ក្រសួងសុខាភិបាលឱ្យដឹងថា ក្រសួងបានរកឃើញអ្នកឆ្លងជំងឺកូវីដ-១៩ ប្រភេទបំប្លែងថ្មី «អូមីក្រុង» ចំនួន៣០០នាក់បន្ថែមទៀត ខណៈមិនមានអ្នកស្លាប់ដោយសារជំងឺនេះទេនៅថ្ងៃសៅរ៍នេះ។
សេចក្ដីប្រកាសព័ត៌មានរបស់ក្រសួងសុខាភិបាល នៅថ្ងៃទី១២ ខែកុម្ភៈ ឆ្នាំ២០២២ បានឱ្យដឹងថា យោងតាមលទ្ធផលបញ្ជាក់ដោយ PCR test កាលពីម្សិលមិញ ក្រសួងបានរកឃើញករណីឆ្លងជំងឺកូវីដ-១៩ «អូមីក្រុង» ចំនួន ៣០០ នាក់ទៀត ក្នុងនោះមានករណីនាំចូលពីក្រៅប្រទេសចំនួន៥ នាក់ និងករណីឆ្លងចូលសហគមន៍២៩៥ នាក់។
ក្រៅពីរកឃើញអ្នកឆ្លង ក្រសួងថា កាលពីម្សិលមិញ ក៏មានអ្នកជាសះស្បើយ១៣៥ នាក់ ចំណែកករណីស្លាប់ គឺមិនមានឡើយក្នុងរយៈពេលជាច្រើនសប្តាហ៍មកនេះ។
គិតត្រឹមថ្ងៃទី១២ ខែកុម្ភៈ ឆ្នាំ២០២២ កម្ពុជាបានរកឃើញអ្នកឆ្លងជំងឺកូវីដ-១៩ សរុប១២៣ ០៤២ នាក់ ក្នុងនោះ ករណីនាំចូល២០ ៤៧៥ នាក់ ខណៈអ្នកជាសះស្បើយ១១៨ ៦៦០ នាក់ និងករណីស្លាប់៣ ០១៥ នាក់។
ចំណែក ករណីឆ្លងអូមីក្រុងក្នុងសហគមន៍វិញ ក្រសួងបញ្ជាក់ថា គិតមកដល់ពេលនេះបានកើនដល់១ ៩៨៣នាក់៕
