នៅមន្ទីរពេទ្យភ្នំពេញមួយក្នុងខណ្ឌចំការមន បុរសជនជាតិចិនម្នាក់ដែលមានអាយុជាង៣០ឆ្នាំ កំពុងតែសម្រាកបញ្ចូលឈាមពីរកំប្លោកក្នុងមួយថ្ងៃ ខណៈគាត់បានសម្រាកនៅមន្ទីរពេទ្យនោះតាំងពីថ្ងៃសុក្រសប្ដាហ៍មុន។
បុរសជនជាតិចិននេះបានប្រាប់ថា ពេញមួយតួខ្លួនរបស់គាត់គឺហើមនិងមានអាការហើមពោះ។ បុគ្គលិកនៅមន្ទីរពេទ្យពិនិត្យគាត់យ៉ាងយកចិត្តទុកដាក់ ហើយគាត់គិតថាខ្លួនគាត់ជាសះស្បើយហើយ។
ក្នុងសប្ដាហ៍នេះ បុរសជនជាតិចិនរូបនោះបានលើកឡើងអំពីប្រតិបត្តិការឆបោកនៅកម្ពុជា ដែលត្រូវបានគេបូមឈាមរបស់គាត់ជាច្រើនដងតាំងពីខែសីហា ធ្វើឱ្យស្ថានភាពសុខភាពគាត់ទន់ខ្សោយនិងមានហានិភ័យខ្ពស់។
លោកលើកឡើងថា គាត់មកដល់កម្ពុជានៅខែមិថុនា ឆ្នាំមុន ហើយធ្លាប់ជាអ្នកធ្វើការជាសន្តិសុខនៅទីក្រុងប៉េកាំង ប្រទេសចិន ប៉ុន្តែដោយការដឹងដំណឹងថាមានការងារដែលផ្ដល់ប្រាក់ចំណូលបានច្រើនជាងនៅឯខេត្តក្វាន់ស៊ី ជិតព្រំដែនវៀតណាម ទើបគាត់សម្រេចចិត្តចេញដំណើរមក។
បន្ទាប់ពីស្នាក់នៅ៦យប់នៅទីក្រុងពីងសៀន នៅព្រំដែន គាត់ត្រូវបានគេហៅឱ្យសម្ភាសការងារ គាត់មិនឆ្ងល់ទេថាការសម្ភាសប្រព្រឹត្តឡើងនៅពេលរាត្រី ព្រោះវាជាការងារនៅឯក្លឹបរាត្រី។ លោកត្រូវបានឡានមួយមកយក ជាមួយនឹងអ្នកដែលរកការងារធ្វើម្នាក់ទៀត។
ប៉ុន្តែក្រោយពីផ្លាស់ប្ដូរទៅឡានមួយទៀត គាត់បាននិយាយថា៖ «កាំភ្លើងត្រូវបានដកឡើងមក ហើយពួកយើងក៏ដឹងថាវាហួសពេលទៅហើយ»។
គាត់បាននិយាយទៀតថា៖ «ពួកយើងត្រូវបានបង្ខំឱ្យផឹកទឹក អំឡុងពេលធ្វើដំណើរ។ ខ្ញុំត្រូវបានគេបង្ខំឱ្យផឹកទឹកសុទ្ធ និងម្នាក់ទៀតត្រូវបង្ខំឱ្យផឹកកូកាកូឡា»។
លោកបន្តថា បន្ទាប់មក គាត់ក៏បានគេងលក់ តាមមើលទំនងដោយសារសារជាតិថ្នាំដែលដាក់ក្នុងទឹកនិងភេសជ្ជៈនោះ។
បន្ទាប់ពីការធ្វើដំណើរប៉ុន្មានថ្ងៃ គាត់ត្រូវបានដឹកដោយរថយន្តឆ្លងពីប្រទេសវៀតណាមមកកាន់កម្ពុជា។ ឡាននិងឈ្មួញត្រូវបានផ្លាស់ប្ដូររហូត ហើយអ្នករួមដំណើរកាន់តែច្រើន គាត់គិតថាគាត់មកដល់ទីក្រុងព្រះសីហនុ នៅថ្ងៃទី២៧ ខែមិថុនា ឆ្នាំ២០២១។
បុរសដែលពិបាកក្នុងការដកដង្ហើម កំពុងនិយាយនៅគ្រែមន្ទីរពេទ្យភ្នំពេញ ថាជើងរបស់គាត់ត្រូវបានស្ពឹកស្រពន់ដោយសារការវាយដំនិងការឆក់ អំឡុងពេលដែលគាត់បានជាប់ឃុំឃាំង។
