ភរិយាសកម្មជនគណបក្សសង្គ្រោះជាតិដែលត្រូវបានតុលាការរំលាយ ឬ «ក្រុមស្ត្រីថ្ងៃសុក្រ» ជាង១០នាក់ បាននាំគ្នាដាក់ញត្តិនៅស្ថានទូតបារាំង និងសហភាពអឺរ៉ុប ដើម្បីស្នើដល់ប្រទេសទាំងនោះជួយអន្តរាគមន៍ទៅរដ្ឋាភិបាលកម្ពុជា អនុញ្ញាតឱ្យក្រុមគ្រូពេទ្យអង្គការលីកាដូអាចចូលពិនិត្យនិងព្យាបាលជំងឺអ្នកជាប់ឃុំនៅក្នុងពន្ធនាគារឡើងវិញ។
ការស្នើនេះធ្វើឡើងបន្ទាប់ពីអគ្គនាយកដ្ឋានពន្ធនាគារនៃក្រសួងមហាផ្ទៃ មិនអនុញ្ញាតឱ្យក្រុមគ្រូពេទ្យអង្គការលីកាដូចូលពិនិត្យនិងព្យាបាលអ្នកជាប់ឃុំ ចាប់តាំងពីមានករណីឆ្លងរាលដាលជំងឺកូវីដ-១៩។
ភរិយាលោក ស៊ុន ធន់ អតីតមន្ត្រីគណបក្សសង្គ្រោះជាតិដែលត្រូវបានតុលាការរំលាយ គឺអ្នកស្រី សេង ចាន់ថន មានប្រសាសន៍ថា ការដែលពួកគាត់នាំគ្នាស្លៀកពាក់ឯកសណ្ឋានគ្រូពេទ្យទៅដាក់ញត្តិនៅស្ថាប័នទាំង២ នៅថ្ងៃសុក្រនេះ គឺធ្វើឡើងក្នុងគោលបំណងចង់បង្ហាញទៅរដ្ឋាភិបាលថា គ្រួសារពួកគាត់ដែលកំពុងជាប់ពន្ធនាគារ និងអ្នកជាប់ឃុំផ្សេងៗទៀត ត្រូវការគ្រូពេទ្យ។
អ្នកស្រីបន្តថា ស្វាមីរបស់ពួកគាត់ដែលជាប់ពន្ធនាគារជិត២ឆ្នាំមកនេះសុទ្ធតែមានជំងឺប្រចាំកាយ ត្រូវការគ្រូពេទ្យដើម្បីពិនិត្យនិងព្យាបាល ខណៈគ្រូពេទ្យនៅក្នុងពន្ធនាគារមិនមានថ្នាំនិងឧកបករណ៍គ្រប់គ្រាន់ក្នុងការពិនិត្យព្យាបាលឡើយ។
លោកថា៖ «ពួកគាត់នៅក្នុងនោះមានជំងឺខ្លះឡើងឈាម ខ្លះឈឺដៃ ឈឺជើង ខ្លះបេះដូង និយាយទៅសុខភាពពួកគាត់ខ្សោយមែនទែន ហើយជួបបញ្ហាឈឺទៀត។ អ៊ីចឹងចង់ឱ្យមានពេទ្យទៅព្យាបាលគាត់ ព្រោះមួយរយៈចុងក្រោយនេះ ពេទ្យលីកាដូចូលអត់បានទេ គេឃាត់គាត់ ព្រោះគាត់តេមកក្រុមគ្រួសារ ឈឺនេះ ឈឺនោះ អត់មានថ្នាំពេទ្យអ៊ីចឹង។ មួយទៀតចង់ឱ្យដោះលែងឱ្យគាត់បាននៅក្រៅឃុំ»។
