កូដករចោទម្ចាស់ក្រុមហ៊ុនណាហ្គាថាព្យាយាមចេញព័ត៌មានបំភ្លៃការពិត ដើម្បីគេចវេសការទទួលខុសត្រូវ

សន្និសីទសារព័ត៌មានរបស់ក្រុមហ៊ុន ណាហ្គាវើលនៅសណ្ឋាគារសាន់វេភ្នំពេញ នាថ្ងៃទី២៨ ខែមករា ឆ្នាំ២០២២ (ជន ចាន់រ៉ែន)

ក្រុមកូដករកាស៊ីណូណាហ្គាវើលដ៍ (Naga World) ចោទប្រកាន់ថៅកែរបស់ក្រុមហ៊ុនល្បែងមួយនេះ ថាបាន​ព្យាយាម​ចេញ​ព័ត៌​មាន​បំភ្លៃ​ការ​ពិត ដើម្បីគេច​វេស​ពី​ការ​ទទួល​ខុស​ត្រូវ ខណៈពួក​គេធ្វើកូដកម្ម​តវ៉ាជាងមួយខែគ្មានដំណោះស្រាយ។

ការលើកឡើងនេះ បាន​ធ្វើក្នុងសន្និសីទ​សារព័ត៌មានមួយ​នៅ​សណ្ឋាគារ​សាន់វេភ្នំពេញ នាថ្ងៃទី២៨ ខែមករានេះ ក្រោយ​ពី​ក្រុមហ៊ុនបានចេញសេចក្តីថ្លែងការណ៍​ជុំវិញ​បញ្ហា​កូដកម្ម និងបញ្ហារបស់ក្រុមហ៊ុន។

កាលពីថ្ងៃទី២៣ ខែមករា ឆ្នាំ២០២២ ក្រុមហ៊ុនណាហ្គាវើលដ៍ បានចេញសេចក្ដីថ្លែងការណ៍៨ចំណុចដោយ​លើក​ឡើងថា ក្នុងឆមាសទី១​នៃឆ្នាំ២០២១ ក្រុមហ៊ុនបានខាត់បង់ប្រាក់សុទ្ធជាង ៧៧​លាន​ដុល្លារ និង​ក្រុមហ៊ុនកាត់បន្ថយតែបុគ្គលិកណាដែលលើសតម្រូវការ និងបុគ្គលិកគ្មានផលិតភាពប៉ុណ្ណោះ ហើយថា ក្រុមហ៊ុនយកចិត្តទុកដាក់ចំពោះសុខុមាលភាពបុគ្គលិកដោយ​មិនគិតពីឋានៈ និងមិនមានការរើសអើង​ចំពោះ​បុគ្គលិក​​ដែលជាសមាជិកសហជីពជាដើម ប៉ុន្តែការលើកឡើងនេះ ត្រូវបានក្រុមកូដករច្រានចោល និងថា ជារឿងមិនពិត និង​ដើម្បីគេចវេសពីការទទួលខុសត្រូវតែប៉ុណ្ណោះ។

ថ្លៃងក្នុងសន្និសីទសារព័ត៌មាន កូដករណាហ្គាវើលដ៍ម្នាក់ កញ្ញា ជឹម រដ្ឋា មានប្រសាសន៍ថា វិវាទការងារនៅក្រុម​ហ៊ុនណាហ្គាវើលដ៍កើតឡើងដោយសារថៅកែរើសអើងសហជីព។ កញ្ញាបញ្ជាក់​ថា ក្នុងគម្រោងបញ្ឈប់​បុគ្គល១ ៣២៩នាក់ ​ពីសំណាក់​ក្រុម​ហ៊ុន ក្នុងនោះជាង​៨០ភាគរយជាសមាជិក សកម្មជនសហជីព និងថ្នាក់ដឹកនាំសហជីព។

កញ្ញា ជឹម រដ្ឋា បាន​បន្តទៀតថា ការបញ្ឈប់នេះទៀតសោត ធ្វើឡើងទាំងខុសច្បាប់ជាតិ និងច្បាប់អន្តរជាតិ ជាពិសេសស្តីពីការងារត្រង់មាត្រា៩៥ និងអនុសញ្ញាអន្តរជាតិលេខ៨៧ និង៩៨ និង​​ពុំមានការអនុញ្ញាតពីក្រសួង​ការងារដែលកំណត់​ក្នុង​ច្បាប់ស្តីពីការងារត្រង់មាត្រា២៩៣ និង​ច្បាប់សហ​ជីពត្រង់មាត្រា៤៣ និងមាត្រា​៦៧។