ក្រោយពីការមកដល់កាលពីឆ្នាំមុន ទីកន្លែងដែលគាត់បានឈប់ដំបូងគឺ «អាគាជីនស៊ី១០ (Jinshui building 10)» ក្នុងទីក្រុងព្រះសីហនុ ដែលគេនិយមហៅ «ឆាយណាថោន China Town» ដោយមានបរិវេណជិតឆ្នេរអូរត្រេះ។
ដោយសារបុរសចិនរូបនេះបដិសេធមិនទៅកន្លែងផ្សេងតាមការបញ្ជា ទើបគេចោទថា គាត់ជាជនល្មើសឆបោកតាមប្រព័ន្ធអនឡាញ ហើយជាហេតុគាត់ត្រូវបានគេវាយដំ។
គាត់បាននិយាយថា ពួកគេឃើញថា «ខ្ញុំមិនដឹងអ្វីទាំងអស់ ទើបពួកគេលក់ខ្ញុំ» ។
ក្រោយពីនៅទីនោះបាន២សប្ដាហ៍ លោកត្រូវបានចំណាយពេលមួយខែកន្លះនៅឯទីតាំងមួយទៀតនៅខេត្តកោះកុង ដោយគាត់ក៏ត្រូវគេវាយដំ ហើយក៏បញ្ជូនត្រលប់មក ឆាយណាថោន ទីកន្លែងដែលគាត់ស្គាល់ថា «ខៃបូ (Kaibo)»។
លោកបានលើកឡើងថា នៅខែសីហា ពួកគេបានចាប់ផ្ដើមបូមឈាមរបស់គាត់ ដោយសារតែលោកបដិសេធមិនព្រមធ្វើការនូវអ្វីដែលជាការចង់បានរបស់ពួកគេ។
បុរសជនជាតិចិនដដែលបានបន្តទៀតថា៖ «ពួកគេមិនបានបូមឈាមគ្រប់គ្នានោះទេ អ្នកខ្លះក្រោយពីបានពិនិត្យ បានបូមឈាមតែមួយកំប្លោកហើយក៏ឈប់ មិនដូចជាខ្ញុំ ប្រភេទឈាមរបស់ខ្ញុំ ពួកគេបូមច្រើនជាងគេ។ ក្នុងនោះមានមនុស្សម្នាក់ទៀតដូចជាខ្ញុំដែរ ដែលមានប្រភេទឈាម អូ ស្រដៀងគ្នានឹងខ្ញុំ ហើយម្នាក់នោះបានចេញពីកន្លែងឃុំឃាំងមុនខ្ញុំ គាត់ត្រូវបានគេបញ្ជូនទៅកន្លែងឆ្ងាយមួយទៀត»។
ប្រភពដដែលបន្ថែមថា គ្រូពេទ្យដែលបានបូមឈាមរបស់លោកមើលទៅពិតជាមានជំនាញ ហើយថាពួកគេបូមឈាម២សាក់ ឬ២កំប្លោក ដោយ១កំប្លោកចំណុះ៣៥០មីលីលីត្រ ហើយយកក្លាហ្សេកន្លែងត្រជាក់។
បុរសជនជាតិចិននេះក៏បាននិយាយថា គាត់មិនដឹងថាឈាមរបស់គាត់ត្រូវបានយកទៅណានោះឡើយ។
ក្នុងរយៈពេលប៉ុន្មានខែនោះ គាត់ត្រូវបានបូមឈាមចំនួន៧ដង រហូតគេមិនអាចបូមគាត់បន្តទៀតបាន។
កាកបាទក្រហមអាមេរិក ណែនាំឱ្យមានការរង់ចាំយ៉ាងហោចណាស់៨សប្ដាហ៍មុនពេលបរិច្ចាគឈាមម្ដងទៀត ហើយការបរិច្ចាគឈាមជាមធ្យម គឺប្រហែល៤៧០មីលីលីត្រ។ អ្នកដែលមានឈាមប្រភេទ O (អូ) គឺជាអ្នកបរិច្ចាគដែលមានភាពទូលំទូលាយជាងគេ ដែលអាចផ្ដល់កោសិកាឈាមក្រហមដល់មនុស្សដែលមានឈាមប្រភេទផ្សេងទៀតបាន។
ស្ថានទូតចិនប្រចាំទីក្រុងភ្នំពេញ បានទទួលស្គាល់ករណីនេះក្នុងសេចក្ដីថ្លែងការណ៍មួយដែលចេញកាលពីល្ងាចថ្ងៃពុធ។
ស្ថានទូតបានថ្លែងថា៖ «បុរសនោះត្រូវបានបោកបញ្ឆោត ដោយការផ្សាយពាណិជ្ជកម្មការងារមិនពិត ហើយត្រូវបានបង្ខិតបង្ខំដោយឧក្រិដ្ឋជនឱ្យរត់ពន្ធមកស្រុកខ្មែរ»។
