សកម្មជនដែលស្រឡាញ់ការងារសង្គមបានអះអាងថា ពួកគេប្រមាណ ២០នាក់ប្រមូលផ្តុំគ្នានៅក្បែរពន្ធនាគារព្រៃស ដើម្បីបង្ហោះប៉ោងប៉ោងផ្ញើសារលើកទឹកចិត្តដល់ថ្នាក់ដឹកនាំសហជីពថា ពួកគេមិននៅឯកាទេ និងទាមទារឱ្យដោះលែងពួកគេដែលកំពុងជាប់ឃុំទាំង ១១នាក់ឱ្យមានសេរីភាពវិញ។
សមាជិកខ្មែរថាវរៈ លោក ហ៊ុន វណ្ណៈ ដែលធ្លាប់ជាប់ពន្ធនាគារព្រៃស បានប្រាប់វីអូឌីនៅថ្ងៃអាទិត្យនេះថា នៅសប្តាហ៍ទី១នេះ ក្រុមយុវជនដែលស្រឡាញ់ការងារសង្គមប្រមាណ២០នាក់ជួបជុំគ្នាបង្ហោះប៉េតប៉ោងនៅក្បែរពន្ធនាគារ វេលាម៉ោង ៥ល្ងាចនេះ ដើម្បីបង្ហាញសារបែបឌឺដងទៅក្រុមហ៊ុនណាហ្គាវើលដ៍អំពីភាពជោគជ័យនៃការធ្វើទុក្ខបុកម្នេញលើបុគ្គលិក។
លើសពីនេះ ការបង្ហោះប៉ោងប៉ោងនោះ ក៏ជាសារលើកទឹកចិត្តដល់ពួកគេកំពុងជាប់ឃុំ និងស្នើឱ្យដោះស្រាយវិវាទការងារជូនកម្មករ រួមទាំងដោះលែងសហជីព និងសកម្មជនចំនួន ១១នាក់ឱ្យមានសេរីភាពវិញ ។
លោកមានប្រសាសន៍ថា៖ «យើងផ្ញើសារតាមរយៈប៉េងប៉ោង ដោយសារយើងអត់អាចចូលសួរសុខទុក្ខសហជីព (ឈឹម ស៊ីថរ) និងសកម្មជនបាន ហើយលើកទឹកចិត្តនិងគាំពួកគាត់ឱ្យតស៊ូបន្តទៀត គឺពួកយើងនៅខាងក្រៅអត់បំភ្លេចពួកគាត់ចោលទេ និងទាមទារឱ្យដោះលែងពួកគាត់មានសេរីភាពវិញ»។
លោក ហ៊ុន វណ្ណៈ មានប្រសាសន៍បន្ថែមថា ពួកគាត់នឹងបន្តធ្វើយុទ្ធនាការបង្ហោះប៉ោងប៉ោងនេះជារៀងរាល់ សប្តាហ៍នៅតាមរាជធានី ខេត្ត ក្រុង រហូតមានការដោះលែងសហជីពនិងសកម្មជនទាំង១១នាក់នោះឱ្យមានសេរីភាពវិញ ដោយមិនបារម្ភពីការគំរាមកំហែង និងចាប់ខ្លួននោះទេ ដោយថាពួកគេធ្វើដោយអហិង្សា និងគោរពតាមវិធានសុខាភិបាល ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ ផងដែរ។
កូដករក្រុមហ៊ុនណាហ្គាវើលដ៍ កញ្ញា ម៉េង កាក់នីកា បានបង្ហាញក្តីរីករាយនៅពេលទទួលព័ត៌មានថា មានក្រុមយុវជនដែលស្រឡាញ់កិច្ចការសង្គម គាំទ្រសហជីព និងសកម្មជនដែលកំពុងជាប់ពន្ធនាគារចំនួន១១នាក់។កញ្ញានិយាយថា៖ «ខ្ញុំពួកខ្ញុំមានការសប្បាយចិត្តខ្លាំង នៅពេលដែលពួកគាត់ជួយលើកទឹកចិត្តមកលើសហជីព និងសម្មជន ហើយធ្វើយុទ្ធនាការផ្សេងៗជំរុញឱ្យមានការដោះលែងថ្នាក់ដឹកនាំសហជីព និងក្រុមកូដករដែលគេចាប់ខ្លួនទៅ ពីព្រោះពួកខ្ញុំធ្វើការតស៊ូបែបអហិង្សា មិនបានបំពានច្បាប់ដូចការចោទប្រកាន់កន្លងមកទេ»។