កញ្ញា ជឹម រដ្ឋា ដែលពុំមានឈ្មោះបញ្ឈប់ពីការងារ អះអាងថា ការតវ៉ារយៈពេល៤២ថ្ងៃមកនេះ ខាងអាជ្ញាធរ និងភាគីក្រុមហ៊ុន បានព្យាយាមចេញព័ត៌មានមិនពិត បង្ក​ការរំខានផ្សេងៗ និងគំរាមកំហែងមកលើក្រុមកូដករ។

កញ្ញាបន្ថែមថា៖ «មានជនស៊ីវិល គាត់ព្យាយាមឃ្លាំមើលគ្រប់សកម្មភាពរបស់ក្រុមកូដករយើង ហើយមានរូប​ភាព​គំរាមកំហែងផ្សេងៗទៀត ដោយមានការថតរូបក្រុមកូដករ និងជនស្លៀកពាក់ស៊ីវិលខ្លះគាត់ព្យាយាម​មកបង្ក​ចលាចល​បើ​ពាក្យ​សម្តី​អសុរស​ និង​ព្យាយាមរករឿង​យើង​បង្កជាជម្លោះ ហើយយើងចង់បកស្រាយ​បំភ្លឺឱ្យសាធារណជន​ដឹង​ថា ក្រុមហ៊ុន​ណាហ្គាវើលដ៍នេះ អត់​ព្យាយាម​រក​ដំណោះស្រា​យ​ទេ ប៉ុន្តែព្យាយាមបំភ្លៃព័ត៌មានពិតដើម្បីគេចវេសពីការទទួលខុសត្រូវ»

កូដករណាហ្គាវើលដ៍ម្នាក់ទៀត លោក សេង វណ្ណារិទ្ធ ដែលមាន​ឈ្មោះបញ្ឈប់ពីការងារ និងបម្រើការងារនៅ​ក្រុមហ៊ុនល្បែងមួយ​នេះអស់រយៈពេល​២៥ឆ្នាំ និយាយ​ថា ទោះមា​ន​គំរាមកំហែង និងមានការរំលោភផ្សេងៗពីអាជ្ញាធរក៏ដោយ ក៏​ក្រុមកូដករនៅតែរក្សា​ជំហរ និងប្តេជ្ញា​​តវ៉ារហូតមានការដោះលែងតំណាងសហជីពទាំង​៨នាក់ និងមានដំណោះស្រាយលើវិវាទការងារនេះ។

លោក​ថា៖ «ការតស៊ូ​ធ្វើកូដកម្មរបស់​ពួកយើង គឺនៅតែបន្ត ទោះបីជាគ្មានតំណាង​[សហជីព]ក៏ដោយ គឺទាម​ទាររហូត​មានការដោះលែងពួកគាត់​ ដើម្បីឱ្យពួកគាត់បានចូលតុចរចា។ យើងមិនអាច​ទៅរកតំណាង​ណា​ផ្សេង​ពីថ្នាក់​ដឹកនាំយើង​បាន​ទេ ពីព្រោះពួកគាត់ត្រូវបានបោះឆ្នោត និងផ្តល់សិទ្ធិដោយសមាជិកបុគ្គលនៅក្រុមហ៊ុន​ណាហ្គាវើល​ដ៍​ស្រប​តាមច្បាប់នីតិវិធី និងទទួលស្គាល់ក្រសួងការងារផងដែរ»

វីអូឌី មិនអាចសុំការឆ្លើយតំណាងក្រុមហ៊ុណាហ្គាវើលដ៍បាននៅថ្ងៃសុក្រនេះ។

ចំណែក អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ មិនឆ្លើយតបពាក់ព័ន្ធករណីនេះទេ។ យ៉ាងណា លោក​បានប្រាប់វីអូឌីកាលពីថ្ងៃទី២៤ខែ​មករា​ថា ក្រសួងការងារ​ស្វាគមន៍​ក្នុងក្នុង​ការ​​​សម្រប​សម្រួល​ដោះស្រាយបញ្ចប់វិវាទការងារនៅក្រុមហ៊ុនល្បែងមួយនេះ។

