ទុកការសម្រេចនោះថា ជារឿងអយុត្តិធម៌សម្រាប់គ្រួសារនិងកូនក្ដីរបស់លោក។ លោកស្នើទៅតុលាការកំពូលឱ្យបង្ខំលោក ថោង សារ៉ាត់ និងបក្ខពួក៤នាក់ផ្សេងទៀត សងជំងឺចិត្តដល់គ្រួសារឧកញ៉ា អ៊ឹង ម៉េងជឺ ផងដែរ។
លោកថា៖ «នេះជារឿងអយុត្តិធម៌ណាស់សម្រាប់កូនក្ដីខ្ញុំ។ បើគ្មាន អ៊ឹង ម៉េងជឺ គ្រួសារនោះនឹងក្លាយជាជំពាក់បំណុលគេ ហើយរស់នៅដោយគ្មានសុភមង្គល និងអស់សង្ឃឹម»។
ក្នុងបន្ទប់សវនាការនាថ្ងៃពុធនេះ ជនជាប់ចោទ លោក សៀង វាសនា បានស្នើទៅប្រធានក្រុមប្រឹក្សាជំនុំជម្រះតុលាការកំពូល ឱ្យទម្លាក់ចោលបទចោទប្រកាន់ និងដោះលែងខ្លួនឱ្យមានសេរីភាពវិញ។ លោកអះអាងថា ខ្លួនមិនបានជាប់ពាក់ព័ន្ធអំពើឃាតកម្មសម្លាប់ឧកញ៉ា អ៊ឹង ម៉េងជឺ នោះឡើយ។
លោកថា៖ «ខ្ញុំមិនបានប្រព្រឹត្តទេ ហើយខ្ញុំមានសាក្សី ហើយថ្ងៃនោះ ខ្ញុំនៅខេត្តកំពង់ឆ្នាំង។ ខ្ញុំមិនដែលស្គាល់ អ៊ឹង ម៉េងជឺ ទេ។ ហើយខ្ញុំក្រីក្រណាស់ តើខ្ញុំអាចរកស៊ីជាមួយគាត់បានយ៉ាងម៉េច? ខ្ញុំមិនមានអ្វីពាក់ព័ន្ធជាមួយគាត់ទេ។ ខ្ញុំបដិសេធរាល់ការចោទប្រកាន់ និងរបាយការណ៍របស់ប៉ូលិស។ […] ខ្ញុំមិនមានកាំភ្លើងទេ»។
អ្នកស្រី ស៊ិន សុវ៉ន ដែលជាមេធាវីការពារក្ដីឱ្យឈ្មោះ សៀង វាសនា បានបដិសេធរាល់របាយការណ៍និងការចោទប្រកាន់លើកូនក្ដី ដោយនិយាយថា របាយការណ៍នេះ ប៉ូលិសបានធ្វើទារុណកម្មកូនក្ដីរបស់ខ្លួនរហូតដល់សន្លប់ និងបានឱ្យផ្ដិតមេដៃជាដើម។
អ្នកស្រីបង្ហាញការសោកស្ដាយនៅពេលឧកញ៉ា អ៊ឹង ម៉េងជឺ ត្រូវបានឃាតករបាញ់សម្លាប់ និងស្នើឱ្យតុលាការស្វែងរកឃាតករពិតប្រាកដមកដាក់ទោស ខណៈកូនក្ដីរបស់អ្នកស្រីមិនបានប្រព្រឹត្ត និងមិនបានជាប់ពាក់ព័ន្ធជាមួយ អ៊ឹង ម៉េងជឺ ឡើយ។
អ្នកស្រីចាត់ទុកការរក្សាបទចោទប្រកាន់ និងការបន្តឃុំខ្លួនកូនក្ដីថាជារឿងអយុត្តិធម៌ ខណៈអ្នកផ្សេងទៀតបែរជាសាលាឧទ្ធរណ៍រកមិនឃើញថាមានទោសទៅវិញ។
