និយ័តករទូរគមនាគមន៍កម្ពុជា (ន.ទ.ក) បានចាត់វិធានការបិទខ្ទប់ឈ្មោះដែន (Domain) ចំនួន១៥ ដែលកំពុងដំណើរការល្បែងឆ្នោតខុសច្បាប់នៅកម្ពុជា និងឈ្មោះដែន (Domain) ដែលក្លែងក្លាយសម្រាប់ការស្នើសុំទិដ្ឋាការទៅសាធារណរដ្ឋអ៊ីស្លាមប៉ាគីស្ថាន។
សេចក្ដីប្រកាសព័ត៌មានរបស់និយ័តករទូរគមនាគមន៍កម្ពុជា (ន.ទ.ក) នៅថ្ងៃពុធនេះ បានឱ្យដឹងថា ខ្លួននឹងបន្តសហការជាមួយអគ្គស្នងការដ្ឋាននគរបាលជាតិ អាជ្ញាធរពាក់ព័ន្ធ និងប្រតិបត្តិករទូរគមនាគមន៍ទាំងអស់ ដើម្បីលុបបំបាត់រាល់ឈ្មោះដែន (Domain) ដែលធ្វើប្រតិបត្តិការ និងផ្ដល់សេវាល្បែងស៊ីសងអនឡាញនិងល្បែងឆ្នោតខុសច្បាប់ និងផ្ទុយពីសារាចរណែនាំរបស់រដ្ឋាភិបាលកម្ពុជាកាលពីថ្ងៃទី១៨ ខែសីហា ឆ្នាំ២០១៩។
កាលពីថ្ងៃទី២៨ ខែមករា ឆ្នាំ២០២២នេះ និយ័តករទូរគមនាគមន៍កម្ពុជា (ន.ទ.ក) ក៏បានបិទខ្ទប់ឈ្មោះដែន (Domain) ដែលដំណើរការល្បែងឆ្នោតខុសច្បាប់ចំនួន២៥ផងដែរ។
កាលពីពេលថ្មីៗនេះ គេហទំព័រល្បែងអនឡាញខុសច្បាប់ចំនួនជាង២០០ (២០២) ដែលប្រតិបត្តិការផ្ដល់សេវាល្បែងអនឡាញនិងល្បែងឆ្នោតខុសច្បាប់នៅកម្ពុជាក៏ត្រូវបានបិទខ្ទប់ផងដែរ៕