ចំណែកភរិយាលោក កាក់ កុម្ភារ ជាអតីតក្រុមប្រឹក្សារាជធានីភ្នំពេញមកពីគណបក្សសង្គ្រោះជាតិដែលត្រូវតុលាការរំលាយ គឺអ្នកស្រី ព្រុំ ចាន់ថា មានប្រសាសន៍ថា សមត្ថកិច្ចបានចាប់ស្វាមីពួកគាត់ដាក់ពន្ធនាគារទាំងគ្មានកំហុសហើយ បែរជាបិទមិនឱ្យគ្រូពេទ្យចូលទៅពិនិត្យនិងព្យាបាលថែមទៀត។ អ្នកស្រីថា គ្រួសាររបស់គាត់ដែលកំពុងជាប់ពន្ធនាគារបានត្អូញត្អែរប្រាប់ពួកគាត់ពីបញ្ហាសុខភាព និងគ្មានគ្រូពេទ្យពិនិត្យ ខណៈពេលឈឺ គ្រូពេទ្យក្នុងពន្ធនាគារឱ្យតែថ្នាំប៉ារ៉ាដល់ពួកគាត់។
អ្នកស្រី ព្រុំ ចាន់ថា បន្តទៀតថា បច្ចុប្បន្ន ពួកគាត់បារម្ភពីសុខភាពរបស់គ្រួសារ ដោយសារនៅក្នុងពន្ធនាគារមានភាពចង្អៀតណែន គ្មានអនាម័យ ហើយទឹកប្រើប្រាស់ក៏មិនគ្រប់គ្រាន់ ខណៈគ្រួសាររបស់ពួកគាត់ទាំងអស់មានវ័យចំណាស់និងមានជំងឺប្រចាំកាយជាដើម។
អ្នកស្រីថា៖ «សំខាន់គាត់មិនយកចិត្តទុកដាក់តែម្ដង ឈឺអីក៏ប៉ារ៉ាៗ ជួនណាគាត់សន្លប់ គាត់មានបញ្ហាសុខភាព អត់មានអីត្រូវព្យាបាលបានទេ។ ហើយគាត់ទាល់តែដាក់សំណើដាក់ពាក្យដើម្បីទៅពេទ្យ មិនងាយយកទៅពេទ្យតែម្ដង មន្ត្រីពន្ធនាគារមិនយកចិត្តទុកតែម្ដង។ គាត់ហាក់បីដូចជាយកមនុស្សទៅដាក់ចោលតែម្ដង ដើម្បីធ្វើបាបលើរាយកាយតែម្ដង និងយកទៅគាបសង្កត់តែម្ដង»។
ក្នុងចំណោមស្ត្រីជាង១០នាក់ដែលទៅដាក់ញត្តិនៅថ្ងៃនេះ មានស្ត្រី៣នាក់ត្រូវបានអនុញ្ញាតឱ្យចូលទៅដាក់ញត្តិនិងជួបតំណាងស្ថានទូត។
អ្នកស្រី សេង ចាន់ថន ដែលបានចូលទៅដាក់ញត្តិនោះ អះអាងថា មន្ត្រីរបស់ស្ថានទូតសន្យានឹងយកសំណើរបស់ពួកគាត់ទៅជជែកជាមួយភាគីរដ្ឋាភិបាល។
យ៉ាងណា ការដាក់ញត្តិនេះក៏មានការរុញច្រានគ្នារវាងក្រុមស្ត្រីថ្ងៃសុក្រនិងអាជ្ញាធរប្រមាណ៥០នាក់ផងដែរ ខណៈអាជ្ញាធរមិនឱ្យពួកគេលើកបដាដោយភ្ជាប់ពាក្យ «យុត្តិធម៌ត្រូវតែមានដល់អ្នកស្នេហាជាតិដាច់ខាត» ក្រោមហេតុផលថា «ពួកគាត់មិនបានសុំច្បាប់អនុញ្ញាត»។
អ្នកនាំពាក្យអគ្គនាយកដ្ឋានពន្ធនាគារ នៃក្រសួងមហាផ្ទៃ លោក នុត សវនា ចាត់ទុកការរកកិច្ចអន្តរាគមន៍ពីស្ថានទូតផ្សេងៗនេះ ថាជាការដាក់សម្ពាធមកលើរដ្ឋាភិបាលនិងតុលាការ ខណៈសុខភាពគ្រួសាររបស់ពួកគាត់ដែលកំពុងនៅពន្ធនាគារនោះធម្មតា។ ផ្ទុយទៅវិញ លោកថា បច្ចុប្បន្ន ខាងមន្ត្រីពន្ធនាគារបានយកចិត្តទុកដាក់ចំពោះអ្នកជាប់ឃុំ ដោយបានដាក់ប៉ុស្តិ៍សុខភាពនិងមានគ្រូពេទ្យជាប្រចាំនៅទីនោះ។
