តុលាការខេត្តព្រះវិហារ បានកោះហៅសកម្មជនព្រៃឈើម្នាក់ឱ្យចូលបំភ្លឺពាក់ព័ន្ធបទញុះញង់ នៅចុងខែនេះ ក្រោយរងបណ្ដឹង ខណៈសកម្មជនរូបនោះសកម្មក្នុងការកៀរគរប្រជាពលរដ្ឋចុះល្បាតនិងទប់ស្កាត់បទល្មើសព្រៃឈើក្នុងសហគមន៍។
ចៅក្រមស៊ើបសួរ នៃសាលាដំបូងខេត្តព្រះវិហារ លោក ផេង កុសល បានចេញដីកាបង្គាប់ឱ្យលោក ហែត ណៃ ជាតំណាងបណ្ដាញសហគមន៍ព្រៃឈើព្រៃព្រះរការ ខេត្តព្រះវិហារ ចូលទៅសាលាដំបូងខេត្ត នៅថ្ងៃទី២៣ ខែកុម្ភៈនេះ ដើម្បីសួរចម្លើយពាក់ព័ន្ធនឹងបទចោទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍» ដែលបានរងបណ្ដឹងតាំងពីឆ្នាំ២០២០។
តំណាងបណ្ដាញសហគមន៍ព្រៃឈើព្រៃព្រះរការ លោក ហែត ណៃ ប្រាប់ វីអូឌី នៅថ្ងៃអង្គារនេះថា លោកបានត្រៀមខ្លួនដើម្បីចូលទៅបំភ្លឺតាមការកោះហៅរបស់តុលាការរួចហើយ បើទោះជាលោកពុំបានស្គាល់អត្តសញ្ញាណដើមបណ្ដឹងក៏ដោយ។ ទោះយ៉ាងណា លោកថា លោកមិនបានប្រព្រឹត្តកំហុសដូចការចោទប្រកាន់ឡើយ។
លោក ហែត ណៃ អះអាងថា ករណីរូបលោកជាប់បណ្ដឹងនៅតុលាការនេះ ក្រោយពីលោកសកម្មក្នុងការកៀរគរប្រជាពលរដ្ឋក្នុងសហគមន៍ រួមទាំងព្រះសង្ឃផង ឱ្យចុះល្បាតនិងទប់ស្កាត់បទល្មើសព្រៃឈើសហគមន៍ក្នុងដែនព្រៃព្រះរការកន្លងមក។
សកម្មជនព្រៃឈើរូបនេះបានអំពាវនាវដល់តុលាការឱ្យទម្លាក់ចោលការចោទប្រកាន់ និងកុំចាត់ការលើបណ្ដឹងប្រឆាំងរូបគាត់តទៅទៀត ដោយថា អ្វីដែលគាត់ធ្វើនោះគឺដើម្បីការពារព្រៃឈើតែប៉ុណ្ណោះ។
លោកបន្ថែមថា៖ «ការចោទប្រកាន់ខ្ញុំនេះ គឺដោយសារមានអ្នកស្អប់ពួកយើង។ ស្អប់ពួកយើងខាងអ្នកការពារព្រៃឈើ ដែលយើងបានរារាំងមិនឱ្យគេកាប់ឈើ មិនឱ្យគេអារឈើ។ អ្នកបំផ្លាញព្រៃឈើហ្នឹង គេមានគ្នាច្រើន គេបក្ខពួកច្រើន គេបានរកវិធីណាដើម្បីបង្អាក់ឬរារាំងពួកខ្ញុំហ្នឹងចូលការពារព្រៃ និងការពារដើមឈើចំបក់ខ្លួនឯងជាដើមហ្នឹង»។
សកម្មជនព្រៃឈើរូបនេះបន្ថែមថា កាលពីអំឡុងឆ្នាំ២០២០ រូបលោកតែងតែចុះផ្សព្វផ្សាយដល់ប្រជាពលរដ្ឋនៅក្នុងសហគមន៍ឱ្យយល់ដឹងពីសារៈប្រយោជន៍ព្រៃឈើ និងកៀរគរឱ្យពួកគេចូលរួមចុះល្បាតនិងទប់ស្កាត់បទល្មើសនានានៅក្នុងព្រៃព្រះរការ។ លោកថា អាជ្ញាធរពាក់ព័ន្ធនៅឃុំនិងស្រុកមិនពេញចិត្តនឹងសកម្មភាពរបស់លោកនេះទេ ហើយតែងតែរារាំងមិនឱ្យពួកគាត់ជួបប្រជុំពិភាក្សាការងាររឿងព្រៃឈើនោះដែរ។
ជាជនជាតិដើមភាគតិចកួយ និងជាសមាជិកសហគន៍ព្រៃព្រះរការ នៅស្រុកឆែប លោក ពាន សុផាត និយាយថា ការដែលតុលាការកោះហៅលោក ហែត ណៃ ឱ្យឆ្លើយបំភ្លឺនេះ ជារឿងមិនត្រឹមត្រូវ និងអយុត្តិធម៌។ លោកចាត់ទុកករណីនេះថា ជាការគំរាមកំហែងបំបាក់ស្មារតីមិនឱ្យប្រជាសហគមន៍ហ៊ានចេញចុះល្បាតនិងការពារព្រៃឈើទៀតតែប៉ុណ្ណោះ ខណៈបទល្មើសក្នុងព្រៃព្រះរការនៅតែបន្តកើតមាន។
