រដ្ឋមន្ត្រីការបរទេសកម្ពុជា និងជាប្រេសិតពិសេសអាស៊ាន លោក ប្រាក់ សុខុន គ្រោងនឹងទៅបំពេញទស្សនកិច្ចនៅមីយ៉ាន់ម៉ានៅសប្ដាហ៍ទី២នៃខែមីនាខាងមុខនេះ ក្នុងនាមលោកជាប្រេសិតពិសេសប្រធានអាស៊ានស្ដីពី «បញ្ហានៅមីយ៉ាន់ម៉ា»។
លោក ប្រាក់ សុខុន រដ្ឋមន្ត្រីការបរទេសកម្ពុជា បានថ្លែងនៅក្នុងសន្និសីទកាសែត ក្រោយពីបិទបញ្ចប់កិច្ចប្រជុំចង្អៀតរដ្ឋមន្ត្រីការបរទេសអាស៊ាននៅរាជធានីភ្នំពេញ នារសៀលថ្ងៃព្រហស្បតិ៍នេះថា លោកមានគម្រោងធ្វើដំណើរទៅបំពេញទស្សនកិច្ចនៅមីយ៉ាន់ម៉ា នៅសប្ដាហ៍ទី២នៃខែមីនាខាងមុខនេះ។
យ៉ាងណាក្ដី លោកនៅមិនទាន់បញ្ជាក់ពីកាលបរិច្ឆេទពិតប្រាកដនៅថ្ងៃណានៅឡើយទេ ដោយអាស្រ័យលើរបបសឹកភូមាជាអ្នកកំណត់និងជាអ្នករៀបចំ។
បើតាមគម្រោង ក្នុងដំណើរទស្សនកិច្ចនេះ លោកនឹងលើកឡើងពីការអនុវត្តកិច្ចព្រមព្រៀង៥ចំណុចរបស់អាស៊ានទៅកាន់របបសឹកមីយ៉ាន់ម៉ា និងស្នើសុំជួបមេដឹកនាំរបបសឹកភូមា លោក មីន អ៊ុងឡាំង, រដ្ឋមន្ត្រីការបរទេសមីយ៉ាន់ម៉ា, ឯកអគ្គរដ្ឋទូតទាំងអស់ប្រចាំនៅប្រទេសមីយ៉ាន់ម៉ា រួមទាំងភាគីពាក់ព័ន្ធផ្សេងៗទៀត។ ក៏ប៉ុន្តែលោករដ្ឋមន្ត្រីមិនបានបញ្ជាក់ថា លោកមានគម្រោងស្នើសុំជួបលោកស្រី អ៊ុងសាន ស៊ូជី មេដឹកនាំប្រជាធិបតេយ្យមីយ៉ាន់ម៉ានៅឡើយទេ។
រដ្ឋមន្ត្រីការបរទេសនៃរបបសឹកមីយ៉ាន់ម៉ា មិនត្រូវបានអញ្ជើញឱ្យមកចូលរួមកិច្ចប្រជុំចង្អៀតរដ្ឋមន្ត្រីការបរទេសអាស៊ាននៅកម្ពុជានៅថ្ងៃនេះទេ ដោយសារតែរបបសឹកមិនអាចអនុវត្តបាននូវកិច្ចព្រមព្រៀង៥ចំណុចរបស់អាស៊ាន៕