សេចក្ដីថ្លែងការណ៍ដដែលបន្តថា៖ «ក្រោយមក គាត់ត្រូវបានឃុំខ្លួនដោយក្រុមអ្នកលេងល្បែងស៊ីសងតាមអ៊ីនធឺណិតខុសច្បាប់ និងក្រុមជនទុច្ចរិតនៅ Chinatown ក្នុងខេត្តព្រះសីហនុ។ ហើយមានការបូមឈាមរបស់គាត់ច្រើនដង រហូតដល់គាត់ស្ថិតក្នុងស្ថានភាពធ្ងន់ធ្ងរ»។
ស្ថានទូតបានរាយការណ៍ទៅកាន់ប៉ូលិសដែលកំពុងធ្វើការស៊ើបអង្កេតករណីនេះ។
ប្រធានមន្ទីរពេទ្យ Phnom Penh’s Bethune Cambodia China First Hospital លោក Zhu Minxue បានប្រាប់សារព័ត៌មានចិនថា បុរសនោះត្រូវបានបញ្ជូនទៅមន្ទីរពេទ្យក្នុងស្ថានភាពធ្ងន់ធ្ងរ។
លោកបានប្រាប់ Shangyou News ថា៖ «ប្រធានគិលានុបដ្ឋាយិកាព្យាយាមស្វែងរកសរសៃវ៉ែន។ គាត់បាននិយាយថា គិលានុបដ្ឋាយិកាត្រូវចោះភ្លៅរបស់គាត់ ដើម្បីស្វែងរកសរសៃដែលអាចប្រើប្រាស់បាន»។
បុគ្គលិកម្នាក់បានលើកទូរសព្ទនៅមន្ទីរពេទ្យ Bethune កាលពីថ្ងៃពុធ ប៉ុន្តែមិនបានប្រាប់ឈ្មោះរបស់គាត់ទេ។
បុគ្គលិករូបនោះបាននិយាយថា៖ «ពេលគាត់ [ជនរងគ្រោះ] បានមកដល់ គាត់ស្ថិតក្នុងស្ថានភាពធ្ងន់ធ្ងរ រាងកាយគាត់ហើម ហើយមុខគាត់ស្លេកស្លាំងគ្មានឈាម។ យើងមិនធ្លាប់ឃើញសភាពអ៊ីចឹងពីមុនមកទេ នៅទីនេះ»។
លោកបាននិយាយថា៖ «គាត់ថាជនជាតិចិនបានបូមឈាមគាត់ដើម្បីធ្វើទារុណកម្ម ព្រោះគាត់មិនស្ដាប់បង្គាប់តាមជនជាតិចិនទាំងនោះ»។
លោកបន្តថា៖ «ខ្ញុំមានអារម្មណ៍អាណិត វាមិនគួរកើតឡើងទេ នេះជាអំពើឃោរឃៅ»។
បុគ្គលម្នាក់ដែលលើកទូរសព្ទនៅសណ្ឋាគារ KB ក្នុងតំបន់ Chinatown ក្រុងព្រះសីហនុ ដែលគេហៅជាភាសាចិនថា Kaibo បានបិទទូរសព្ទរបស់អ្នកយកព័ត៌មាន។ អគារជាច្រើនជុំវិញសណ្ឋាគារដែលជនរងគ្រោះត្រូវបានសង្គ្រោះ ត្រូវបានចោទប្រកាន់ពីបទជួញដូរនិងឃុំខ្លួន។ ជនរងគ្រោះមិនបាននិយាយថាខ្លួននៅសណ្ឋាគារនោះទេ។
ចំណែកការទូរសព្ទហៅទៅ «រីសតតារាសាគរ» របស់ក្រុមហ៊ុន Union Development Group ក្នុងខេត្តកោះកុង ដែលបុរសជនជាតិចិនរូបនេះជឿថាខ្លួនត្រូវបានយកទៅទីនោះ ត្រូវបានគេបដិសេធ។
តំណាងក្រុមហ៊ុនតារាសាគរម្នាក់ដែលសុំមិនបញ្ចេញឈ្មោះបានសួរថា៖ «យើងមិនដឹងអំពីរឿងនេះទេ ហើយយើងក៏មិនដែលបានឮរឿងនេះដែរ។ តើគាត់ឈ្មោះអ្វី? ហើយឥលូវគាត់នៅឯណា?។
គាត់បន្តថា៖ «ទីតាំងរបស់យើងធំណាស់ ហើយវាមិនមែនមានតែក្រុមហ៊ុនមួយទេនៅទីនេះ។ អ្នកគួរបញ្ជាក់ជាមួយគាត់ឱ្យបានច្បាស់ថា ក្រុមហ៊ុនណាដែលគាត់ធ្វើការជាមួយ»។
