រដ្ឋមន្ត្រីការបរទេសកម្ពុជា លោក ប្រាក់ សុខុន បានប្រាប់ក្រុមប្រឹក្សាសន្តិសុខអង្គការសហប្រជាជាតិ (អ.ស.ប) កាលពីយប់មិញថា ដំណើរទស្សនកិច្ចរបស់កម្ពុជាទៅកាន់ប្រទេសមីយ៉ាន់ម៉ា គឺដើម្បីទម្លាយភាពជាប់គាំងនៅក្នុងប្រទេសអាស៊ានមួយនេះ។
ការលើកឡើងរបស់ប្រមុខការទូតកម្ពុជាបែបនេះ បានធ្វើឡើងនៅក្នុងកិច្ចប្រជុំចង្អៀតក្រុមប្រឹក្សាសន្តិសុខអង្គការសហប្រជាជាតិ (UNSC) ស្តីពី ស្ថានភាពបច្ចុប្បន្ននៅក្នុងប្រទេសមីយ៉ាន់ម៉ា ដែលប្រព្រឹត្តទៅតាមរយៈវីដេអូ កាលពីវេលាម៉ោង ១០ យប់ ថ្ងៃទី២៨ ខែមករា ឆ្នាំ២០២២។
យោងតាមសេចក្តីប្រកាសព័ត៌មានរបស់ក្រសួងការបរទេសកម្ពុជា ស្តីពី លទ្ធផលនៃកិច្ចប្រជុំនេះ លោក ប្រាក់ សុខុន រដ្ឋមន្ត្រីការបរទេសកម្ពុជា និងក្នុងនាមជាប្រេសិតពិសេសរបស់ប្រធានអាស៊ាន បានប្រាប់លោកស្រី Mona Juul ប្រធានក្រុមប្រឹក្សាសន្តិសុខអង្គការសហប្រជាជាតិសម្រាប់ខែមករានេះថា ដំណើរទស្សនកិច្ចរបស់លោកនាយករដ្ឋមន្ត្រី ហ៊ុន សែន ទៅកាន់ប្រទេសមីយ៉ាន់ម៉ា គឺជាបេសកម្មដើម្បីទម្លុះទម្លាយភាពជាប់គាំងនៅក្នុងប្រទេសនេះ។
លោកថា៖ «ដំណើរទស្សនកិច្ចរបស់នាយករដ្ឋមន្ត្រីខ្ញុំ ទៅកាន់ទីក្រុងណៃពិដោ គឺជាបេសកម្មដើម្បីទម្លុះទម្លាយភាពជាប់គាំង។ ទស្សនកិច្ចនេះ មានគោលបំណងដើម្បីកសាងទំនុកចិត្ត ការជឿជាក់ និងការយោគយល់គ្នា ហើយទស្សនកិច្ចនេះ ពិតជាអាចដើរតួនាទីជាការបោះជំហានដ៏រឹងមាំមួយឆ្ពោះទៅរកវឌ្ឍនភាពបន្ថែមទៀត»។
លោកបន្តថា៖ «សម្តេចតេជោបានទៅទីនោះ គឺដើម្បីដាំដើមឈើ ជាដើមឈើសម្រាប់សន្តិភាព និងការផ្សះផ្សារជាតិ។ វាត្រូវការពេលវេលា ភាពអត់ធ្មត់ និងការអនុវត្តជាក់ស្តែង មុនពេលគេអាចប្រមូលផលពីដើមឈើនោះបាន»។
លោក ប្រាក់ សុខុន ក៏បានប្រាប់កិច្ចប្រជុំក្រុមប្រឹក្សាសន្តិសុខអង្គការសហប្រជាជាតិ ស្តីពីគម្រោងដំណើរទស្សនកិច្ចលើកដំបូងទៅកាន់ប្រទេសមីយ៉ាន់ម៉ារបស់លោកក្នុងនាមជាប្រេសិតពិសេសប្រធានអាស៊ាននៅពេលខាងមុខនេះ។
លោកថា ដំណើរទស្សនកិច្ចនេះ លោកនឹងលើកឡើងជាអាទិភាពក្នុងការជម្រុញការអនុវត្តកិច្ចព្រមព្រៀងជាឯកច្ឆន្ទ ៥ ចំណុច ហើយដែលនឹងត្រូវលើកយកទៅពិភាក្សាក្នុងអំឡុងពេលកិច្ចប្រជុំចង្អៀតរដ្ឋមន្ត្រីការបរទេសអាស៊ាន ដែលគ្រោងបើកធ្វើឡើងវិញនៅថ្ងៃទី១៦-១៧ ខែកុម្ភៈខាងមុខនេះ។
គួរជម្រាបជូនថា លោកនាយករដ្ឋមន្ត្រី ហ៊ុន សែន បានជំនះដឹកនាំគណៈប្រតិភូកម្ពុជាទៅធ្វើទស្សនកិច្ចជាលើកដំបូងនៅប្រទេសមីយ៉ាន់ម៉ា កាលពីថ្ងៃទី៧-៨ ខែមករា ឆ្នាំ២០២២ ដើម្បីជួបមេដឹកនាំរដ្ឋប្រហារយោធាភូមា បើទោះបីជាមានការរិះគន់ក្តី។ នៅក្នុងដំណើរទស្សនកិច្ចនោះ លោកនាយករដ្ឋមន្ត្រី ហ៊ុន សែន បានចាត់ទុកថា ជាជោគជ័យមួយ បន្ទាប់ពីមេដឹកនាំយោធាភូមា លោក មីន អ៊ុងលាំង បានសន្យាពន្យារពេលបទឈប់បាញ់រហូតដល់ចុងឆ្នាំ២០២២ និងបើកឱ្យមានដំណើរទស្សនកិច្ចរបស់ប្រេសិតពិសេសរបស់ប្រធានអាស៊ានទៅធ្វើទស្សនកិច្ចនៅភូមាផងដែរ។ ក៏ប៉ុន្តែ មិនបានប៉ុន្មានថ្ងៃក្រោយពីដំណើរទស្សនកិច្ចនេះផង មានសេចក្តីរាយការណ៍ថា របបសឹកភូមាបានបន្តបាញ់ផ្លោងទៅលើភូមិឋានអ្នកស្រុក ថែមទាំងបានកាត់ទោសមេដឹកនាំជាប់ឆ្នោត លោកស្រី អ៊ុង សានស៊ូជី ឱ្យជាប់ពន្ធនាគារជាច្រើនឆ្នាំបន្ថែមទៀត។
ទោះមានការរិះគន់ជុំទិសក្តី ប្រមុខការទូតកម្ពុជា លោក ប្រាក់ សុខុន បានគូសបញ្ជាក់ប្រាប់សមាជិកក្រុមប្រឹក្សាសន្តិសុខអង្គការសហប្រជាជាតិកាលពីយប់មិញថា គ្រប់សកម្មភាពរបស់កម្ពុជាធ្វើ គឺផ្អែកលើស្មារតីនៃកិច្ចព្រមព្រៀងជាឯកច្ឆន្ទ ៥ ចំណុចរបស់អាស៊ាន និងស្របតាមធម្មនុញ្ញរបស់អាស៊ានទាំងអស់៕