មន្ត្រីជាន់ខ្ពស់រដ្ឋាភិបាលកម្ពុជា បានចាត់ទុករបាយការណ៍វាយតម្លៃស្ដីពីសន្ទស្សន៍នៃការយល់ឃើញពីអំពើពុករលួយនៅកម្ពុជាឆ្នាំ២០២១ ថាជារបាយការណ៍ «ប្រតិដ្ឋ» និង «បោកប្រាស់» ខណៈតំណាងអង្គការតម្លាភាពអន្តរជាតិប្រចាំកម្ពុជាមិនធ្វើអត្ថាធិប្បាយតបតទៅនឹងប្រតិកម្មនេះទេ។
ប្រធានអង្គភាពអ្នកនាំពាក្យរដ្ឋាភិបាលកម្ពុជា លោក ផៃ ស៊ីផាន បានថ្លែងនៅក្នុងពិធីបើកសន្និសីទកាសែតប្រចាំសប្ដាហ៍របស់ទីស្ដីការគណៈរដ្ឋមន្ត្រី នៅថ្ងៃព្រហស្បតិ៍នេះថា រដ្ឋាភិបាលកម្ពុជានឹងមិនឱ្យតម្លៃទៅលើរបាយការណ៍របស់អង្គការតម្លាភាពអន្តរជាតិ (TI) ស្ដីពីសន្ទស្សន៍យល់ឃើញពីអំពើពុករលួយនៅកម្ពុជាដែលធ្វើឡើងកាលពីថ្ងៃអង្គារសប្ដាហ៍នេះឡើយ។
លោកបានហៅរបាយការណ៍នេះ ថាជារបាយការណ៍ «ប្រតិដ្ឋ» និង «បោកប្រាស់» និងថាមិនតំណាងឱ្យការខិតខំប្រឹងប្រែងរបស់កម្ពុជានោះឡើយ។
លោកថា៖ «គេផ្សព្វផ្សាយដែរ ខ្ញុំបានតាមដាន គឺផ្សព្វផ្សាយពីចំណាត់ថ្នាក់របស់កម្ពុជាហ្នឹង គឺមានតួលេខប៉ុណ្ណេះ [ចំណាត់ថ្នាក់ទី១៥៧ ក្នុងចំណោម១៨០ប្រទេស] គឺនៅក្រោមចំណាត់ថ្នាក់ភូមាទៅទៀត។ ដូច្នេះ គួរឱ្យអាម៉ាស់ណាស់ ដែលខ្ញុំអាចវាយតម្លៃថា អង្គការតម្លាភាពនៅកម្ពុជាដែលជាអង្គការក្រៅរដ្ឋាភិបាលមួយ គ្រាន់តែជាអាយ៉ងរបស់បរទេស កាន់អាននូវរបាយការណ៍ប្រតិដ្ឋសុទ្ធសាធ ដែលមាននិន្នាការមិនមែនជាតំណាងការប្រឹងប្រែងរបស់កម្ពុជា»។
ក្រៅពីប្រតិកម្មនេះ លោក ផៃ ស៊ីផាន ក៏បានបង្គាប់ឱ្យមន្ត្រីរបស់លោកចាក់ផ្សាយបទសម្ភាសន៍មួយកាលពីឆ្នាំ១០១៦ របស់លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ ស្ដីពី «កិច្ចខិតខំប្រឹងប្រែងរបស់រដ្ឋាភិបាលកម្ពុជា ក្នុងការប្រយុទ្ធប្រឆាំងអំពើពុករលួយ» និងការវាយបករបស់លោកទៅលើនីតិវិធីនៃការដាក់ពិន្ទុ (CPI) របស់អង្គការតម្លាភាពអន្តរជាតិ (TI) ថាមិនមែនជាយន្តការដែលស្ថិតនៅក្នុងក្របខណ្ឌរបស់អង្គការសហប្រជាជាតិនោះទេ។
នាយកប្រតិបត្តិអង្គការតម្លាភាពកម្ពុជា (TI) លោក ប៉ិច ពិសី សុំមិនធ្វើអត្ថាធិប្បាយឡើយទៅលើប្រតិកម្មរបស់មន្ត្រីជាន់ខ្ពស់រដ្ឋាភិបាលនេះ។ ក៏ប៉ុន្តែនៅក្នុងបទសម្ភាសន៍មួយក្រោយការចេញផ្សាយរបាយការណ៍នេះ កាលពីថ្ងៃទី២៥ ខែមករា លោកបានមានប្រសាសន៍ថា ទោះបីជារដ្ឋាភិបាលបដិសេធជាសាធារណៈទៅលើការរកឃើញនៅក្នុងរបាយការណ៍នេះក្ដី តែលោកសង្ឃឹមថា រដ្ឋាភិបាលនឹងប្រើប្រាស់ព័ត៌មាននៅក្នុងរបាយការណ៍នេះ ដើម្បីជាប្រយោជន៍សម្រាប់រដ្ឋាភិបាល។
