អភិបាលស្រុកបន្ទាយស្រី រងបណ្ដឹងនៅតុលាការខេត្តសៀមរាប ក្រោយពីស្រ្តីជាអាជីវករម្នាក់ប្ដឹងពីបទ «រំលោភទ្រពសម្បត្តិដែលជាកម្មសិទ្ធិឯកជន» និងបំពានសេចក្ដីសម្រេចរបស់តុលាការស្ដីពីដីការក្សាការពារលើដីទំនាស់ប្រមាណ២០០ហិកតា។
អ្នកស្រី លី អ៊ុំអេង ដែលអះអាងថាជាអាជីវករនៅខេត្តសៀមរាប ប្រាប់ វីអូឌី នៅថ្ងៃសុក្រនេះថា អ្នកស្រីបានប្ដឹងចៅហ្វាយស្រុកបន្ទាយស្រី គឺលោក ឃឹម ហ្វីណង់ ទៅតុលាការខេត្តសៀមរាបរួចហើយ កាលពីថ្ងៃទី១៤ ខែកុម្ភៈ កន្លងទៅនេះ។
អ្នកស្រីបន្តថា មូលហេតុដែលនាំឱ្យអ្នកស្រីប្ដឹងទៅតុលាការ ព្រោះតែចៅហ្វាយស្រុករូបនេះបានបំពានទៅនឹងដីការក្សាការពារ ដែលអ្នកស្រីធ្លាប់ឈ្នះក្ដីរួចមកហើយ ជាមួយរដ្ឋបាលខណ្ឌព្រៃឈើកាលពីឆ្នាំ២០១៣។
អ្នកស្រីមានប្រសាសន៍ថា៖ «គាត់ធ្វើហ្នឹងខុសនីតិវិធីច្បាប់ ព្រោះដីខ្ញុំមានសាលក្រមពីតុលាការ និងមានដីការក្សាការពារ ហើយមានរបងព័ទ្ធជុំវិញ ព្រមទាំងមានដំណាំអាស្រ័យផលជាក់ស្ដែង១៩ឆ្នាំហើយ »។
បើតាមអ្នកស្រី លី អ៊ុំអេង អ្វីដែលកាន់តែធ្វើឱ្យអ្នកស្រីមិនអាចនៅស្ងៀមបាននេះ ក៏ព្រោះតែអភិបាលស្រុកបានកៀរគរមនុស្សពីតំបន់ផ្សេងឱ្យទៅធ្វើរបងនិងបោះបង្គោលព្រំដីអស់ប្រមាណ១៤៨ហិកតា ក្នុងចំណោមដីសរុប២០០ហិកតាដែលកំពុងមានវិវាទ។
ឆ្លើយតបនឹងការចោទប្រកាន់នេះ លោក ឃឹម ហ្វីណង់ អភិបាលស្រុកបន្ទាយស្រី បានបដិសេធចំពោះការចោទប្រកាន់ពីអ្នកស្រី លី អ៊ុំអេង ដោយចាត់ទុកបណ្ដឹងប្រឆាំងរូបលោកនេះថា ជានីតិវិធីដែលមិនស្របទៅនឹងគោលការណ៍ច្បាប់ទេ។ ម្យ៉ាងវិញទៀត លោកថា ការប្ដឹងចោទប្រកាន់រូបលោកថា ក្នុងឋានៈជាចៅហ្វាយស្រុក ដើរកៀរគរមនុស្ស ដើម្បីទៅបំពានដីកម្មសិទ្ធិឯកជននេះ ក៏រឹតតែមិនមានថែមទៀតផង។
លោកបន្តថា ជាក់ស្ដែង ដីដែលកំពុងមានទំនាស់នេះជាដីគម្របព្រៃឈើរបស់រដ្ឋឆ្នាំ២០០២នៅឡើយ ហេតុនេះពុំមានបុគ្គលណាម្នាក់មានសិទ្ធិទៅអាស្រ័យផលបានឡើយ សូម្បីតុលាការក៏មិនអាចចាប់បង្ខំឱ្យបុគ្គលណាម្នាក់ទទួលយកបានដែរ។ លោកបន្ថែមថា ការកាន់កាប់ទៅបាន លុះត្រារដ្ឋធ្វើអនុប្រយោគពីដីសាធារណៈរបស់រដ្ឋទៅជាដីឯកជនរបស់រដ្ឋជាមុនសិន ទើបអាចអនុវត្តបាន។