អ្នកស្រីថា៖ «គាត់មិនបានប្រព្រឹត្តទេ ព្រោះគាត់នៅខេត្ត។ ប៉ុន្តែនៅទីបំផុត សាលាឧទ្ធរណ៍បានរកឃើញថាកូនក្ដីនាងខ្ញុំមានទោស ខណៈមនុស្ស៥នាក់ផ្សេងទៀតដែលពាក់ព័ន្ធនឹងបទល្មើស ត្រូវបានទម្លាក់ចោលការចោទប្រកាន់ ហើយពិបាកនឹងទទួលយករឿងនេះណាស់»។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត ចាត់ទុកការទម្លាក់ចោលបទចោទរបស់សាលាឧទ្ធរណ៍ បង្ហាញឱ្យឃើញថា សមត្ថកិច្ចដែលធ្វើរឿងនេះ គ្មានភស្តុតាងគ្រប់គ្រាន់ក្នុងការចាប់និងចោទប្រកាន់ឧកញ៉ា ថោង សារ៉ាត់ និងមនុស្សមួយចំនួនទៀត។
លោកបន្តថា ប្រសិនតុលាការបន្តរក្សាសេចក្ដីសម្រេចរបស់សាលាឧទ្ធរណ៍ទុកជាបានការដដែលនោះ សមត្ថកិច្ចត្រូវបើកការស៊ើបអង្កេតឡើងវិញ ដោយស្វែងរកឃាតករពិត និងអ្នកនៅពីក្រោយនៃការបាញ់សម្លាប់ឧកញ៉ា អ៊ឹង ម៉េងជឺ ដើម្បីផ្ដល់យុត្តិធម៌ជូនគ្រួសាររបស់គាត់។
លោកថា៖« អ៊ីចឹងបង្ហាញពីការខ្វះចន្លោះឬក៏ខ្វះខាតនៃការស៊ើបអង្កេត។ អ៊ីចឹងវាត្រូវតែពាក់ព័ន្ធហើយថាតើនរណាជាឃាតករក្នុងការបាញ់សម្លាប់ឧកញ៉ា អ៊ឹង ម៉េងជឺ។ ត្រូវតែមានការស៊ើបអង្កេតឡើងវិញ ដើម្បីស្វែងរកយុត្តិធម៌សម្រាប់ការបាញ់សម្លាប់ឧកញ៉ា អ៊ឹង ម៉េងជឺ»។
លោក អំ សំអាត កត់សម្គាល់ឃើញថា សំណុំរឿងឧកញ៉ា អ៊ឹង ម៉េងជឺ ត្រូវបានសមត្ថកិច្ចហាក់ដុតដៃដុតជើងធ្វើកិច្ចការងារនេះ ដោយចាប់ខ្លួនអ្នកពាក់ព័ន្ធបានភ្លាមៗ ប៉ុន្តែសម្រាប់សំណុំរឿងឃាតកម្មលើជនល្បីៗមួយចំនួន ដូចជា អតីតប្រធានសហជីពសេរីកម្មករខ្មែរ លោក ជា វិជ្ជា, អ្នកស្រាវជ្រាវការអភិវឌ្ឍន៍សង្គម បណ្ឌិត កែម ឡី និងអ្នកផ្សេងទៀត តុលាការហាក់បានអូសបន្លាយពេលវេលាយូរ។
យ៉ាងណា ក្រោយពីបើកសវនាការដេញដោលនៅពេញមួយព្រឹកនាថ្ងៃពុធនេះ ប្រធានក្រុមប្រឹក្សាតុលាការកំពូល លោក យូរ ឧត្ដមរា បានសម្រេចលើកពេលប្រកាសសាលដីកានៅថ្ងៃទី១៧ ខែកុម្ភៈ ឆ្នាំ២០២២ ខាងមុខនេះ។
ឧកញ៉ា អ៊ឹង ម៉េង ជឺ ត្រូវបានឃាតករបាញ់សម្លាប់កាលពីយប់ថ្ងៃទី២២ ខែវិច្ឆិកា ឆ្នាំ២០១៤ នៅពេលរូបលោកចុះពីរថយន្តឡិចស៊ីស៥៧០ ដើម្បីទៅទិញផ្លែឈើនៅមុខហាងលក់ផ្លែឈើមួយកន្លែង ស្ថិតនៅផ្លូវលេខ២៧៤ សង្កាត់ទួលស្វាយព្រៃទី២ ខណ្ឌចំការមន រាជធានីភ្នំពេញ៕