គណៈរដ្ឋមន្រ្តី នៅព្រឹកមិញនេះ បានអនុម័តទាំងស្រុងលើសេចក្ដីព្រាងច្បាប់ស្ដីពី «ការការពាររុក្ខជាតិ និងភូតគាមអនាម័យ» បន្ទាប់ពីបើកកិច្ចពិភាក្សាដែលមានការចូលរួមពីលោកនាយករដ្ឋមន្ត្រី ហ៊ុន សែន ផងដែរ។
ប្រធានក្រុមអ្នកនាំពាក្យអង្គភាពរដ្ឋាភិបាល លោក ផៃ ស៊ីផាន បានសរសេរនៅលើទំព័រហ្វេសប៊ុករបស់លោកថា គោលបំណងនៃការបង្កើតសេចក្ដីព្រាងច្បាប់នេះ គឺដើម្បីកំណត់អំពីការគ្រប់គ្រងសុខភាពរុក្ខជាតិ ការអនុវត្តវិធានការការពាររុក្ខជាតិ និងវិធានការភូតគាមអនាម័យ ការពារធនធានរុក្ខជាតិគ្រប់ប្រភេទ ការទប់ស្កាត់ការបង្ក ការរាលដាលឆ្លង និងការរាតត្បាតពីសំណាក់សមាសភាពចង្រៃ ការលើកកម្ពស់ផលិតភាពកសិកម្ម សន្តិសុខស្បៀងអនាម័យគុណភាព និងសុវត្ថិភាពផលិតផលកសិកម្ម ជាដើម។
បើតាមប្រភពដដែលថា៖ «សេចក្ដីព្រាងច្បាប់នេះនឹងរួមចំណែកផ្ដល់នូវសារៈប្រយោជន៍ក្នុងការអភិវឌ្ឍវិស័យកសិកម្មកម្ពុជា ដូចជា ការពារផលប្រយោជន៍របស់ប្រជាកសិករ គាំទ្រគោលនយោបាយ និងយុទ្ធសាស្រ្តជំរុញផលិតកម្មកសិកម្ម ពិពិធភាវូបនីយកម្ម និងពាណិជ្ជូបនីយកម្មកសិកម្ម ដើម្បីរួមចំណែកជំរុញកំណើនសេដ្ឋកិច្ច ជួយកាត់បន្ថយភាពក្រីក្រ និងលើកកម្ពស់ជីវភាពប្រជាកសិករ»។
សេចក្ដីព្រាងច្បាប់នេះត្រូវបានរៀបចំឡើងដោយក្រសួងកសិកម្ម រុក្ខាប្រមាញ់ និងនេសាទ ដោយផ្អែកលើគោលនយោបាយនិងយុទ្ធសាស្រ្តរបស់រដ្ឋាភិបាល និងអនុលោមតាមមូលដ្ឋានគតិយុត្តពាក់ព័ន្ធជាធរមានរបស់កម្ពុជា ព្រមទាំងកិច្ចព្រមព្រៀងនិងអនុសញ្ញាក្នុងតំបន់និងអន្តរជាតិ ស្ដីពី «ការការពាររុក្ខជាតិ និងភូតគាមអនាម័យ»។
បើតាមលោក ផៃ ស៊ីផាន សេចក្ដីព្រាងច្បាប់នេះ គឺដើម្បីឆ្លើយតបទៅនឹងនិន្នាការរីកចម្រើនរបស់វិស័យកសិកម្មក្នុងក្របខណ្ឌសុវត្ថិភាពស្បៀង ការលើកកម្ពស់គុណភាពផលិតផលកសិកម្ម ការបង្កើនការនាំចេញកសិផល និងធានាចីរភាពអភិវឌ្ឍន៍ក្នុងបរិការណ៍សមាហរណកម្មសេដ្ឋកិច្ចពិភពលោកប្រកបដោយការប្រកួតប្រជែងដ៏ស្រួចស្រាវ៕