អ្នកភូមិអះអាងថា អាជ្ញាធរខេត្តកណ្ដាលបានដាក់កម្លាំងសមត្ថកិច្ចរាប់រយនាក់ ដើម្បីការពារគ្រឿងចក្ររបស់ក្រុមហ៊ុនអភិវឌ្ឍន៍ព្រលានយន្តហោះអន្តរជាតិភ្នំពេញថ្មី អូស៊ីអាយស៊ី (OCIC) ដែលកំពុងធ្វើសកម្មភាពឈូសឆាយដីធ្លីរបស់ប្រជាពលរដ្ឋ។
កាលពីថ្ងៃទី៧ ខែកុម្ភៈនេះ រដ្ឋបាលស្រុកកណ្ដាលស្ទឹងបានជួបប្រជុំជាមួយពលរដ្ឋ៥០នាក់ដែលមានក្បាលដីប៉ះពាល់ដោយគម្រោងព្រលានយន្តហោះថ្មី ដើម្បីផ្សព្វផ្សាយពីគម្រោងនៃការកាយប្រឡាយទឹកទំហំទទឹង២២ម៉ែត្រជុំវិញព្រលាន ដែលក្រុមហ៊ុនបានចាប់ផ្ដើមកាយកាលពីពេលថ្មីៗនេះ។
អ្នកស្រី ឃឹម ម៉ាលី ពលរដ្ឋនៅឃុំបឹងខ្យាង និងប៉ះពាល់ដីជាង៤០អា ប្រាប់ វីអូឌី នៅថ្ងៃសុក្រនេះថា អាជ្ញាធរបានពង្រាយកម្លាំងជាង៣០០នាក់នៅតាមភូមិមួយចំនួនក្នុងឃុំបឹងខ្យាងនេះ អស់រយៈពេល៣ថ្ងៃហើយ ខណៈក្រុមហ៊ុនកំពុងដាក់គ្រឿងចក្រកាយប្រឡាយទឹក។ អ្នកស្រីបន្តថា ការឈូសឆាយដីពីសំណាក់ក្រុមហ៊ុននេះបានធ្វើឱ្យប៉ះពាល់ដីធ្លីរបស់ប្រជាពលរដ្ឋ ទាំងដែលក្រុមហ៊ុននិងអាជ្ញាធរមិនបានផ្ដល់សំណងសមរម្យ។
ទោះជាយ៉ាងណា អ្នកស្រីថា ពលរដ្ឋមិនបានចេញតវ៉ាប្រឆាំងនឹងការឈូសឆាយដីនេះទេ ដោយសារតែពួកគាត់បារម្ភពីសុវត្ថិភាព។
អ្នកស្រី ឃឹម ម៉ាលី និយាយថា៖ «និយាយទៅ គេដាក់កម្លាំងគ្រប់កន្លែងទាំង៤ឃុំហ្នឹងតែម្ដង ព្រោះគេសម្រុកកាយក្រវាត់ប្រឡាយទាំង៤ឃុំហ្នឹង។ គេដាក់កម្លាំងត្រៀមទប់ស្កាត់ប្រជាជន ខ្លាចប្រជាជនទៅបាតុកម្មទៅដុតគ្រឿងចក្រគេ។ ដល់ឃើញប្រជាជនអត់ធ្វើអីអ៊ីចឹង គេក៏អត់ធ្វើអីយើង។ យើងទៅធ្វើអីឈ្នះគេ គេសុទ្ធតែកាំភ្លើង ខ្នោះ ដំបងឆក់ ពួកខ្ញុំមានអី?»
