ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោក ស ខេង បានបញ្ជាឱ្យអាជ្ញាធររាជធានី-ខេត្តបង្កលក្ខណៈងាយស្រួលដល់ការធ្វើសកម្មភាពរបស់គណបក្សនយោបាយនានាដែលបានចុះបញ្ជីនៅក្រសួងមហាផ្ទៃ និងត្រៀមចូលរួមការបោះឆ្នោតឃុំ-សង្កាត់ឆ្នាំ២០២២ និងការបោះឆ្នោតជាតិឆ្នាំ២០២៣។
យោងតាមលិខិតរបស់លោក ស ខេង ផ្ញើទៅកាន់អភិបាលនៃគណៈអភិបាលរាជធានី-ខេត្ត កាលពីថ្ងៃទី៧ ខែកុម្ភៈ បានឱ្យដឹងថា គ្រប់គណបក្សនយោបាយអាចធ្វើសកម្មភាពនយោបាយ ដូចជា ការបើកទីស្នាក់ការគណបក្ស ការលើកស្លាកសញ្ញាគណបក្ស និងការជួបជុំរបស់មន្រ្តីគណបក្សនយោបាយដែលស្ថិតនៅក្នុងលំនៅឋានឯកជនឬទីតាំងឯកជនបាន ដោយមិនចាំបាច់សុំការអនុញ្ញាតពីអាជ្ញាធរឃុំ-សង្កាត់ឡើយ ដោយគ្រាន់តែជូនដំណឹងជាលាយលក្ខណ៍អក្សរទៅអាជ្ញាធរឃុំ-សង្កាត់តែប៉ុណ្ណោះ។
ក៏ប៉ុន្តែ ចំពោះការលើកស្លាកសញ្ញាគណបក្ស និងការជួបជុំមន្រ្តីគណបក្សដែលស្ថិតលើទីតាំងសាធារណៈ ទីប្រជុំជន ឬតាមដងផ្លូវនានាវិញ លោកបានណែនាំទៅគ្រប់គណបក្សនយោបាយចាំបាច់ត្រូវស្នើសុំការអនុញ្ញាតពីអាជ្ញាធរឃុំ-សង្កាត់ជាមុន ដោយគណបក្សសាម៉ីត្រូវដាក់សំណើទៅអាជ្ញាធរឃុំ-សង្កាត់ឱ្យបាន៣ថ្ងៃមុនធ្វើសកម្មភាព។ រីឯអាជ្ញាធរឃុំ-សង្កាត់វិញត្រូវឆ្លើយតបក្នុងរយៈពេល១ថ្ងៃ បន្ទាប់ពីទទួលបានសំណើ។ ក្នុងករណីមិនអាចសម្រេចបាន អាជ្ញាធរឃុំ-សង្កាត់ត្រូវស្នើសុំយោបល់ពីអាជ្ញាធរក្រុង-ស្រុក-ខណ្ឌ ឬរាជធានី-ខេត្ត។
គួរជម្រាបជូនថា បទបញ្ជារបស់លោកឧបនាយករដ្ឋមន្ត្រី ស ខេង នេះបានធ្វើឡើងបន្ទាប់ពីគណបក្សនយោបាយមួយចំនួន តួយ៉ាងដូចជា គណបក្សភ្លើងទៀន និងគណបក្សប្រជាធិបតេយ្យមូលដ្ឋាន ជាដើម បានលើកឡើងថា អាជ្ញាធរមូលដ្ឋានបានរារាំងដល់សកម្មភាពលើកស្លាកសញ្ញាគណបក្ស និងការជួបជុំរបស់មន្ត្រីគណបក្សនយោបាយនៅតាមទីលំនៅឯកជន និងតាមទីសាធារណៈ ជាដើម៕
