មន្ទីរសុខាភិបាលរាជធានីភ្នំពេញបានអះអាងថា កូដករចំនួន ២៩នាក់ ត្រូវបានរកឃើញវិជ្ជមានមេរោគកូវីដ-១៩ បន្ទាប់ពីធ្វើតេស្តសំណាកលើកម្មករជាច្រើននាក់នៅថ្ងៃអាទិត្យនេះ។
សេចក្តីប្រកាសព័ត៌មានរបស់មន្ទីរសុខាភិបាលរាជធានីភ្នំពេញនៅថ្ងៃទី៦ ខែកុម្ភៈ ឆ្នាំ២០២២ បានបញ្ជាក់ថា លទ្ធផលធ្វើតេស្តយកសំណាកដើម្បីស្វែងរកមេរោគកូវីដ-១៩ លើក្រុមកូដករបុគ្គលិកក្រុមហ៊ុនណាហ្គាវើលដ៏ គិតត្រឹមម៉ោងជិត៧ យប់ថ្ងៃអាទិត្យនេះ មានកូដករចំនួន ២៩នាក់បន្ថែមទៀត ត្រូវបានរកឃើញថាវិជ្ជមានកូវីដ-១៩។
បញ្ហានេះ មន្ទីរសុខាភិបាលរាជធានីភ្នំពេញ បានណែនាំក្រុមកូដករទាំងអស់ដែលប៉ះពាល់ផ្ទាល់ជាមួយអ្នកវិជ្ជមានកូវីដ-១៩ ត្រូវធ្វើចត្តាឡីស័ករយៈពេល ៧ថ្ងៃ ដោយគោរពឱ្យបានម៉ឺងម៉ាត់តាមវិធានសុខាភិបាល។
សេចក្តីប្រកាសព័ត៌មានដដែលបន្ថែមថា បន្ទាប់ពីការធ្វើចត្តាឡីស័កចប់ត្រូវយកសំណាកនៅតាមកន្លែងដែលបានកំណត់ និងរាយការណ៍អំពីលទ្ធផលមកអាជ្ញាធរមូលដ្ឋាន និងមន្ទីរសុខាភិបាលជាកំហិត។
ប្រភពដដែល ក៏បានស្នើដល់អ្នកដែលបានប៉ះពាល់ផ្ទាល់ និងប្រយោលជាមួយក្រុមកូដករ ហើយសម្រាប់អ្នកមិនទាន់បានធ្វើតេស្តកូវីដ-១៩ ត្រូវទៅធ្វើតេស្ត តាមកន្លែងកំណត់នៅរាជធានីភ្នំពេញ។
ស្របពេលកូដករក្រុមហ៊ុនណាហ្គាវើលដ៍នាំគ្នាចូលរួមធ្វើតេស្តសំណាក់រកមេរោគកូវីដ-១៩ តាមការចង់បានរបស់មន្ត្រីជំនាញ និងអាជ្ញាធររាជធានីភ្នំពេញ យ៉ាងហោចណាស់មានកូដករ ៣នាក់ត្រូវបានសមត្ថកិច្ចឃាត់ខ្លួនមិនទាន់ដោះលែងនៅឡើយ និង៤នាក់ទៀតប្រឈមការចាប់ខ្លួន ក្រោមការចោទប្រកាន់ថា បានរារាំងការអនុវត្តវិធានការទប់ស្កាត់ជំងឺកូវីដ-១៩។ ការចោទប្រកាន់នោះ កម្មករអះអាងថា ពួកគាត់មិនបានប្រឆាំងឬញុះញង់មិនឱ្យអនុវត្តវិធានាការសុខាភិបាលនោះទេ ដោយពួកគាត់គ្រាន់តែស្នើឱ្យពន្យារពេលធ្វើតេស្តសំណាកមកធ្វើនៅថ្ងៃទី៥ ខែកុម្ភៈ តែប៉ុណ្ណោះ។
