តុលាការសម្រេចពន្យារពេលសវនាការលើសំណុំរឿងលោក កឹម សុខា ថ្នាក់ដឹកនាំបក្សប្រឆាំងដែលត្រូវបានតុលាការរំលាយ ដែលគ្រោងធ្វើនៅថ្ងៃស្អែកទៅសប្ដាហ៍ក្រោយវិញ ដោយសារសមាជិកក្រុមមេធាវីរដ្ឋាភិបាលម្នាក់មានវិជ្ជមានកូវីដ-១៩។
ការពន្យារពេលសវនាការនេះធ្វើឡើងបន្ទាប់ពីលោកមេធាវី សាន់ ជួយ តំណាងក្រុមមេធាវីតំណាងឱ្យដើមបណ្ដឹងរដ្ឋប្បវេណីក្នុងសំណុំរឿងនេះ (តំណាងមេធាវីរដ្ឋាភិបាល) បានដាក់ពាក្យស្នើសុំពន្យារពេលសវនាការទៅសាលាដំបូងរាជធានីភ្នំពេញ កាលពីថ្ងៃម្សិលមិញ។
ក្នុងពាក្យសុំពន្យារពេលនោះ លោកមេធាវី សាន់ ជួយ បានលើកឡើងថា កាលពីថ្ងៃទី៥ ខែកុម្ភៈ លោកមេធាវី ចេង ប៉េងហាប់ ជាសមាជិកក្រុមមេធាវីតំណាងដោយអាណត្តិឱ្យដើមបណ្ដឹងរដ្ឋប្បវេណីក្នុងសំណុំរឿងនេះ បានធ្វើតេស្តពិនិត្យសុខភាព និងបានរកឃើញមានវិជ្ជមានជំងឺកូវីដ-១៩ នៅមន្ទីរពេទ្យព្រះកេតុមាលា។ លោកបន្តថា អំឡុងពេលនោះ ក្រុមមេធាវីតំណាងដោយអាណត្តិឱ្យដើមបណ្ដឹងរដ្ឋប្បវេណី ធ្លាប់បានជួបជុំនិងពិនិត្យឯកសារជាមួយលោកមេធាវី ចេង ប៉េងហាប់។
ករណីនេះ លោកមេធាវី សាន់ ជួយ ស្នើសុំតុលាការពន្យារពេលសវនាការដែលគ្រោងធ្វើនៅថ្ងៃទី៩ ខែកុម្ភៈ ស្អែកនេះ ទៅសប្ដាហ៍ក្រោយវិញ ដើម្បីការពារនិងទប់ស្កាត់ការឆ្លងរាលដាលនៃជំងឺកូវីដ-១៩ ខណៈក្រុមមេធាវីដើមបណ្ដឹងផ្សេងទៀតដែលពាក់ព័ន្ធជាមួយមេធាវី ចេង ប៉េងហាប់ កំពុងធ្វើចត្តាឡីស័កផងដែរ។
ប្រធានក្រុមប្រឹក្សាជំនុំជម្រះនៃសាលាដំបូងរាជធានីភ្នំពេញ លោក កូយ សៅ នៅថ្ងៃទី៨ ខែកុម្ភៈនេះ បានចារជាអក្សរនៅលើពាក្យស្នើសុំនោះ ដោយសម្រេចលើកពេលសវនាការលើសំណុំរឿងលោក កឹម សុខា ដែលគ្រោងធ្វើនៅថ្ងៃពុធស្អែក ទៅព្រឹកថ្ងៃទី១៦ ខែកុម្ភៈ សប្ដាហ៍ក្រោយវិញ ដើម្បីអនុវត្តតាមវិធានសុខាភិបាល។
លោក កឹម សុខា ត្រូវបានអាជ្ញាធរចាប់ខ្លួនកាលពីពាក់កណ្ដាលយប់ថ្ងៃទី៣ ខែកញ្ញា ឆ្នាំ២០១៧ យកទៅឃុំខ្លួននៅពន្ធនាគារត្រពាំងផ្លុង ខេត្តត្បូងឃ្មុំ រយៈពេល១ឆ្នាំ ក្រោមការចោទប្រកាន់ពីបទ «គប់គិតជាមួយរដ្ឋបរទេសដើម្បីផ្ដួលរំលំរដ្ឋាភិបាលកម្ពុជា»។ មួយឆ្នាំក្រោយមក ពោលគឺនៅថ្ងៃទី៩ ខែកញ្ញា ឆ្នាំ២០១៨ លោកត្រូវបានបញ្ជូនចេញពីពន្ធនាគារត្រពាំងផ្លុង ដែលមានទីតាំងនៅជាប់ព្រំដែនវៀតណាម មកដាក់ឃុំនៅក្នុងផ្ទះ ក្នុងរាជធានីភ្នំពេញវិញ។
ក្នុងរឿងក្ដីព្រហ្មទណ្ឌប្រឆាំងលោក កឹម សុខា នេះ សាលាដំបូងរាជធានីភ្នំពេញបានបើកសវនាការចំនួន២៩លើកមកហើយ គិតត្រឹមថ្ងៃទី២ ខែកុម្ភៈ ឆ្នាំ២០២២៕
