ក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថា ក្នុងឆ្នាំ២០២១ ក្រសួងទទួលបានពាក្យបណ្ដឹងពាក់ព័ន្ធនឹងវិវាទដីធ្លីជិត៤០០ករណី និងដោះស្រាយបញ្ចប់នីតិវិធីបានចំនួនជាង២០០ករណី។
របាយការណ៍របស់ក្រសួងបានឱ្យដឹងកាលពីម្សិលមិញថា យន្តការដោះស្រាយវិវាទដីធ្លីនៅកម្ពុជាមានចំនួន៣ រួមមាន យន្តការគណៈកម្មការសុរិយោដីក្រុង ស្រុក ខណ្ឌ, ការដោះស្រាយដោយក្រុមការងារក្រសួងរៀបចំដែនដី និងការដោះស្រាយរបស់អាជ្ញាធរជាតិដោះស្រាយទំនាស់ដីធ្លី។
របាយការណ៍ដដែលបញ្ជាក់ថា កាលពីឆ្នាំ២០២១ យន្តការដោះស្រាយវិវាទដីធ្លីរបស់ក្រសួងដែនដី នគរូបនីយកម្ម និងសំណង់ ទទួលបានពាក្យបណ្ដឹងសរុប៣៩២ករណី ដោយដោះស្រាយបញ្ចប់នីតិវិធីចំនួន២០២ករណី។
វីអូឌី មិនអាចសុំការបំភ្លឺពីអ្នកនាំពាក្យក្រសួងរៀបចំដែនដី លោក សេង ឡូត បានទេ នៅថ្ងៃព្រហស្បតិ៍នេះ។
លោក សួង ពៅ រស់នៅបឹងខ្យាង ស្រុកកណ្ដាលស្ទឹង ដែលអះអាងជាពលរដ្ឋរងគ្រោះដីធ្លីក្រោមគម្រោងអភិវឌ្ឍន៍ព្រលានយន្តហោះរបស់ក្រុមហ៊ុន OCIC នៅខេត្តកណ្ដាល និយាយថា គាត់មានជម្លោះដីធ្លីជាមួយក្រុមហ៊ុនប្រហែលជា៣ទៅ៤ឆ្នាំមកហើយ។ ប៉ុន្តែលោកថា មិនឃើញមន្ត្រីក្រសួងរៀបចំដែនដី មកជួយអន្តរាគមន៍ជួយប្រជាពលរដ្ឋនោះទេ បើទោះបីជាពួកគេដាក់ញត្តិសុំកិច្ចអន្តរាគមន៍ជាច្រើនលើកក៏ដោយ។
ករណីនេះ លោកស្នើទៅក្រសួងចាត់មន្ត្រីជំនាញចុះសិក្សាដល់កន្លែងកើតហេតុ ដើម្បីប្រមូលព័ត៌មានពីប្រជាពលរដ្ឋផ្ទាល់ និងជួយពន្លឿនដោះស្រាយបញ្ហាដីធ្លីជូនពួកគាត់ស្របតាមតម្លៃទីផ្សារ។
លោកមានប្រសាសន៍ថា៖ «ខ្ញុំស្នើសុំឱ្យក្រសួងស្ថាប័នដែលពាក់ព័ន្ធចុះមកត្រួតពិនិត្យដល់កន្លែងកើតហេតុមក តើពលរដ្ឋពេញចិត្តទទួលយក១ម៉ែត្រការ៉េ៨ដុល្លារពីក្រុមហ៊ុនដែរឬអត់? អាហ្នឹងបានយើងដឹងពីឫសគល់ កុំឱ្យថាយើងចេះតែយកតួលេខ យកតែរបាយការណ៍ អត់ដឹងពីសុខទុក្ខប្រជាពលរដ្ឋជាក់ស្ដែង»។