ចំណែក អ្នកស្រី សំ រដ្ឋា ដែលអះអាងថា ជាកូដករនៅក្រុមហ៊ុនណាហ្គាវើលដ៍និយាយថា ពួកគាត់ក៏លើកទឹកចិត្តដល់សហជីពនិងសកម្មជនរបស់គាត់ទាំង១១នាក់ កុំបាក់ទឹកចិត្តនិងតស៊ូឡើង ដោយថាក្រុមកូដកររាប់ពាន់នាក់ នៅតែបន្តធ្វើកូដកម្មរហូតក្រុមហ៊ុនដោះស្រាយវិវាទការងារ និងឱ្យដោះលែងតំណាងពួកគាត់ឱ្យមានសេរីភាពវិញ។
អ្នកស្រីមានប្រសាសន៍ថា៖ «សូមឱ្យពួកគាត់នៅខាងក្នុងពន្ធនាគារកុំបាក់ទឹកចិត្ត ពួកខ្ញុំនៅខាងក្រៅនៅតែគាំទ្រតំណាងពួកខ្ញុំ មិនមែនចាប់ខ្លួនតំណាងពួកយើងហើយ យើងដកថយ គឺពួកយើងអត់ដកថយទេ ទោះមានការចាប់បន្តទៀតក៏អត់ខ្លាចចូលគុកដែរ។ ពួកខ្ញុំត្រៀមហើយ មិនបាច់គំរាមទេ ពួកខ្ញុំនិងតស៊ូរហូតមានដំណោះស្រាយ»។
ប្រធានអង្គភាពអ្នកនាំពាក្យរាជរដ្ឋាភិបាល លោក ផៃ ស៊ីផាន មានប្រសាសន៍ថា ការជួបជុំគ្នារបស់ក្រុមយុវជនទាំងនោះ ជាសិទ្ធិសេរីភាពបញ្ចេញមតិរបស់ពួកគេ ប៉ុន្តែលោកថា ការបញ្ចេញមតិត្រូវធ្វើឱ្យស្របតាមច្បាប់ ដើម្បីកុំឱ្យទទួលរងការចោទប្រកាន់ដូចអ្នកជាប់ឃុំទាំង១១នាក់នោះ។
លោកផ្តល់ជាអនុសាសន៍ថា បើក្រុមយុវជនចង់ជួយដល់ប្រធានសហជីព និងសកម្មជនទាំង១១នាក់នោះឱ្យមានសេរីភាពវិញ ត្រូវរកមេធាវីជួយការពារក្តីតតាំងជាមួយតុលាការតាមផ្លូវច្បាប់វិញ ទើបទទួលបានផលវជ្ជមានខ្ពស់។
លោកផ្តល់ជាអនុសាសន៍៖ «ការបង្ហោះប៉េតប៉ោងជាសិទ្ធិសេរីភាពបញ្ចេញមតិរបស់ពួកគាត់ ប៉ុន្តែការដាក់សម្ពាធទៅលើគោលការណ៍ច្បាប់ពិបាក។ គាត់គួររកមេធាវី ដើម្បីតតាំងជាមួយខាងមេធាវីរដ្ឋាភិបាល ឬព្រះរាជអាជ្ញា ដើម្បីធ្វើយ៉ាងម៉េច ដោះបន្ទុកឱ្យជនជាប់ចោទ វាជាគោលការណ៍ប្រជាធិបតេយ្យ យើងត្រូវអនុវត្តតាមច្បាប់»។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត មានប្រសាសន៍ថា បញ្ហាវិវាទការងាររវាងក្រុមហ៊ុនណាហ្គាវើលដ៍ ជាមួយបុគ្គលិកកន្លងមកនេះ កំពុងស្ថិតនៅក្នុងការឃ្លាំមើលដោយយកចិត្តទុកដាក់ពីមជ្ឈដ្ឋានជាតិ និងអន្តរជាតិ បើសិនស្ថាប័នពាក់ប័ន្ធរបស់រដ្ឋ មិនពន្លឿនបញ្ចប់វិវាទនោះទេ នឹងធ្វើឱ្យប៉ះពាល់ដល់មុខមាត់រដ្ឋាភិបាល។
លោកមានប្រសាសន៍ថា៖ «កន្លងមកយើងឃើញហើយ វិវាទរវាងក្រុមហ៊ុនណាហ្គាវើលដ៍និងក្រុមកូដករ ប៉ុន្តែវារីករាលដាលក្លាយទៅវិវាទរវាងកូដករជាមួយអាជ្ញាធរ រហូតដល់មានការចាប់ខ្លួន វាមានការថ្កោលទោស មានការរិះគន់ធ្ងន់ធ្ងរដែរសម្រាប់រដ្ឋាភិបាល ធ្វើឱ្យក្រុមហ៊ុនណាហ្គាវើលដ៍អត់មានបញ្ហាអ្វីសោះ ហើយអ្នកដែលប្រឈមទៅជារដ្ឋាភិបាលដែលត្រូវបានគេរិះគន់វិញ»។
