ឯកអគ្គរាជទូតថ្មីនៃប្រទេសបែលហ្ស៊ិកប្រចាំ៤ប្រទេស ចង់ឃើញលោក កឹម សុខា មានសេរីភាពពេញលេញនិងចូលរួមការបោះឆ្នោតនៅពេលខាងមុខឆាប់ៗនេះ ខណៈតុលាការកម្ពុជានឹងបន្តបើកសវនាការលើករណីរបស់លោកនៅក្នុងសប្ដាហ៍នេះទៀត។
ការលើកឡើងនេះបានធ្វើឡើងនៅក្នុងជំនួបមួយនៅថ្ងៃអង្គារនេះ រវាងលោកស្រី Sibille de Cartier ឯកអគ្គរាជទូតថ្មីនៃប្រទេសបែលហ្ស៊ិកប្រចាំ៤ប្រទេស គឺកម្ពុជា ថៃ ឡាវ និងមីយ៉ាន់ម៉ា ជាមួយលោក កឹម សុខា ប្រធានគណបក្សសង្គ្រោះជាតិដែលត្រូវបានតុលាការរំលាយ នៅឯគេហដ្ឋានរបស់លោក ស្ថិតនៅខណ្ឌទួលគោក រាជធានីភ្នំពេញ។
លោក កឹម សុខា បានសរសេរនៅលើទំព័រហ្វេសប៊ុករបស់លោកនៅថ្ងៃទី១៥ ខែកុម្ភៈ ថាក្នុងជំនួបនោះ លោកស្រី Sibille de Cartier ឯកអគ្គរាជទូតថ្មីនៃប្រទេសបែលហ្ស៊ិក បានបញ្ជាក់ប្រាប់លោកថា រដ្ឋាភិបាលបែលហ្ស៊ិក និងសហភាពអឺរ៉ុប ចង់ឃើញកម្ពុជាធ្វើដំណើរតាមគោលការណ៍ប្រជាធិបតេយ្យ សេរីពហុបក្ស ស្របតាមរដ្ឋធម្មនុញ្ញរបស់កម្ពុជា ព្រមទាំងចង់ឃើញលោកមានសេរីភាពខាងនយោបាយពេញលេញផងដែរ។
លោកបានសរសេរថា៖ «ក្នុងជំនួបដ៏មានសារៈសំខាន់នេះ លោកជំទាវឯកអគ្គរាជទូតបានបញ្ជាក់ថា រាជរដ្ឋាភិបាលបែលហ្ស៊ិក ក៏ដូចជាសហភាពអឺរ៉ុប ចង់ឃើញកម្ពុជាធ្វើដំណើរតាមគោលការណ៍ប្រជាធិបតេយ្យ សេរី ពហុបក្ស ស្របតាមរដ្ឋធម្មនុញ្ញនៃព្រះរាជាណាចក្រកម្ពុជា និងចង់ឃើញខ្ញុំមានសិទ្ធិពេញលេញ សេរីភាពនយោបាយ ដែលអាចចូលរួមការបោះឆ្នោតនៅពេលឆាប់ៗខាងមុខនេះ ហើយរាជរដ្ឋាភិបាលបែលហ្ស៊ិកនឹងតាមដានមើលនូវស្ថានភាពនេះបន្តទៀត»។
ទោះយ៉ាងណា លោកស្រី Sibille de Cartier មិនបានសរសេរពីលទ្ធផលជំនួបរវាងលោកស្រីជាមួយលោក កឹម សុខា នៅលើទំព័រ Twitter របស់ខ្លួននោះទេ។ ប៉ុន្តែលោកស្រីបានសរសេរថា វាគឺជាពេលវេលាដ៏ល្អមួយនៃដំណើរបេសកកម្មពេញមួយថ្ងៃរបស់លោកស្រីនៅកម្ពុជា ដោយការចាប់ផ្ដើមចូលគាល់ព្រះមហាក្សត្រ និងបញ្ចប់ដោយការជួបជាមួយសហគមន៍បែលហ្ស៊ិកនៅរាជធានីភ្នំពេញ ព្រមទាំងកិច្ចពិភាក្សាជាមួយរដ្ឋមន្ត្រីក្រសួងអប់រំ យុវជន និងកីឡា លោក ហង់ ជួនណារ៉ុន និងជួបជាមួយមន្ត្រីជាន់ខ្ពស់នៃក្រសួងការបរទេសកម្ពុជា ជាដើម។