មន្ត្រីសម្របសម្រួលគម្រោងធុរកិច្ច និងសិទ្ធិមនុស្ស នៅមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត មានប្រសាសន៍ថា របាយការណ៍របស់ក្រសួងនៅមិនទាន់ឆ្លុះបញ្ចាំងពីតម្លាភាពនៃការដោះស្រាយវិវាទដីធ្លីជូនប្រជាពលរដ្ឋដែលកំពុងរងគ្រោះនៅឡើយ ជាក់ស្ដែងជម្លោះដីធ្លីរវាងពលរដ្ឋជាមួយក្រុមហ៊ុន និងអ្នកមានអំណាច មិនឃើញមានដំណោះស្រាយនៅឡើយ។
លោកមានប្រសាសន៍ថា៖ «សាលាកបត្ររបស់មជ្ឈមណ្ឌលសិទ្ធិមនុស្សកម្ពុជា បានចេញកាលពីខែតុលា ឆ្នាំ២០២១ យើងកត់សម្គាល់ថាមានការបណ្ដេញចេញទៅលើករណីទំនាស់ដីធ្លីចំនួន១៤ករណី ដូចជានៅខាង អូឌីស៊ី ជ្រោយចង្វារ ដូចជានៅខាងព្រលានយន្តហោះថ្មីនៅខេត្តកណ្ដាល ដូចជានៅប៉ះពាល់ទង្គិចគ្នានៅអង្គស្នួល ខេត្តកណ្ដាល និងតាមបណ្ដាខេត្តមួយចំនួនទៀតនៅខេត្តស្វាយរៀង នៅកោះកុងជាដើម។ល។ រហូតមកដល់បច្ចុប្បន្ននេះ មិនទាន់មានដំណោះស្រាយទេ»។
មន្ត្រីសិទ្ធិមនុស្សរូបនោះមានប្រសាសន៍បន្ថែមថា កន្លងមក អាជ្ញាធរពាក់ព័ន្ធមិនសូវសហការជាមួយសង្គមស៊ីវិលក្នុងការជួយរកដំណោះស្រាយជូនប្រជាពលរដ្ឋដែលរងគ្រោះរឿងដីធ្លីនោះទេ បែរជាចោទសង្គមស៊ីវិលថាបំប៉ោងព័ត៌មាន និងមាននិន្នាការប្រឆាំងរដ្ឋាភិបាល ហើយទំនោរទៅរកបក្សប្រឆាំងទៅវិញ។
គិតចាប់ពីឆ្នាំ២០០៤ ដល់ខែធ្នូ ឆ្នាំ២០២១ គណៈកម្មការសុរិយោដី បានបញ្ចប់វិវាទពាក់ព័ន្ធនឹងពលរដ្ឋចំនួន២៣ ២៩៧គ្រួសារ ស្មើនឹងផ្ទៃដីទំហំជិត ៦ ៦០០ហិកតា។
ពីឆ្នាំ២០១៦ ដល់ឆ្នាំ២០២១ ក្រសួងទទួលបានករណីវិវាទជិត២ ៩០០ករណី ដោយដោះស្រាយបាន៦០០ករណី (បញ្ចប់ស្ថាពរជាង៣០០ករណី, ការធ្វើលិខិតឆ្លើយតបទៅម្ចាស់បណ្ដឹង និងបង្វែរទៅសមត្ថកិច្ចពាក់ព័ន្ធចំនួនជិត៣០០ករណី) និងកំពុងដោះស្រាយជិត២ ៣០០ករណី។
និយាយជារួម របាយការណ៍ដដែលបញ្ជាក់ថា បើគិតពីការចាប់ផ្ដើមការអនុវត្តយន្តការដល់ដំណាច់ឆ្នាំ២០២១ បណ្ដឹងសរុបមានជិត១៤ ០០០ករណី ដោយដោះស្រាយបានជិត១១ ០០០ករណី និងកំពុងដោះស្រាយជាង៣ ២០០ករណី៕