រដ្ឋមន្ត្រីក្រសួងមហាផ្ទៃ លោក ស ខេង បានអំពាវនាវជាថ្មីម្ដងទៀតឱ្យភាគីអង្គការសង្គមស៊ីវិលចូលរួមជាមួយអាជ្ញាធរពាក់ព័ន្ធទប់ស្កាត់ការប្រើប្រាស់គ្រឿងញៀន ដោយថា បញ្ហាគ្រឿងញៀនកំពុងបំផ្លាញសុខភាពសាធារណៈនិងសង្គមជាតិ។
ក្នុងកិច្ចប្រជុំបូកសរុបសុវត្ថិភាពចរាចរណ៍ប្រចាំឆ្នាំ នៅទីស្ដីការក្រសួងសាធារណការ និងដឹកជញ្ជូន នាថ្ងៃទី៩ ខែកុម្ភៈនេះ រដ្ឋមន្ត្រីក្រសួងមហាផ្ទៃ លោក ស ខេង បានក្រើនរម្លឹកទៅអាជ្ញាធរទាំងអស់សហការគ្នាបន្តទប់ស្កាត់បទល្មើសគ្រឿងញៀនឱ្យដូចជាការទប់ស្កាត់ការឆ្លងជំងឺកូវីដ-១៩ ដើម្បីរួមគ្នាការពារសុវត្ថិភាពសង្គម ដោយមិនត្រូវឱ្យគ្រឿងញៀនវាយលុកនិងបំផ្លាញសុខភាពសាធារណៈឡើយ។
លោក ស ខេង លើកឡើងថា បញ្ហាកូវីដ-១៩អាចនឹងបាត់ទៅវិញ តែបញ្ហាសុខភាពសាធារណៈពាក់ព័ន្ធនឹងគ្រឿងញៀនវិញ លោកថា ពិបាកនឹងបាត់ទៅវិញណាស់ ដោយសារបញ្ហានេះ វាជាប្រពៃណីទៅហើយ។ លោកបង្ហាញក្ដីបារម្ភថា បច្ចុប្បន្ន គ្រឿងញៀនកំពុងវាយលុកនិងបំផ្លាញសុខភាពសាធារណៈ។ ករណីនេះ លោកស្នើទៅគ្រប់ភាគីទាំងអស់ឱ្យសហការគ្នា ដើម្បីការពារសង្គមជាតិ។
លោកថា៖ «សូមអំពាវនាវឱ្យមានការគាំទ្រផង ប៉ុន្មានថ្ងៃនេះ មានអ្នកព័ត៌មាន NGO អង្គការក្រៅរដ្ឋាភិបាលដៃគូ អ្នកដែលមានបំណងសូមមេត្តាចូលរួម។ ទេ! ក៏ចង់បានដែរការរិះគន់ ការជូនមតិយោបល់ ក៏ប៉ុន្តែទន្ទឹមនេះ ក៏ចង់បានការចូលរួមជាក់ស្ដែងដែរ អាចជួយនិងធ្វើអីបាន មិនមែនមិនចង់បានមតិយោបល់មតិរិះគន់ទេ ប៉ុន្តែយើងចង់បានការចូលរួមជាក់ស្ដែង ជួយដោះស្រាយបញ្ហាសង្គមរបស់យើង កំពុងគិតពិចារណា ប៉ុន្តែខ្ញុំជឿថា វិធានការនេះអាចទៅរួច យើងអាចធ្វើបាន»។
លោក ស ខេង ក៏បានអំពាវនាវឱ្យភាគីពាក់ព័ន្ធពិនិត្យអ្នកបើកបររថយន្តធំៗ ដើម្បីរកសារធាតុញៀនផងដែរ។
បើតាមលោក ស ខេង បច្ចុប្បន្ននេះ នៅក្នុងពន្ធនាគារកម្ពុជានៅទូទាំងប្រទេសមានអ្នកទោសប្រមាណជា៣៨ ០០០នាក់ ក្នុងនោះ ជាង២០ ០០០នាក់ជាប់ពាក់ព័ន្ធករណីគ្រឿងញៀន ឬស្មើនឹង៥៤,៥២ភាគរយ។
យោងតាមរបាយការណ៍របស់អង្គការសហប្រជាជាតិដើម្បីប្រយុទ្ធប្រឆាំងនឹងឧក្រិដ្ឋកម្មគ្រឿងញៀន (UNODC) ចេញផ្សាយកាលពីខែមិថុនា ឆ្នាំ២០២១ ថាកម្ពុជាគឺជាគោលដៅនៃក្រុមឧក្រិដ្ឋជនគ្រឿងញៀនប្រើប្រាស់សម្រាប់ចរាចរណ៍គ្រឿងញៀន ផលិត និងចែកចាយ។
របាយការណ៍ដែលមានចំណងជើងថា «ការវិវត្តចុងក្រោយនិងការប្រឈមលើបញ្ហាគ្រឿងញៀននៅតំបន់អាស៊ីបូពា៌ និងអាស៊ីអាគ្នេយ៍» នេះ បានឱ្យដឹងថា ការជួញដូរគ្រឿងញៀននៅក្នុងតំបន់អាស៊ីអាគ្នេយ៍ ជាពិសេសនៅតំបន់ត្រីកោណមាស មិនមានការថយចុះឡើយ បើទោះបីជាមានការឆ្លងរីករាលដាលនៃជំងឺកូវីដ-១៩ក្ដី។ បើប្រៀបធៀបនឹងរយៈពេលដូចគ្នា កាលពីឆ្នាំ២០១៩ ក្នុងនោះ រដ្ឋសាន (Shan) នៃប្រទេសភូមាគឺជាប្រភពរោងចក្រផលិតគ្រឿងញៀនដ៏ធំជាងគេ ខណៈប្រទេសកម្ពុជាគឺជាគោលដៅចម្បងនៃក្រុមឧក្រិដ្ឋជនគ្រឿងញៀនប្រើប្រាស់ជាទីតាំងសម្រាប់ការចរាចរគ្រឿងញៀន ការផលិត កែច្នៃ និងចែកចាយបន្ត ហើយក្រុមឧក្រិដ្ឋជនគ្រឿងញៀនទាំងនោះ ភាគច្រើនគឺជាជនជាតិចិន និងចិនតៃវ៉ាន់៕