កាលពីថ្ងៃទី២៤ ខែមករា ឆ្នាំ២០២២ អង្គការសង្គមស៊ីវិលចំនួន៨ រួមមាន មជ្ឈមណ្ឌលសិទ្ធិមនុស្សកម្ពុជា មជ្ឈមណ្ឌលសម្ព័ន្ធភាពការងារនិងសិទ្ធិមនុស្ស សមាគមការពារសិទ្ធិមនុស្សអាដហុក និងអង្គការសមាគមផ្សេងទៀត បានដាក់លិខិតរួមគ្នាមួយទៅសាលាដំបូងរាជធានីភ្នំពេញ ដើម្បីសុំជួបសួរសុខទុក្ខតំណាងសហជីព៨នាក់ក្នុងមួយខែម្ដង ដោយគិតចាប់ពីខែមករា ឆ្នាំ២០២២ទៅ ប៉ុន្តែសំណើនេះត្រូវបានតុលាការបដិសេធចោល។
កាលពីថ្ងៃទី១ ខែកុម្ភៈនេះ ចៅក្រុមស៊ើបនៃសាលាដំបូងរាជធានីភ្នំពេញ លោក អ៊ឹម វណ្ណៈ បានចេញលិខិតមួយឆ្លើយតបចំពោះការស្នើសុំរបស់អង្គការសង្គមស៊ីវិលទាំង៨ថា មូលហេតុដែលតុលាការមិនអនុញ្ញាតឱ្យពួកគេចូលជួបសួរសុខទុក្ខតំណាងសហជីពទាំង៨នាក់ ដោយសារអ្នកជាប់ឃុំស្ថិតក្នុងដំណាក់កាលស៊ើបសួរ ហើយចៅក្រមស៊ើបសួរកំពុងបន្តស្រាវជ្រាវស៊ើបសួរទៅបុគ្គលមួយចំនួនទៀតដែលចៅក្រមត្រូវកោះសួរបំភ្លឺ។
កាលពីថ្ងៃទី៥ ខែមករា ឆ្នាំ២០២២ ថ្នាក់ដឹកនាំនិងសកម្មជនសហជីពចំនួន៨នាក់ ក្នុងនោះមានប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ ផង ត្រូវបានតុលាការសម្រេចឃុំខ្លួនបណ្ដោះអាសន្ន ក្រោមការចោទប្រកាន់ពីបទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍» តាមមាត្រា៤៩៤ និង៤៩៥ នៃក្រមព្រហ្មទណ្ឌ ក្រោយពីពួកគេដឹកនាំក្រុមកូដករទាមទារសិទ្ធិ និងលក្ខខណ្ឌការងារនៅក្នុងក្រុមហ៊ុនកាស៊ីណូណាហ្គាវើលដ៍។
កាលពីថ្ងៃទី៥ ខែកុម្ភៈ សមត្ថកិច្ចរាជធានីភ្នំពេញបានចាប់ខ្លួនកូដករក្រុមហ៊ុនណាហ្គាវើលដ៍ចំនួន៦នាក់ ប៉ុន្តែ៣នាក់ត្រូវបានដោះលែងទៅវិញ ខណៈកូដករ៣នាក់ទៀតត្រូវបានតុលាការចោទប្រកាន់ និងឃុំខ្លួនពួកគាត់បណ្ដោះអាសន្ននៅពន្ធនាគារ ក្រោមបទចោទ «រារាំងដល់ការអនុវត្តវិធានការប្រយុទ្ធនឹងជំងឺកូវីដ-១៩»។
កាលពីថ្ងៃទី១៨ ខែមករា ឆ្នាំ២០២២ សហជីពអន្តរជាតិ បានផ្ញើលិខិតមួយទៅកាន់លោកនាយករដ្ឋមន្ត្រី ហ៊ុន សែន ដោយលើកឡើងថា វិវាទការងារនៅក្រុមហ៊ុនណាហ្គាវើលដ៍បានកើតចេញពីការបរាជ័យជាយូរណាស់មកហើយរបស់ភាគីក្រុមហ៊ុន ក្នុងការគោរពសិទ្ធិកម្មករនិងសហជីព ចំពោះកិច្ចចរចាដោយសមូហភាព ដើម្បីទទួលបានប្រាក់ឈ្នួលនិងលក្ខខណ្ឌការងារកាន់តែល្អប្រសើរ។
លិខិតនោះបន្តថា ក្រុមហ៊ុនណាហ្គាវើលដ៍ មិនបានគោរពតាមគោលការណ៍របស់រដ្ឋាភិបាលលើការងារ សុវត្ថិភាព និងការការពារសុខភាពក្នុងអំឡុងពេលមានជំងឺកូវីដ-១៩នោះទេ។
ផ្ទុយទៅវិញ បុគ្គលិកនិយោជិតចំនួន១ ៣២៩នាក់ត្រូវបានបញ្ឈប់ពីការងារ ដោយមិនបានពិគ្រោះយោបល់ក្រោមច្បាប់ការងារកម្ពុជាឡើយ ហើយក្នុងចំណោមនោះមានបុគ្គលិក១ ១០០នាក់ គឺជាសមាជិកសហជីព៕
