សាលាដំបូងខេត្តបន្ទាយមានជ័យ បានកោះហៅអភិបាលស្រុកព្រះនេត្រព្រះ លោក ឃូ ពៅ ឱ្យចូលបំភ្លឺនៅខែមីនា ឆ្នាំ២០២២ ខាងមុខ ពាក់ព័ន្ធករណីឈូសឆាយទន្ទ្រានដីព្រៃលិចទឹក។
ក្នុងលិខិតអញ្ជើញរបស់ព្រះរាជអាជ្ញានៃអយ្យការអមសាលាដំបូងខេត្តបន្ទាយមានជ័យ លោក កើត វណ្ណារ៉េត ចុះថ្ងៃទី៩ ខែកុម្ភៈ ឆ្នាំ២០២២ បានតម្រូវឱ្យអភិបាលស្រុក ព្រះនេត្រព្រះ លោក ឃូ ពៅ ចូលបំភ្លឺនៅសាលាដំបូងខេត្តបន្ទាយមានជ័យ នៅថ្ងៃទី២១ ខែមីនា ឆ្នាំ២០២២ ក្នុងដំណើររឿងពាក់ព័ន្ធនឹងការឈូសឆាយ ទន្ទ្រានដីព្រៃលិចទឹកតំបន់ ៣ ស្ថិតនៅភូមិសាស្ត្រឃុំប្រាសាទ និងឃុំភ្នំលៀប ស្រុកព្រះនេត្រព្រះ។
ព្រះរាជអាជ្ញារងនិងជាអ្នកនាំពាក្យអមសាលាដំបូងខេត្តបន្ទាយមានជ័យ លោក សំរិទ្ធ សុខុម សុំមិនធ្វើអត្ថាធិប្បាយចំពោះការកោះហៅនេះទេ។
អភិបាលស្រុកព្រះនេត្រព្រះ លោក ឃូ ពៅ ប្រាប់សារព័ត៌មានវីអូឌីនៅថ្ងៃសៅរិ៍នេះថា លោកនឹងចូលខ្លួនទៅឆ្លើយបំភ្លឺតាមការកោះហៅរបស់តុលាការនៅថ្ងៃទី២១ ខែមីនា ខាងមុខ។
លោកថា៖ «លិខិតអញ្ជើញ ឱ្យខ្ញុំចូលបំភ្លឺឱ្យស្រាវជ្រាវអ្នកណាទន្ទ្រានដីព្រៃទេ។ ខ្ញុំត្រូវតែចូល ប៉ុន្តែខ្ញុំមិនដឹងថ្ងៃណាទេ»។
លោកនាយករដ្ឋមន្ត្រី ហ៊ុន សែន កាលពីថ្ងៃទី២៨ ខែវិច្ឆិកា ឆ្នាំ២០២១ បានបញ្ជាទៅប្រធានអង្គភាពប្រឆាំងអំពើពុករលួយ ក្រសួងរៀបចំដែនដី និងស្ថាប័នពាក់ព័ន្ធផ្សេងទៀត ចុះទប់ស្កាត់ជាបន្ទាន់ចំពោះករណីទន្ទ្រានដីព្រៃលិចទឹកនៅតំបន់បឹងទន្លេសាបដោយខុសច្បាប់និងចាត់វិធានការច្បាប់តឹងរ៉ឹងចំពោះអ្នកល្មើសផងដែរ។
បើតាមអ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ លោក សេង ឡូត ធ្លាប់ប្រាប់វីអូឌីកាលពីថ្ងៃទី៦ ខែមករា ឆ្នាំ២០២២ថា ក្រោយពីចុះប្រតិបត្តិការទប់ស្កាត់បទល្មើសព្រៃលិចទឹកតាមបណ្ដាខេត្តទាំង៦ រួចមក ដីព្រៃលិចទឹកជិត៦០ ០០០ហិកតានៅជុំវិញបឹងទន្លេសាប ត្រូវបានដកហូតមកទុកជាសម្បត្តិរដ្ឋវិញ បន្ទាប់ពីមានកាប់ទន្ទ្រាន់យកដោយខុសច្បាប់។
លោក សេង ឡូត បន្ថែមថា ក្នុងប្រតិបត្តិការបង្ក្រាបនិងទប់ស្កាត់បទល្មើសដីព្រៃលិចទឹកនៅតំបន់ជុំវិញបឹងទន្លេសាបនេះ គឺមានប្រជាពលរដ្ឋច្រើនលើសលុបបានសារភាពនិងព្រមប្រគល់ដីជូនរដ្ឋវិញ ខណៈមន្ត្រីរាជការមួយចំនួនដែលល្មើស ត្រូវបានកសាងសំណុំរឿងបញ្ជូនទៅតុលាការ។ តែយ៉ាងណា លោកពុំបានបញ្ជាក់លម្អិតពីចំនួនពិតប្រាកដ ថាតើប៉ុន្មាននាក់ត្រូវបានបញ្ជូនទៅកាន់តុលាការនោះទេ។
ចាប់តាំងពីមានការបញ្ជារបស់លោក ហ៊ុន សែន មកដល់ពេលនេះ មានតែមន្ត្រីនគរបាលខេត្តកំពង់ឆ្នាំងពីររូបប៉ុណ្ណោះ ត្រូវបាននាំខ្លួនមកសាកសួរនិងឃុំខ្លួនពាក់ព័ន្ធការរំលោភដីព្រៃលិចទឹករាប់ពាន់ហិកតា ខណៈអតីតអភិបាលខេត្តកំពង់ឆ្នាំង លោក ឈួរ ច័ន្ទឌឿន រហូតពេលនេះ មិនទាន់មានព័ត៌មានណាមួយអំពីការនាំខ្លួននិងចាប់ខ្លួននៅឡើយទេ។
កាលពីថ្ងៃទី២៩ ខែសីហា ឆ្នាំ២០១១ រដ្ឋាភិបាលបានចេញអនុក្រឹត្យមួយស្ដីពីការកំណត់ដែនព្រៃលិចទឹកប្រមាណ៦៥ម៉ឺនហិកតា ស្ថិតក្នុងខេត្តចំនួន៦ជុំវិញបឹងទន្លេសាប រួមមាន ខេត្តកំពង់ឆ្នាំង ពោធិ៍សាត់ បាត់ដំបង បន្ទាយមានជ័យ សៀមរាប និងកំពង់ធំ៕
