ប្រមុខរដ្ឋាភិបាល លោក ហ៊ុន សែន អះអាងថា រយៈពេលប្រមាណជាង៦ខែ កម្ពុជាផលិតមាសបាន១ ៧៥១គីឡូក្រាម នៅខេត្តមណ្ឌលគិរី។
ការថ្លែងនេះធ្វើឡើងក្នុងឱកាសសម្ពោធដាក់ឱ្យប្រើប្រាស់កំណាត់ផ្លូវជាតិលេខ៧ ប្រវែងជិត១០០គីឡូម៉ែត្រ ក្នុងខេត្តក្រចេះ នៅព្រឹកថ្ងៃទី០៧ ខែកុម្ភៈ ឆ្នាំ២០២២នេះ។
លោកនាយករដ្ឋមន្ត្រី ហ៊ុន សែន បានថ្លែងបន្តថា៖ «ជាទូទៅ ក្នុងមួយសប្ដាហ៍ យើងផលិតបានជិត១០០គីឡូ អាចថាពី៨០ទៅ១០០គីឡូ កាន់តែច្រើនទៅៗ។ អ៊ីចឹងបានជាខ្ញុំដាក់គោលដៅប៉ូលសេដ្ឋកិច្ចនៅទិសឦសាន គឺកសិ-ឧស្សាហកម្ម និងធនធានរ៉ែរបស់យើង»។
យ៉ាងណា លោក ហ៊ុន សែន ថាកម្ពុជាមិនទាន់ស្រាវជ្រាវធនធានអស់នៅឡើយ ពោលគឺនៅមានប្រភេទរ៉ែ ធ្យូងថ្ម និងកន្លែងផលិតមាសដទៃទៀត ខណៈកម្ពុជាទើបនឹងចាប់ផ្ដើមស្រាវជ្រាវបានជាងកន្លះឆ្នាំ ខណៈមាសទាំង១ ៧៥១គីឡូក្រាមនោះនៅមិនទាន់កែច្នៃទៅជាមាសទឹក១០នៅឡើយ។
លោកនាយករដ្ឋមន្ត្រី បន្តថា នៅពេលដែលកម្ពុជាផលិតមាសឱ្យទៅជាមាសដុំៗ ដូចជា ដុំទម្ងន់ ២០គីឡូក្រាម ៣០គីឡូក្រាម និងជាង១០គីឡូក្រាម រួចទើបកម្ពុជាដឹកពីខេត្តមណ្ឌលគិរីទៅចម្រាញ់ទៅជាមាសទឹក១០នៅឯប្រទេសអូស្រ្តាលី។
កាលពីថ្ងៃទី២១ ខែមិថុនា ឆ្នាំ២០២១ រោងចក្រចម្រាញ់រ៉ែមាសជាលក្ខណៈឧស្សាហកម្ម ឈ្មោះ Renaissance Minerals (Cambodia) Limited បានបើកដំណើរការរុករកមាស នៅតំបន់អូរខ្វាវ ស្រុកកែវសីមា ខេត្តមណ្ឌលគិរី ក្រោយពីក្រុមហ៊ុនមួយនេះបានស្រាវជ្រាវរុករកនៅតំបន់នោះអស់រយៈពេល១៤ឆ្នាំមកហើយ៕
