គ្រោះអគ្គិភ័យក្នុងអំឡុងបុណ្យចូលឆ្នាំប្រពៃណីចិន-វៀតណាម ក្នុងរយៈពេល៤ថ្ងៃមកនេះ បានកើតឡើងចំនួន១១លើក ដែលចំនួននេះមានការថយចុះ៣ករណី បើធៀបនឹងអំឡុងពេលដូចគ្នាកាលពីឆ្នាំមុន។
យោងតាមរបាយកាណ៍របស់នាយកដ្ឋាននគរបាលបង្ការពន្លត់អគ្គិភ័យនិងសង្គ្រោះនៃអគ្គស្នងការដ្ឋាននគរបាលជាតិ ដែលផ្សព្វផ្សាយនៅថ្ងៃសុក្រនេះ ឱ្យដឹងថា គ្រោះអគ្គិភ័យទូទាំងប្រទេសក្នុងឱកាសបុណ្យចូលឆ្នាំចិន-វៀតណាម ចាប់ពីថ្ងៃទី៣១ ខែមករា ដល់ថ្ងៃទី៣ ខែកុម្ភៈ បានកើតឡើង១១លើក ថយចុះ៣ករណីបើធៀបនឹងឆ្នាំមុន។
របាយការណ៍ដដែលបន្តថា គ្រោះអគ្គិភ័យទាំងនោះបានបណ្ដាលឱ្យខូចខាតផ្ទះ៨ខ្នង បន្ទប់១ តូបលក់ដូរ១៧តូប រថយន្ត១គ្រឿង ហើយមូលហេតុបង្កឡើងដោយសារឆ្លងចរន្តអគ្គិសនី ភ្លើងចង្ក្រាន ផ្ទុះកំប៉ុងហ្គាស ភ្លើងព្រៃរាលឆេះ និងក្ដាប់មិនបានមូលហេតុ។
ទោះយ៉ាងណា របាយការណ៍នេះបញ្ជាក់ថា មិនមានអ្នកស្លាប់នៅក្នុងគ្រោះអគ្គិភ័យទាំងនោះទេ៕
