លោក ខឹម មុនីកុសល អតីតមន្ត្រីជាន់ខ្ពស់នៅមន្ទីរសុខាភិបាលខេត្តប៉ៃលិន បានចាត់ទុកសេចក្តីសម្រេចរបស់ក្រសួងមុខងារសាធារណៈ ថាជារឿងអយុត្តិធម៌ និងធ្វើឡើងដោយមិនផ្អែកលើច្បាប់ និងនីតិវិធីនោះឡើយ។
ការលើកឡើងរបស់អតីតគ្រូពេទ្យនៅខេត្តប៉ៃលិននេះ គឺបន្ទាប់ពីក្រសួងមុខងារសាធារណៈ បានចេញសេចក្តីប្រកាសព័ត៌មានមួយកាលពីថ្ងៃទី៤ ខែកុម្ភៈម្សិលមិញ ដោយបានចាត់ទុកថា សេចក្តីសម្រេចរបស់រដ្ឋបាលខេត្តប៉ៃលិន ស្តីពី ការលុបឈ្មោះលោក ខឹម មុនីកុសល ចេញពីក្របខណ្ឌរដ្ឋបាលថ្នាក់ក្រោមជាតិ គឺស្របតាមច្បាប់ និងលិខិតបទដ្ឋានគតិយុត្តជាធរមាន។
សេចក្តីប្រកាសរបស់ក្រសួងមុខងារសាធារណៈបានបញ្ជាក់ថា៖ «ក្រោយពីបានពិនិត្យលើដំណើរការនៃការស្រាវជ្រាវ និងផ្ទៀងផ្ទាត់យ៉ាងហ្មត់ចត់ពីនីតិវិធីអធិការកិច្ចដែលមានចែងក្នុងច្បាប់ និងលិខិតបទដ្ឋានគតិយុត្តជាធរមាន ក្រសួងមុខងារសាធារណៈ សម្រេចថា ការចេញដីកាចុះថ្ងៃទី១៩ ខែមីនា ឆ្នាំ២០២១ របស់រដ្ឋបាលខេត្តប៉ៃលិន ស្តីពី ការអនុវត្តទណ្ឌកម្ម ខាងវិន័យថ្នាក់ទី២ ចំពោះលោក ខឹម មុនីកុសល គឺស្របតាមច្បាប់ និងលិខិតបទដ្ឋានគតិយុត្តជាធរមាន»។
ប៉ុន្តែលោក ខឹម មុនីកុសល បានចាត់ទុកថា សេចក្តីសម្រេចនេះ គឺអយុត្តិធម៌សម្រាប់លោក ហើយតាមរយៈករណីនេះវាបានឆ្លុះបញ្ចាំងថា មន្ត្រីរាជការតូចតាច មិនមានយន្តការណាមួយដើម្បីការពារនោះទេ។ លោកថា ការធ្វើបែបនេះ នឹងធ្វើឱ្យមន្ត្រីរាជការចុះខ្សោយ បាក់ទឹកចិត្ត និងអសកម្ម ដោយសារមិនហ៊ានរិះគន់បញ្ហាអសកម្មរបស់ថ្នាក់លើទៀតនោះទេ។
លោកថា៖ «ការសម្រេចរបស់ក្រសួងមុខងារសាធារណៈនេះ គឺវាអត់មានអ្វីទេ មានតែធ្វើឱ្យភាពអសកម្មរបស់មន្ត្រីរាជការហ្នឹងវាកាន់តែអសកម្ម ព្រោះអ្វី គឺគ្មានអ្នកណាគេហ៊ានធ្វើការងារដោយមនសិការវិជ្ជាជីវៈទេ ព្រោះអីធ្វើតែតាមមេ អោនលំទោនតែប៉ុណ្ណឹង ដើម្បីយករួចខ្លួន ហើយមួយទៀត វាបង្ហាញឱ្យឃើញថា មន្ត្រីរាជការហ្នឹងគ្មានយន្តការណាមួយដើម្បីការពារមន្ត្រីរាជការតូចតាច យន្តការដែលគេធ្វើរាល់ថ្ងៃហ្នឹង គឺការពារតែមន្ត្រីខិលខូច ធំៗ និងការពារតែគណបក្សដូចនិយាយខាងដើមចឹង»។
លោក ខឹម មុនីកុសល ក៏បានរិះគន់ទៅលើគណៈកម្មការអន្តរក្រសួងដែលចុះមកដោះស្រាយករណីរបស់លោកនាពេលកន្លងមកថា មិនបានផ្តល់ឱកាសគ្រប់គ្រាន់ឱ្យលោកបកស្រាយនោះទេ គឺគ្រាន់តែកោះហៅលោកទៅឆ្លើយបំភ្លឺដើម្បីតែបង្គ្រប់កិច្ចតែប៉ុណ្ណោះ។
លោក ខឹម មុនីកុសល ត្រូវបានអភិបាលខេត្តប៉ៃលិន លោកស្រី បាន ស្រីមុំ លុបឈ្មោះ ចេញពីក្របខ័ណ្ឌរដ្ឋ ក្រោមការចោទប្រកាន់ថា បានប្រព្រឹត្តកំហុស និងការឆ្គាំឆ្គងក្នុងវិជ្ជាជីវៈ។ ករណីនេះបានកើតឡើង ក្រោយពេលដែលលោក ខឹម មុនីកុសល បានបង្ហោះហ្វេសប៊ុកដោយសរសេរថា «មន្ត្រីស្ថាប័នពាក់ព័ន្ធដែលចុះប្រចាំការនៅមណ្ឌលចត្តាឡីស័កនៅមន្ទីរបក្សខេត្តប៉ៃលិន មិនជួយធ្វើការងារគ្រូពេទ្យខ្លះនោះទេ ប៉ុន្តែនាំគ្នាអង្គុយលេង Facebook ក្នុងតង់ និងថតរូបបង្អួតគេឯងទៅវិញ»។ លោកបានប្តឹងចំនួនពីរលើកមកក្រសួងមុខងារសាធារណៈ និងក្រសួងសុខាភិបាលផងដែរ ដើម្បីឱ្យដោះស្រាយករណីនេះ។
លោក ខឹម មុនីកុសល នៅថ្ងៃសៅរ៍នេះនៅតែអះអាងថា ការរិះគន់របស់លោក គឺជារឿងត្រឹមត្រូវ ដើម្បីបង្ហាញពីភាពអសកម្មរបស់មន្ត្រីរាជការ។
យ៉ាងណាក្តី អតីតគ្រូពេទ្យជាន់ខ្ពស់នៅខេត្តប៉ៃលិនរូបនេះ មិនទាន់បោះបង់ចោលការតស៊ូទាមទារក្របខណ្ឌរដ្ឋរបស់លោកមកវិញនៅឡើយទេ ដោយលោកកំពុងពិចារណាប្តឹងទៅកាន់តុលាការថែមទៀត។ លោកថា ពេលនេះ យុត្តិធម៌ ឬ អយុត្តិធម៌សម្រាប់លោក វាលែងសំខាន់ទៀតហើយ តែអ្វីដែលសំខាន់ នោះគឺការវាយតម្លៃរបស់ប្រជាពលរដ្ឋ និងមន្ត្រីរាជការផ្សេងទៀតមកលើសកម្មភាពរបស់លោកតែប៉ុណ្ណោះ៕