លោកបន្តថា៖ «តាមពិតទៅ ដីនេះជាដីដែលមានទំនាស់នៅលើដីរបស់រដ្ឋនៅឡើយ។ រឿងនេះមែនទែនទៅ វាមិនមែនជាដីឯកជនទេ ហើយដាច់ខាតមិនអាចមានសាលដីកានៃតុលាការណាមួយកាត់ក្ដីលើដីរដ្ឋ ដើម្បីប្រគល់ទៅឱ្យបុគ្គលឯកជនបានទេ។ ច្បាប់របស់ព្រះរាជាណាចក្រកម្ពុជារបស់យើងមិនអាចអនុញ្ញាតឱ្យមានទម្រង់បែបនេះបានឡើយ»។
នៅក្នុងបណ្ដឹងដែលអ្នកស្រី លី អ៊ុំអេង បានដាក់ប្ដឹងទៅតុលាការកាលពីថ្ងៃទី១៤ ខែកុម្ភៈនោះ ធ្វើឡើងបន្ទាប់ពីចៅហ្វាយស្រុកបន្ទាយស្រី លោក ឃឹម ហ្វីណង់ កាលពីខែមករា ឆ្នាំ២០២២ កន្លងទៅនេះ បានអនុវត្តរំលោភលើដីការក្សាការពាររបស់តុលាការផង និងប្រមូលប្រជាពលរដ្ឋមកពីតំបន់ផ្សេងឱ្យចូលមកចាប់ដីរបស់អ្នកស្រីធ្វើជាកម្មសិទ្ធិផង។
ពាក្យបណ្ដឹងបង្ហាញទៀតថា អ្នកស្រី លី អ៊ុំអេង បានទិញដីដែលស្ថិតក្នុងទីតាំងកំពុងមានវិវាទ ក្នុងឃុំរំចេក ស្រុកបន្ទាយស្រីនេះ តាំងពីឆ្នាំ២០០៣ ក្នុងទំហំ២០០ហិកតា ពីអ្នកភូមិផ្សេងៗគ្នា។ ក្រោយពីទិញរួច ដីនេះ អ្នកស្រីបានផ្ទេរនិងដាក់ឈ្មោះទៅឱ្យកូនស្រីឈ្មោះ លី សេងឆៃ ជាអ្នកគ្រប់គ្រង។ គិតចាប់ពីថ្ងៃទិញមកដល់សព្វថ្ងៃនេះ អ្នកស្រី លី អ៊ុំអេង អះអាងថា មានរយៈពេល១៩ឆ្នាំហើយ ហើយអ្នកស្រីអាស្រ័យផលជាប្រចាំ ដោយមានរបងព័ទ្ធជុំវិញដី មានផ្លូវ និងដំណាំហូបផ្លែ ជាដើម។
បើតាមអ្នកស្រី លី អ៊ុំអេង ចាប់តាំងពីទិញរួច អភិបាលស្រុកបន្ទាយស្រីបានផ្លាស់ប្ដូរអស់៧រូបមកហើយ ប៉ុន្តែពុំមានបញ្ហាអ្វីទេ។ អ្នកស្រីបន្តថា ទើបតែនៅក្នុងអាណត្តិអភិបាលស្រុកថ្មីនេះប៉ុណ្ណោះ ទើបមានបញ្ហាកើតឡើង។
វីអូឌី មិនអាចសុំការឆ្លើយតបពីអយ្យការអមសាលាដំបូងខេត្តសៀមរាប អ្នកស្រី សាត ធីតា បានទេ នៅថ្ងៃសុក្រនេះ ខណៈមេឃុំរំចេក លោក ឌឹក អ៊ីង មិនអាចទាក់ទងបាន។
ប៉ុន្តែតាមរយៈបណ្ដឹងប្រឆាំងអភិបាលស្រុកបន្ទាយស្រីដែលដាក់ទៅតុលាការ គឺតំណាងអយ្យការបានទទួលរួចហើយកាលពីថ្ងៃទី១៥ ខែកុម្ភៈ។ ទាក់ទិនរឿងនេះ អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា យល់ឃើញថា បើផ្អែកលើអង្គហេតុនេះ ទំនងម្ចាស់ភាគីទទួលបានឯកសារទិញលក់ត្រឹមត្រូវនិងស្របទៅតាមច្បាប់៕