លោកបន្ថែមថា៖ «រឿងណាដែលពាក់ព័ន្ធនឹងផលប្រយោជន៍ ដែលត្រូវដោះស្រាយនៅក្រសួង គឺសូមរកមេធាវីដែលយល់អំពីច្បាប់មកជជែកជាមួយក្រសួង។ ក្រសួងបើកទ្វាររងចាំ​ស្វាគមន៍​បង​ប្អូន​ជានិច្ចទោះ​បីជា​ថ្ងៃ​ឈប់​សម្រាក ឬ​បុណ្យទានក៏ដោយ។ ក្រសួងប្តេជ្ញាកា​រពារប្រយោជន៍របស់បងប្អូនដែលមានចែងក្នុង​ច្បាប់​ស្តីពីការងារជានិច្ច»

នាយក​រង​អង្គការ​លីកាដូដែល​ឃ្លាំមើលផ្នែក​សិទ្ធិមនុស្ស លោក អំ សំអាត មានប្រសាសន៍​ថា បញ្ហានៅក្រុមហ៊ុន​ណាហ្គាវើលដ៍ គឺជាវិវាទការងារសុទ្ធសាត។ លោកថា វិវាទការ​ងារដែល​បន្តអូសបន្លាយ ដោយ​មិន​ទាន់​មានដំណោះស្រាយនេះ គឺដោយសារភាគីក្រុមហ៊ុន និងក្រសួងការងារគ្មានឆន្ទៈក្នុងការដោះស្រាយបញ្ចប់​។

លោក​បន្តថា ការធ្វើកូដកម្មរបស់កូដករណាហ្គាវើលដ៍ គឺធ្វើតាមទៅតាមនីតិវិធីច្បាប់ស្តីពីការងារ និងច្បាប់សហជីពត្រឹមត្រូវ។ លោកចាត់ករណីចាប់ឃុំខ្លួនថ្នាក់ដឹកនាំសហជីពជារឿងមិនត្រឹមត្រូវ ខុសច្បាប់ និងបានរំលោភសិទ្ធិមនុស្ស រួមទាំងសិទ្ធិការងារធ្ងន់ធ្ងរ។

លោកបន្ថែមថា៖«ឆន្ទៈនៃការដោះស្រាយវិវាទការងារអត់មាន បែរជាឆន្ទៈនៃការគំរាមកំហែង ការបំភិតបំភ័យ និងការចាប់ខ្លួនតំណាងសហជីពយកទៅចោទប្រកាន់និងឃុំខ្លួនទៅវិញ ដែលខ្ញុំមើលឃើញថា ដំណោះ​ស្រាយ​នេះ​មិន​ងាយ​នឹង​ចប់​ទេ។ ហើយវាក៏បង្ក​ឱ្យមានបញ្ហាកាន់តែរីករាលដាលឡើង។ អីចឹង​ដំណោះ​ស្រាយ​ដែល​ល្អ​ ខ្ញុំគិតថា វិលទៅរកវិវាទការងារវិញទៅ ដោះលែងតំណាងកម្មករ ហើយបន្តចរចាដើម្បីបញ្ចប់វិវាទការងារហ្នឹងទៅ គឺបញ្ហានឹងអាចដោះស្រាយបានឆាប់»

ប្រធានសហព័ន្ធសហជីពកម្ពុជា អ្នកស្រី យ៉ាង សុភ័ណ្ឌ មានប្រសាសន៍ថា ការអូសបន្លាយវិវាទការងារនៅក្រុមហ៊ុនណាហ្គាវើលដ៍ដោយមិនបានដោះស្រាយនេះ នឹងធ្វើឱ្យ​​ប៉ះពាល់ដល់មុខមាត់កម្ពុ​ជា​លើឆាកអន្តរជាតិ​ពាក់ព័ន្ធការំលោភសិទ្ធិ​ការងារ និង​​សិទ្ធិមនុស្ស ខណៈអន្តរជាតិកំពុងបង្ហាញការព្រួយបារម្ភ​អំពី​បញ្ហានេះ និង​ការចាប់ខ្លួនថ្នាក់ដឹកនាំសហជីពទាំង​៨នាក់។

អ្នកស្រីបន្ថែមថា៖ «អីចឹង​វិវាទការងារនៅណាហ្គាវើលដ៍គួរតែបញ្ចប់ទៅអត់ចំណេញទេ វាធ្វើឱ្យប៉ះពាល់ដល់​មុខ​មាត់​កម្ពុជា​ខ្លាំង​មែន​ទែនលើឆាកអន្តរជាតិ។ វិវាទនៅក្រុមហ៊ុនណាហ្គាវើលដ៍នេះពីដំបូងតូចទេ ប៉ុន្តែឥឡូវវារីករាល់ដាលកាន់តែធំ អ្នកណាក៏ដឹងដែររហូតសហគមន៍អុឺរ៉ុប ស្ថានទូតអាមេរិក និងសហគមន៍ផ្សេងៗទៀត គេដឹងទាំងអស់អីចឹង​ខ្ញុំគិតថា កេរ្តិ៍​ឈ្មោះរបស់​កម្ពុជា​នឹង​កាន់​តែ​អាក្រក់​ បើ​មិន​ដោះស្រាយបញ្ហា​នៅណាហ្គាវើលដ៍ឱ្យបានឆាប់»