កាលពីថ្ងៃពុធ នគរបាលខេត្តកោះកុង និងខេត្តព្រះសីហនុមិនអាចទាក់ទងបានទេ។ ប្រធានរដ្ឋបាលខេត្តកោះកុង លោក សេក សំអុល មានប្រសាសន៍ថា លោកមិនមានព័ត៌មានអំពីករណីនេះទេ។
អភិបាលក្រុងព្រះសីហនុ លោក អ៊ី សុខឡេង មានប្រសាសន៍ថា ការគ្រប់គ្រងតំបន់ Chinatown គឺហួសពីលទ្ធភាពរបស់លោក។
លោកបានបន្តថា៖ «នេះគឺហួសពីការគ្រប់គ្រងរបស់ទីក្រុង ព្រោះទីតាំងរបស់ពួកគេមានទំហំធំ។ ទាក់ទងនឹងការអនុញ្ញាត វាអាចនៅថ្នាក់ជាតិ។ […] នេះគឺហួសពីសមត្ថភាពរបស់យើង ហើយខ្ញុំមិនអាចនិយាយលម្អិតអំពីវាបានឡើយ»។
អ្នកនាំពាក្យក្រសួងទេសចរណ៍ លោក តុប សុភ័ក បានឱ្យដឹងថា ក្រសួងបានចេញអាជ្ញាបណ្ណសម្រាប់សណ្ឋាគារដែលមានចំនួនបន្ទប់លើសពី២១ ហើយក៏មានសិទ្ធិផ្អាក ប្រសិនបើមានករណីសង្ស័យទាក់ទងនឹងបទល្មើស។
ទោះជាយ៉ាងនេះក្ដី លោក សុភ័ក មានប្រសាសន៍ថា៖ «នៅពេលដែលមានបទល្មើសកើតឡើង វាមិនមែនក្រសួងទេសចរណ៍ដែលត្រូវពិនិត្យនោះទេ ប៉ុន្តែអាជ្ញាធរមូលដ្ឋានជាអ្នកចាត់វិធានការ»។
លោកបន្តថា៖ «អាជ្ញាធរ [ក្នុងស្រុក] មានសិទ្ធិបិទសណ្ឋាគារ ឬស្នើសុំក្រសួងឱ្យផ្អាកអាជ្ញាបណ្ណ»។
បុរសជនជាតិចិនរូបនោះបន្តបញ្ចូលឈាមជារៀងរាល់ថ្ងៃនៅមន្ទីរពេទ្យភ្នំពេញ។
ជនរងគ្រោះដោយការជួញដូរដែលសុំមិនបញ្ចេញឈ្មោះ ទោះបីជាគាត់បានផ្ដល់រូបថត និងនិយាយថា គាត់ចង់ចែករំលែកព័ត៌មានលម្អិតអំពីស្ថានភាពរបស់គាត់ ដើម្បីជំរុញឱ្យមានវិធានការ។ តាមការផ្ដាំផ្ញើរបស់គ្រូពេទ្យប្រាប់ថា ប្លោកឈាមត្រូវបានព្យួរពីលើគ្រែរបស់គាត់។ គាត់និយាយថា គាត់នៅតែត្រូវបានគេពិនិត្យបន្តទៀត ហើយមិនដឹងថាអាចត្រូវបានចេញពីពេទ្យនៅពេលណានោះទេ។
គាត់នឹកឃើញពេលជាប់ឃុំឃាំង ដែលត្រូវគេបញ្ជូនទៅវិញទៅមកមិនចេះចប់មិនចេះហើយនៅក្រុងព្រះសីហនុ។
លោកនិយាយថា៖ «ពួកគេបាននិយាយថា ក្រោយចូលឆ្នាំចិន ពួកគេនឹងកម្ចាត់ខ្ញុំ ពីព្រោះខ្ញុំគ្មានឈាមនៅសល់ទេ ហេតុនេះពួកគេមិនអាចមានអ្វីច្រើនទៀតដែលត្រូវចម្រាញ់ពីខ្ញុំឡើយ។ ពួកគេចង់បានប្រាក់ចុងក្រោយដែលចេញពីខ្លួនរបស់ខ្ញុំ»៕
បកប្រែនិងសម្រួលពីអត្ថបទដើមភាសាអង់គ្លេសដែលមានចំណងជើងថា «Trafficking Victim Alleges His Blood Was Harvested in Sihanoukville» ដោយកញ្ញា ឃ្លាំង គីមហួយ និងកញ្ញា សម ពេជ្រចិន្តា។