លោកអះអាងថា លោក ហែត ណៃ ជាមនុស្សដែលស្រឡាញ់ព្រៃឈើនិងធនធានធម្មជាតិ ហើយរូបលោកតែងតែចូលរួមធ្វើសកម្មភាពចុះល្បាតនិងការពារព្រៃឈើជាមួយគ្នា។
លោកបន្ថែមថា៖ «វាអយុត្តិធម៌ណាស់ចំពោះការចោទប្រកាន់គាត់ហ្នឹង វាមិនសមទេ ពីព្រោះគាត់មិនបានធ្វើអីខុសទេ។ គាត់មិនបានញុះញង់អីទេ គាត់គ្រាន់តែសម្របសម្រួលឱ្យមានការចូលរួមការពារព្រៃឈើ ដើម្បីការពារធម្មជាតិដែលជាផលប្រយោជន៍ទាំងអស់គ្នា»។
អភិបាលស្រុកឆែប លោក សុខ សាន្តតារ៉ា មានប្រសាសន៍ថា លោកបានស្គាល់លោក ហែត ណៃ ប៉ុន្តែលោកមិនបានដឹងថា លោក ហែត ណៃ ជាប់បណ្ដឹង ឬត្រូវតុលាការកោះហៅនោះទេ។ អភិបាលស្រុករូបនេះអះអាងថា កន្លងមក សកម្មជនព្រៃឈើរូបនេះចូលចិត្តធ្វើអ្វីមួយនៅក្នុងសហគមន៍ ដោយមិនគោរពនិងសហការជាមួយអាជ្ញាធរមូលដ្ឋានឡើយ ទាំងការចូលល្បាតព្រៃ និងការទាមទារដីសហគមន៍ពីក្រុមហ៊ុនចិននៅតំបន់ពួកគេ។
លោកបន្ថែមថា៖ «តាណៃហ្នឹង មាននិន្នាការមួយ គាត់ចាត់ទុកព្រៃព្រះរការហ្នឹងជាព្រៃរបស់គាត់ ដោយគ្មានក្រសួងណាទទួលស្គាល់ទេ។ ដីសហគមន៍ក៏ដូចជាដីក្រុមហ៊ុនសម្បទានសេដ្ឋកិច្ចនៅក្នុងតំបន់ហ្នឹង គាត់តែងតែទាមទារថាដីគាត់។ គាត់ធ្វើការអីអត់សហការជាមួយអាជ្ញាធរភូមិឃុំស្រុកខេត្តទេ។ គាត់ដូចថាមានគំនិតផ្សេងពីយើង»។
មន្រ្តីសម្របសម្រួលសមាគមការពារសិទ្ធិមនុស្សអាហុកប្រចាំខេត្តព្រះវិហារ លោក ឡោ ចាន់ មានប្រសាសន៍ថា ករណីលោក ហែត ណៃ ជាប់បណ្ដឹងនៅតុលាការនេះ គឺជាចេតនាគំរាមកំហែងនិងបំបាក់ស្មារតីទៅលើសកម្មជនព្រៃឈើនិងសិទ្ធិមនុស្ស។
មន្ត្រីសិទ្ធិមនុស្សរូបនេះមើលឃើញថា កន្លងមក លោក ហែត ណៃ មានភាពសកម្មក្នុងកិច្ចការការពារព្រៃឈើ និងតស៊ូមតិដើម្បីការពារសិទ្ធិមនុស្ស ហើយលោកក៏ធ្លាប់បានចូលរួមតស៊ូមតិទាមទារឱ្យមានការដោះលែងលោក រ៉ុង ឈុន និងសកម្មជនសង្គមផ្សេងៗទៀតផងដែរ។
លោកបន្ថែមថា៖ «នៅពេលសាកសួរហើយ តុលាការគួរណាពិចារណាឱ្យបានម៉ត់ចត់ថា ឥលូវគាត់ត្រូវបានចៅក្រមស៊ើបសួរចោទប្រកាន់ពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍។ អ៊ីចឹងទាល់តែរកឱ្យឃើញថា អ្នកណាខ្លះដែលគាត់បានទៅញុះញង់? តើបទល្មើសដែលកើតឡើងហ្នឹង តើវាស្ដែងឡើងនៅបទល្មើសណាមួយនៅ? ផ្លូវច្បាប់ វាទាល់តែមានបទល្មើស! ហើយបើសិនអត់ទាន់មានបទល្មើសផង ឱ្យគាត់ទៅញុះញង់យ៉ាងម៉េច»។
បើតាមលោក ឡោ ចាន់ ករណីលោក ហែត ណៃ ជាប់បណ្ដឹងនៅតុលាការនេះមានភាពមិនប្រក្រតីច្រើន ដោយលោកថា កាលពីសំណុំរឿងស្ថិតក្នុងដៃអយ្យការ គឺដីកាបានចោទគាត់ប្រកាន់ពីបទ «ឆបោក» ប៉ុន្តែពេលដំណាក់កាលចៅក្រមស៊ើប បែរជាប្ដូរបទចោទមកបទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍»ទៅវិញ៕