កាលពីសប្តាហ៍មុន ក្រុមកូដករណាហ្គាវើលដ៍បាន​យកញត្តិទៅដាក់នៅតាមបណ្តាស្ថានទូតប្រទេសលោកសេរី​ចំនួន​១៤​ រួមមាន ស្ថានទូតអាមេរិក​ បារាំង សហភាពអុឺរ៉ុប អង់​គ្លេស អាល្លឺម៉ង់ សិង្ហ​បុរី កាណាដា ជប៉ុន ម៉ាឡេស៊ី អូស្ត្រាលី កូរ៉េខាងត្បូង និងស្ថានទូត​បរទេសប្រចាំនៅកម្ពុជា​​​ផ្សេងទៀត ដើម្បីសុំអន្តរាគមន៍ជំរុញទៅរដ្ឋាភិបាលកម្ពុជាឱ្យដោះលែងតំណាងសហជីព​៨នាក់ និងជំរុញឱ្យមានដំណោះស្រាយវិវាទការងារដល់​ពួកគេផងដែរ។

ក្នុងពិធីមួយកាលពីថ្ងៃទី២៥ខែមករានេះ រដ្ឋមន្ត្រីក្រសួងមហាផ្ទៃ លោក ស ខេង ជំរុញទៅភាគីពាក់ព័ន្ធឱ្យដោះស្រាយបញ្ចប់វិវាទការងារនៅក្រុមហ៊ុនណាហ្គាវើលដ៍ឱ្យបានឆាប់ ដោយលោកចាត់ទុក​ការតវ៉ារបស់បុគ្គលិក​ណាហ្គាវើលដ៍ ដោយ​សារ​វិវាទ​ការងារ។ លោកថា ក្រសួងការងារ និងអាជ្ញាធរពាក់ព័ន្ធ ភាគីក្រុមហ៊ុន រួមទាំងកូដករដែលកំពុងតវ៉ាត្រូវរក្សាភាព​អត់ធ្មត់ និងប្រកាន់ជំហរសម្របសម្រួល ដើម្បីដោះស្រាយវិវាទការងារនេះឱ្យបានឆាប់។

កាលពីថ្ងៃទី១៨ ខែមករា ឆ្នាំ២០២២ សហសហជីពអន្តរជាតិបានផ្ញើលិខិតមួយ​ទៅកាន់លោកនាយករដ្ឋមន្ត្រី ហ៊ុន សែន ដោយលើកឡើងថា វិវាទការងារនៅក្រុមហ៊ុនណាហ្គាវើលដ៍ បានកើតចេញពីការបរាជ័យជាយូរ​ណាស់​មកហើយ​របស់​ភាគី​ក្រុមហ៊ុន​ ក្នុងការគោរពសិទ្ធិកម្មករ និងសហ​ជីព​ ចំពោះកិច្ចចរចា​ដោយស​មូហ​ភាព​ ដើម្បីទទួលបានប្រាក់ឈ្នួល និងលក្ខខណ្ឌការ​ងារ​កាន់​តែល្អ​ប្រសើរ​។

លិខិតនោះបន្តថា ក្រុមហ៊ុនណាហ្គាវើលដ៍ មិនបានគោរពតាមគោលការណ៍របស់រដ្ឋាភិបាល​លើ​​ការ​ងារ សុវត្ថិភាព និងការការពារសុខភាពក្នុងអំឡុងពេលមាន​ជំងឺ​​កូវីដ-១៩នោះទេ។​

ផ្ទុយទៅវិញ​ បុគ្គលិកនិយោជិតចំនួន១ ៣២៩នាក់ត្រូវ​បាន​​បញ្ឈប់​ពី​ការងារ ដោយ​មិន​បានពិគ្រោះ​​យោបល់​ក្រោម​ច្បាប់​ការងារ​កម្ពុជាឡើយ​ ដោយក្នុងចំណោមនោះ មានបុគ្គលិក១ ១០០នាក់ គឺ​ជា​សមាជិក​សហជីព៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