ប្រទេសបែលហ្ស៊ិក គឺជាសមាជិកដ៏សំខាន់មួយនៃសហភាពអឺរ៉ុប ដែលមានទីស្នាក់ការកណ្ដាលស្ថិតនៅទីក្រុងព្រុចសែល។ បច្ចុប្បន្ន ទូតបែលហ្ស៊ិក ក៏ជាអ្នកសម្របសម្រួលការទូតនៅទីក្រុងបាងកកដែលទាក់ទងនឹងកម្ពុជាផងដែរ។
វីអូឌី មិនអាចសុំការឆ្លើយតបពីអ្នកនាំពាក្យរាជរដ្ឋាភិបាល លោក ផៃ ស៊ីផាន និងអ្នកនាំពាក្យគណបក្សប្រជាជនកម្ពុជា លោក សុខ ឥសាន បានទេនៅល្ងាចថ្ងៃទី១៥ ខែកុម្ភៈ។
សាស្ត្រាចារ្យវិទ្យាសាស្ត្រនយោបាយ លោក ឯម សុវណ្ណរ៉ា ថ្លែងថា ប្រទេសបែលហ្ស៊ិកអាចមិនមានទឹកមាត់ប្រៃ ឬមានទម្ងន់ការទូតមកលើកម្ពុជានោះទេ។ ក៏ប៉ុន្តែលោកថា ប៊ែលហ្ស៊ិក ជាសមាជិកមួយនៃសហភាពអឺរ៉ុប ដូច្នេះចង់ឬមិនចង់ ប្រទេសនេះក៏ជាសំឡេងមួយនៃសមាជិកសហភាពអឺរ៉ុប ដែលបានកាត់ផ្ដាច់ប្រព័ន្ធអនុគ្រោះពន្ធ (EBA) ២០% ពីកម្ពុជា កាលពីខែសីហា ឆ្នាំ២០២០ ដោយសារតែបរាជ័យក្នុងការអំពាវនាវឱ្យកម្ពុជាស្ដារលទ្ធិប្រជាធិបតេយ្យឡើងវិញ។
លោកសាស្ត្រាចារ្យថ្លែងថា៖ «ជាទូទៅ បើកាលណាសមាជិកសហភាពអឺរ៉ុបគាត់ឈឺឆ្អាលរឿងសិទ្ធិមនុស្សនិងប្រជាធិបតេយ្យ ហើយអតីតមេគណបក្សប្រឆាំង លោក កឹម សុខា គាត់ជាប់បណ្ដឹងតុលាការ ជាប់ទោសក្បត់ជាតិ ហើយត្រូវរំលាយបក្សនោះ ដូច្នេះហើយបានជាសហគមន៍អឺរ៉ុប កាលណាគាត់មានមតិទស្សនៈលើកឡើង ឈឺឆ្អាល បានន័យថា គាត់យកចិត្តទុកដាក់ទៅលើបញ្ហាសិទ្ធិមនុស្ស និងប្រជាធិបតេយ្យនៅកម្ពុជា»។
ជំនួបរវាងលោកស្រី Sibille de Cartier ឯកអគ្គរាជទូតថ្មីនៃប្រទេសបែលហ្ស៊ិកជាមួយលោក កឹម សុខា បានធ្វើឡើង ខណៈតុលាការក្រុងភ្នំពេញគ្រោងបន្តបើកសវនាការលើសំណុំរឿងរបស់លោក កឹម សុខា នៅថ្ងៃទី១៦ ខែកុម្ភៈនេះ ដែលជាសវនាការគម្រប់លើកទី៣០៕