លោកថា៖ «ការយកចិត្តទុកដាក់ហ្នឹង វាលើសពីប្រជាជននៅខាងក្រៅផង ខ្ញុំមិនមែននិយាយដើម្បីសម្រាលបន្ទុកឬអួតពីមន្ត្រីខ្ញុំទេ។ តែខ្ញុំឃើញជាក់ស្ដែង ពិបាកមែន! ហើយបើគាត់ទាមទារៗ គឺឱ្យពេទ្យនៅខាងក្រៅទៅព្យាបាលអីណាណី ទាំងដែលមនុស្សមិនទាំងឈឺផង ហើយយកលេសហ្នឹងជាហេតុផល ដើម្បីដាក់សម្ពាធឱ្យដោះលែងជនជាប់ឃុំ អាហ្នឹងខ្ញុំគិតថា វាជារឿងមួយដែលត្រូវពិចារណាដែរ ថាគាត់មានចេតនាយ៉ាងម៉េច»។
នាយករងអង្គការការពារសិទ្ធិមនុស្សលីកាដូ លោក អំ សំអាត យល់ថា ការស្វែងរកកិច្ចអន្តរាគមន៍របស់ក្រុមស្ត្រីថ្ងៃសុក្រ អាចបណ្ដាលមកពីពួកគាត់បារម្ភ ខណៈគ្រួសារពួកគាត់កំពុងជាប់ពន្ធនាគារ។ លោកបន្តថា ក្រុមគ្រូពេទ្យអង្គការលីកាដូបានចូលព្យាបាលអ្នកជំងឺនៅក្នុងពន្ធនាគារមួយចំនួនហើយ។
លោកថា៖ «ប៉ុន្តែទោះជាយ៉ាងណា យើងកំពុងធ្វើកិច្ចសហការជាមួយអគ្គនាយកដ្ឋានពន្ធនាគារ នៃក្រសួងមហាផ្ទៃ ដើម្បីឱ្យក្រុមគ្រូពេទ្យយើងអាចដំណើរការគ្រប់ពន្ធនាគារទាំង១១ ដែលក្រុមគ្រូពេទ្យលីកាដូយើងបានសហការក្នុងការព្យាបាលសម្រាប់ជនជាប់ឃុំ។ អានេះវាជាប្រយោជន៍សុខភាពសម្រាប់អ្នកជាប់ឃុំ អានេះវាជាការរួមចំណែកជាមួយរាជរដ្ឋាភិបាល ក៏ដូចជាអគ្គនាយកដ្ឋានពន្ធនាគារ»។
កាលពីពេលកន្លងមក ក្រុមស្ត្រីថ្ងៃសុក្រ ក៏នាំគ្នារកកិច្ចអន្តរាគមន៍ពីប្រទេសលោកសេរីមួយចំនួនប្រចាំកម្ពុជា ឱ្យជួយជំរុញទៅរដ្ឋាភិបាលនិងតុលាការទម្លាក់ចោលបទចោទប្រកាន់ទាំងអស់ និងដោះលែងគ្រួសាររបស់ពួកគេឱ្យមានសេរីភាពវិញ។
សកម្មជនគណបក្សសង្គ្រោះជាតិដែលត្រូវតុលាការរំលាយកាលពីឆ្នាំ២០១៧ ត្រូវបានចៅក្រមសាលាដំបូងរាជធានីភ្នំពេញចោទប្រកាន់ពីបទ «ញុះញង់ និងរួមគំនិតក្បត់» ពាក់ព័ន្ធនឹងការគាំទ្រដំណើរវិលត្រលប់របស់លោក សម រង្ស៊ី និងមន្ត្រីបក្សប្រឆាំងផ្សេងទៀត៕