ក្រសួងសុខាភិបាលឱ្យដឹងថា កម្ពុជាបន្តរកឃើញអ្នកឆ្លងជំងឺកូវីដ-១៩ បំប្លែងថ្មី ប្រភេទ «អូមីក្រុង» ចំនួន ១១២នាក់ ក្នុងនោះករណីឆ្លងចូលសហគមន៍ចំនួន៨៧នាក់ ខណៈអ្នកស្លាប់ដោយសារជំងឺនេះមិនមានទេ។
សេចក្ដីប្រកាសព័ត៌មានរបស់ក្រសួងសុខាភិបាល នៅថ្ងៃទី០៥ ខែកុម្ភៈ ឆ្នាំ២០២២ បានឱ្យដឹងថា យោងតាមលទ្ធផលបញ្ជាក់ដោយ PCR test កាលពីម្សិលមិញ ក្រសួងបានរកឃើញអ្នកឆ្លងជំងឺកូវីដ-១៩ ប្រភេទអូមីក្រុងចំនួន១១២នាក់ ក្នុងនោះ មានករណីនាំចូល ២៥ នាក់ និងឆ្លងចូលសហគមន៍៨៧នាក់។
ជាងនេះទៀត ក្រសួងថា កាលពីម្សិលមិញនេះ ក៏មានជំងឺកូវីដ-១៩ ចំនួន ១០៥នាក់បានជាសះស្បើយ ខណៈអ្នកស្លាប់ដោយសារ ជំងឺនេះ មិនមានឡើយ។
គិតត្រឹមថ្ងៃទី៥ ខែកុម្ភៈ ឆ្នាំ២០២២ ក្រសួងសុខាភិបាលបានរកឃើញអ្នកឆ្លងជំងឺកូវីដ-១៩ សរុប១២១ ៦៦២នាក់ ក្នុងនោះ ករណីនាំចូលសរុប២០ ៣៨៥ នាក់ ខណៈអ្នកជាសះស្បើយសរុប១១៨ ០២៣នាក់ និងជំងឺដែលស្លាប់សរុប ៣០១៥នាក់។ ក្រសួងបញ្ជាក់ថា គិតត្រឹមថ្ងៃនេះ ជំងឺកូវីដ-១៩ អូមីក្រុងឆ្លងចូលសហគមន៍ សរុប៦៩៣ នាក់ហើយ។
ប្រមុខរដ្ឋាភិបាលកម្ពុជា កាលពីថ្ងៃម្សិលមិញ បានប្ដេជ្ញាចិត្តថា នឹងខិតខំបញ្ចៀសមិនឱ្យមានករណីប្រជាជនស្លាប់ដោយសារជំងឺកូវីដ-១៩ ជាបន្តទៀតទេ និងដោយធានាថា កម្ពុជាមិនខ្វះវ៉ាក់សាំងសម្រាប់ចាក់ជូនប្រជាពលរដ្ឋនៅពេលដែលបញ្ហាជំងឺកូវីដ-១៩ មិនទាន់ចប់នៅឡើយ។
យោងតាមសេចក្ដីប្រកាសព័ត៌មានរបស់រដ្ឋាភិបាលកម្ពុជា ស្ដីពី «លទ្ធផលនៃកិច្ចប្រជុំគណៈរដ្ឋមន្ត្រី» នៅថ្ងៃទី៤ ខែកុម្ភៈនេះ បានឱ្យដឹងថា ក្នុងកិច្ចប្រជុំនោះ លោកនាយករដ្ឋមន្ត្រី ហ៊ុន សែន ក៏បានជំរុញឱ្យក្រសួងសុខាភិបាល និងភាគីពាក់ព័ន្ធ ពន្លឿនការចាក់វ៉ាក់សាំងដូសជំរុញ (ដូសទី៣) និងដូសទី៤ ជូនដល់ប្រជាពលរដ្ឋ និងមន្ត្រីរាជការឱ្យបានគ្រប់ៗគ្នា។
គិតត្រឹមថ្ងៃទី៥ ខែកុម្ភៈ ឆ្នាំ២០២២នេះ អស់រយៈពេល៣២ថ្ងៃជាប់ៗគ្នាមកហើយ ដែលសេចក្ដីប្រកាសរបស់ក្រសួងសុខាភិបាលបញ្ជាក់ថា មិនមានករណីអ្នកស្លាប់ដោយសារជំងឺកូវីដ-១៩នោះទេ៕