អ្នកស្រី អិល អឿន ប្រជាពលរដ្ឋរស់នៅឃុំព្រែកស្លែងដែលប៉ះពាល់ដីជាង១ហិកតា បានឱ្យដឹងដែរថា នៅឃុំមួយនេះក៏មានសមត្ថកិច្ចដាក់ពង្រាយកម្លាំងខ្ទង់រយនាក់ផងដែរ ដើម្បីទប់ស្កាត់ប្រជាពលរដ្ឋមិនឱ្យចេញតវ៉ាប្រឆាំងការឈូសឆាយរបស់ក្រុមហ៊ុន។
ពលរដ្ឋរូបនេះបង្ហាញការខកចិត្តចំពោះអាជ្ញាធរដែលមិនព្រមដោះស្រាយសំណងសមរម្យជូនពលរដ្ឋ ប៉ុន្តែបែរជាដាក់កម្លាំងគំរាមកំហែងពលរដ្ឋមិនឱ្យចេញតវ៉ា និងការពារគ្រឿងចក្រក្រុមហ៊ុនដែលធ្វើសកម្មភាពឈូសឆាយដីពលរដ្ឋទៅវិញ។
អ្នកស្រីបន្ថែមថា៖ «នៅនេះគេដាក់កម្លាំងច្រើនណាស់ មានឡានចេញចូលរហូត។ កម្លាំងគេលើសពី១០០នាក់ទៀត ខ្ញុំមិនដឹងទៅធ្វើអីគេកើតទេ កម្លាំងគេច្រើនយ៉ាងនេះ។ ដីខ្ញុំជាង១ហិកតា គេឈូសអស់តាំងពីមុនគេ។ បើទៅធ្វើ មានតែគេចាប់ អ៊ីចឹងមានការឈឺចាប់ហ្នឹងឯង»។
អភិបាលស្រុកកណ្ដាលស្ទឹង លោក អ៊ូច សាវឿន មានប្រសាសន៍ក្នុងកិច្ចប្រជុំជាមួយប្រជាពលរដ្ឋរងផលប៉ះពាល់ កាលពីថ្ងៃទី៧ ខែកុម្ភៈនេះថា ក្រុមហ៊ុនចាប់ផ្ដើមកាយប្រឡាយទទឹង២២ម៉ែត្រនៅជុំវិញព្រលាន ដែលនឹងប៉ះពាល់ដីរបស់ប្រជាពលរដ្ឋមួយចំនួនបន្ថែមទៀត។ លោកបានប្រាប់ទៅប្រជាពលរដ្ឋកុំឱ្យមានការតវ៉ា ខណៈអាជ្ញាធរនឹងដាក់កម្លាំងចាំការពារគ្រឿងចក្រក្រុមហ៊ុនទៅតាមបញ្ជារបស់ថ្នាក់លើ។
លោកបន្ថែមថា៖ «អាជ្ញាធរ គឺជាប្រតិបត្តិករដែលបម្រើឱ្យសេចក្ដីសម្រេចនិងការជូនដំណឹងនានារបស់ថ្នាក់លើ។ បើគេបង្កើតអ្វីមកឱ្យធ្វើ អាជ្ញាធរប្រាកដជាធ្វើតាមហ្នឹងហើយ»។
បើតាមញត្តិរបស់អ្នកភូមិដាក់ទៅក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច និងក្រសួងយុត្តិធម៌ កាលពីថ្ងៃទី៤ ខែកុម្ភៈនេះ បានឱ្យដឹងថា បច្ចុប្បន្ន ដីនៅតំបន់ដែលពួកគាត់រស់នៅមានតម្លៃចន្លោះពី «៨០ដុល្លារ ទៅ១០០ដុល្លារ ក្នុងមួយម៉ែត្រការ៉េ» ហើយសំណងដែលពួកគេចង់បាន គឺទៅតាមតម្លៃទីផ្សារបច្ចុប្បន្ន ឬប្រហាក់ប្រហែល ប៉ុន្តែអាជ្ញាធរនៅតែរក្សាជំហរត្រឹមតែ «៨ដុល្លារក្នុងមួយម៉ែត្រការ៉េ» ដដែល។
