កម្ពុជាបានបន្តបញ្ជូនកងទ័ពមួកខៀវប្ដូរវេនកងវិស្វកម្មពហុជំនាញលេខ៨២៩ ចំនួន១៨៤នាក់ ទៅបំពេញបេសកកម្មក្រោមឆ័ត្ររបស់អង្គការសហប្រជាជាតិនៅប្រទេសលីបង់ ក្នុងនោះមានស្ត្រីចំនួន២៩នាក់។
ពួកគេបានចាកចេញពីព្រលានយន្តហោះអន្តរជាតិភ្នំពេញ ច្រកVIP នៅព្រឹកមិញនេះ ដើម្បីជំនួសកងទី១១ដែលនឹងត្រូវធ្វើមាតុភូមិនិវត្តន៍។
គិតចាប់តាំងពីឆ្នាំ២០០៦ រហូតមកដល់ពេលនេះ កម្ពុជាបានបញ្ជូនកងកម្លាំងរក្សាសន្តិភាពជាង៧ពាន់នាក់ទៅបំពេញបេសកកម្មមនុស្សធម៌ជាមួយអង្គការសហប្រជាជាតិ នៅក្នុងប្រទេសចំនួន៩ រួមមាន៖ ស៊ូដង់ ស៊ូដង់ខាងត្បូង, ឆាដ, លីបង់, ស៊ីរី, ម៉ាលី, អាហ្វ្រិកកណ្ដាល សាយប្រឺស និងយ៉េមែន ជាដើម។ បច្ចុប្បន្ន កម្ពុជាមានកម្លាំងកងទ័ពមួកខៀវជិត៨០០នាក់ ក្នុងនោះមាននារីជិត៨០នាក់ បាននិងកំពុងបំពេញបេសកកម្មរក្សាសន្តិភាពក្រោមឆ័ត្រអង្គការសហប្រជាជាតិ នៅប្រទេសលីបង់ ស៊ូដង់ ស៊ូដង់ខាងត្បូង ម៉ាលី និងសាធារណរដ្ឋអាហ្វ្រិកកណ្ដាល៕