វិវាទការងារក្រុមហ៊ុនណាហ្គាវើលដ៍បានកើតឡើង ក្រោយពេលបុគ្គលិកនិយោជិតចំនួន១ ៣២៩ ដោយក្នុងនោះប្រមាណ ១ ១០០នាក់ ជាសមាជិកសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ ត្រូវបានក្រុមហ៊ុនបញ្ឈប់ពីការងារ។
ក្រុមកម្មករនិយោជិតបាននាំគ្នាធ្វើកូដកម្មនៅខាងមុខ និងក្បែរក្រុមហ៊ុនល្បែងដែលមានម្ចាស់ជាជនជាតិម៉ាឡេស៊ីមួយនេះតាំងពីថ្ងៃទី១៨ ខែធ្នូ ឆ្នាំ២០២១ ប៉ុន្តែចំណុចដែលពួកគេទាមទារទាំង៩នោះ នៅតែគ្មានដំណោះស្រាយ។
ក្រៅពីមិនមានដំណោះស្រាយសម្រាប់បុគ្គលិកទាំងនោះ សមត្ថកិច្ចក៏ថែមទាំងបានចាប់ខ្លួនមនុស្សរាប់សិបនាក់ ប៉ុន្តែដោះលែងពួកគេមួយចំនួនធំទៅវិញ ដោយទុកតែថ្នាក់ដឹកនាំសហជីព ៨នាក់តែប៉ុណ្ណោះ។ ដឹកនាំសហជីព ៨នាក់ ដែលមានទាំងប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ ផងនោះ ត្រូវបានបញ្ជូនទៅឃុំខ្លួននៅពន្ធនាគារព្រៃសរ ដោយចោទពីបទ ញុះញង់ បើទោះពីជាសង្គមស៊ីវិលជាតិ និងអន្តរជាតិចាត់ទុកសកម្មភាពតវ៉ាអហិង្សារបស់ពួកគេថា ដើម្បីប្រយោជន៍កម្មករ និងសេរីសហជីព ព្រមទាំងជាសកម្មភាពស្របច្បាប់ក៏ដោយ។
ត្បិតតែថ្នាក់ដឹកនាំសហជីពត្រូវបានចាប់និងឃុំខ្លួនក្តី ប៉ុន្តែសកម្មភាពធ្វើកូដកម្មរបស់កូដករណាហ្គាវើលដ៍ក៏និងសកម្មភាពតស៊ូមតិផ្សេងទៀតនៅតែបន្តដដែល ដោយពួកគេក្រៅពីទាមទារដំណោះស្រាយការងារហើយនោះ ការដោះលែងតំណាងរបស់ខ្លួនទាំង ៨នាក់ឱ្យមានសេរីវិញ គឺជាកម្មវត្ថុសំខាន់ក្នុងការធ្វើកូដកម្មប្រចាំថ្ងៃរបស់ខ្លួន។
វិធានការសុខាភិបាលក៏ត្រូវបានគេមើលឃើញថា យកមកប្រើទៅលើកូដករណាហ្គាវើលដ៍វិញម្តង ខណៈការបំបែកការជួបជុំរបស់កូដករកន្លងមកមិនបានសម្រេច។ វិធានការសុខាភិបាលធ្វើឡើង ក្រោយពេលមន្ត្រីជំនាញរកឃើញថា ស្ត្រីមានផ្ទៃពោះម្នាក់ដែលជាកូដករដែរនោះ បានឆ្លងជំងឺកូវីដ១៩ ប្រភេទអូមីក្រុង បើទោះពីជាស្ត្រីរូបនោះចេញមុខអះអាងថា ការឆ្លងជំងឺសកលនេះលើរូបគាត់មិនពាក់ព័ន្ធក្រុមកូដករទេ ម្យ៉ាងគាត់ក៏មិនមានវត្តមានធ្វើកូដកម្មតាំងពីថ្ងៃទី១៥ ខែមករា មកម្លេះ៕