មន្ត្រីសម្របសម្រួលគម្រោងធុរកិច្ច និងសិទ្ធិមនុស្ស នៃមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត ចាត់ទុកករណីសមត្ថកិច្ចដាក់កម្លាំងដើម្បីការពារគ្រឿងចក្រក្រុមហ៊ុននេះ ថាជាការគំរាមកំហែងទៅលើប្រជាពលរដ្ឋ ហើយថា សកម្មភាពឈូសឆាយដីធ្លីទាំងបង្ខំ ដោយគ្មានការឯកភាពពីពលរដ្ឋ និងការមិនផ្ដល់សំណងសមរម្យជូនពលរដ្ឋ គឺជាទង្វើខុសច្បាប់។
មន្ត្រីសិទ្ធិមនុស្សរូបនេះលើកឡើងថា ក្នុងរដ្ឋធម្មនុញ្ញ ច្បាប់ភូមិបាល និងអស្សាមិករណ៍បានកំណត់ថា ការយកដីធ្លីពលរដ្ឋមានបណ្ណកម្មសិទ្ធិទៅអភិវឌ្ឍបាន លុះត្រាតែមានការព្រមព្រៀងពីម្ចាស់អចលនទ្រព្យ និងការមានការដោះស្រាយសំណងសមរម្យនិងយុត្តិធម៌។
លោកបន្ថែមថា៖ «រហូតមកដល់ពេលនេះ ក្រុមហ៊ុនហ្នឹងនៅតែបន្តអនុវត្តវិធានការបង្ខំយកដីប្រជាពលរដ្ឋ ទាំងមិនមានការយល់ព្រមពីប្រជាពលរដ្ឋជាមុន ដែលនេះជាការអនុវត្តខុសច្បាប់ និងជាការរំលោភសិទ្ធិមនុស្សយ៉ាងធ្ងន់ធ្ងរ ជាពិសេសទាក់ទងនឹងសិទ្ធិមានលំនៅឋាន និងសិទ្ធិមានដីធ្លីរបស់ប្រជាពលរដ្ឋតែម្ដង»។
កាលពីខែកញ្ញា ឆ្នាំ២០២១ ពលរដ្ឋមានជម្លោះដីធ្លីជាមួយក្រុមហ៊ុនយន្តហោះថ្មី បានប៉ះទង្គិចគ្នាជាមួយសមត្ថកិច្ចម្ដងរួចមកហើយ ដោយអំឡុងពេលនោះ សមត្ថកិច្ចបានចាប់ខ្លួនមនុស្ស៣០នាក់បញ្ជូនទៅតុលាការ ក្រោមការចោទប្រកាន់ថា ពួកគេបានបង្កហិង្សាដោយចេតនាទៅលើសមត្ថកិច្ចឱ្យរងរបួស ប៉ុន្តែក្រោយមកតុលាការបានដោះលែងវិញ។
កាលពីខែកញ្ញា ឆ្នាំ២០២១ អង្គការសង្គមស៊ីវិលចំនួន៣១ស្ថាប័នបានចេញសេចក្ដីថ្លែងការណ៍មួយស្នើដល់ស្ថាប័នពាក់ព័ន្ធផ្ដល់សំណងឱ្យបានសមស្របតាមតម្លៃទីផ្សារ ជូនប្រជាពលរដ្ឋដែលកំពុងរងផលប៉ះពាល់ដីធ្លីពីគម្រោងអភិវឌ្ឍន៍ព្រលានយន្តហោះអន្តរជាតិថ្មីនេះ និងចៀសវាងនូវកិច្ចព្រមព្រៀងដោយមានការបង្ខិតបង្ខំ ដើម្បីរក្សានូវការគោរពសិទ្ធិមនុស្សដែលទទួលស្គាល់ដោយរដ្ឋធម្មនុញ្ញកម្ពុជា។
ក្រុមអង្គការទាំងនេះក៏បានស្នើដល់ភាគីពាក់ព័ន្ធ ជាពិសេសរដ្ឋាភិបាលត្រូវដោះស្រាយបញ្ហាជម្លោះដីធ្លីនេះតាមនីតិវិធី តាមរយៈការកោះហៅភាគីទំនាស់មកចរចាគ្នា ដោយឈរលើផលប្រយោជន៍និងសេចក្ដីត្រូវការរបស់គ្រប់ភាគី ហើយភាគីទំនាស់និងអាជ្ញាធរគួររក្សាឱ្យបាននូវភាពអហិង្សា៕