លោកថា៖ «បើអ៊ីចឹង ខ្ញុំគិតថា ទោះបីជារដ្ឋាភិបាលបដិសេធ ក៏ប៉ុន្តែខ្ញុំគិតថា ប្រហែលគាត់ចូលទៅមើលព័ត៌មានហ្នឹងតាមវិធីណាមួយទៅ យើងដាក់នៅលើអនឡាញទេ។ អ៊ីចឹងគាត់អាចមើល! ហើយអាចជាជំនួយស្មារតី ជាជំនួយដល់បច្ចេកទេសក្នុងការដោះស្រាយអំពើពុករលួយដែរ ជាពិសេសស្ថាប័នដែលដឹកនាំហ្នឹង ដែលគាត់អាចប្រើប្រាស់ទិន្នន័យទាំងអស់នោះ»។
នាយិកាមជ្ឈមណ្ឌលសិទ្ធិមនុស្សកម្ពុជា អ្នកស្រី ចក់ សុភាព មានប្រសាសន៍ថា អ្នកស្រីមិនមានអ្វីចម្លែកនោះទេ ដែលមន្ត្រីរដ្ឋាភិបាលកម្ពុជាតែងតែបដិសេធរបាយការណ៍ ឬការរកឃើញណាមួយរបស់អង្គការសង្គមស៊ីវិល។ អ្នកស្រីថា នេះគឺជាឧបសគ្គមួយដែលធ្វើឱ្យបញ្ហាមិនត្រូវបានដោះស្រាយនោះទេ។
អ្នកស្រីថា៖ «ដូចជាមិនមានអ្វីចម្លែកនោះទេ ដោយសារតែកន្លងមកយើងឃើញហើយ ឱ្យតែមានការចេញរបាយការណ៍ពីអង្គការសង្គមស៊ីវិលហ្នឹង យើងឃើញថា រដ្ឋាភិបាលលោកតែងតែប្រកាន់ជំហរថារបាយការណ៍ទាំងអស់នោះ ជាពិសេសនៅពេលរបាយការណ៍ហ្នឹងបង្ហាញអំពីកង្វះខាត ឬក៏បញ្ហាដែលកម្ពុជាកំពុងប្រឈមពាក់ព័ន្ធបញ្ហាសិទ្ធិមនុស្ស ឬក៏ស្ថានភាពនយោបាយ ដូចជាការវាយតម្លៃអំពីប្រព័ន្ធយុត្តិធម៌ ឬការលុបបំបាត់អំពើពុករលួយអីជាដើមហ្នឹង យើងឃើញថា មានការឆ្លើយតបដដែលៗបែបនេះ ដូចជាមិនដែលមានពេលណាដែលរដ្ឋាភិបាលលោកស្វាគមន៍ចំពោះការឆ្លុះបញ្ចាំងអំពីទិដ្ឋភាពដែលកើតឡើងជាក់ស្ដែងទេ»។
កាលពីថ្ងៃអង្គារ អង្គការតម្លាភាពអន្តរជាតិ (TI) ដែលមានមូលដ្ឋាននៅទីក្រុងប៊ែរឡាំង ប្ររទេសអាល្លឺម៉ង់ បានបង្ហាញថា ពិន្ទុលើសន្ទស្សន៍ការយល់ឃើញពីអំពើពុករលួយនៅកម្ពុជាឆ្នាំ២០២១ បានប្រសើរជាងឆ្នាំ២០២០ ចំនួន២ពិន្ទុ ពោលគឺកើនពីពិន្ទុ២១ នៅឆ្នាំ២០២០ ដល់២៣ នៅឆ្នាំ២០២១ (ក្នុងពិន្ទុខ្ពស់បំផុត១០០) ហើយស្ថិតនៅចំណាត់ថ្នាក់ទី១៥៧ លើ១៨០ប្រទេស។
តែទោះជាកើន២ពិន្ទុក្ដី របាយការណ៍នេះបានរកឃើញថា កម្ពុជាជាប់ចំណាត់ថ្នាក់ជាប្រទេសដែលមានអំពើពុករលួយច្រើនជាងគេក្នុងចំណោមប្រទេសអាស៊ាន ដែលទាបជាងប្រទេសមីយ៉ាន់ម៉ាដែលមាន២៨ពិន្ទុ។ តែលោក ប៉ិច ពិសី ថាការវាយតម្លៃសម្រាប់ប្រទេសមីយ៉ាន់ម៉ានេះត្រូវបានធ្វើឡើងនៅមុនពេលមានរដ្ឋប្រហារយោធាកើតឡើង។ រីឯនៅក្នុងតំបន់អាស៊ីប៉ាស៊ីហ្វិកវិញ កម្ពុជាឈរនៅលេខ៣ពីបាតតារាង ពោលគឺនៅពីលើតែប្រទេសអាហ្វហ្គានីស្ថាន និងប្រទេសកូរ៉េខាងជើងតែប៉ុណ្ណោះ៕
