ក្រសួងសុខាភិបាលប្រកាសរកឃើញអ្នកឆ្លងជំងឺកូវីដ-១៩ ប្រភេទ «អូមីក្រុង» ៥៥២ នាក់បន្ថែមទៀត ក្នុងនោះករណីឆ្លងចូលសហគមន៍ ៥៣៩ នាក់។
សេចក្ដីប្រកាសព័ត៌មានរបស់ក្រសួងសុខាភិបាល នៅថ្ងៃទី១៩ ខែកុម្ភៈ ឆ្នាំ២០២២ បានឱ្យដឹងថា យោងតាមលទ្ធផលបញ្ជាក់ដោយ PCR test កាលពីម្សិលមិញ ក្រសួងបានរកឃើញករណីឆ្លងជំងឺកូវីដ-១៩ប្រភេទ អូមីក្រុង ចំនួន៥៥២នាក់ ក្នុងនោះ ករណីឆ្លងចូលសហគមន៍៥៣៩នាក់ និងករណីនាំចូលចំនួន១៣នាក់។ ចំណែកអ្នកជាសះស្បើយថ្មីចំនួន ២៨៥ នាក់ ខណៈអ្នកស្លាប់ដោយជំងឺកូវីដ-១៩ នោះ មិនមានទេ។
គិតត្រឹមថ្ងៃទី១៩ ខែកុម្ភៈ ឆ្នាំ២០២២ កម្ពុជារកឃើញអ្នកឆ្លងជំងឺកូវីដ-១៩ សរុប ១២៥ ៧៥៣នាក់ ក្នុងនោះ ករណីនាំចូលសរុប ២០ ៥៦៦ នាក់ ខណៈអ្នកជាសះស្បើយសរុប១២០ ១៦៥នាក់ និងអ្នកស្លាប់សរុប៣ ០១៥នាក់។
ចំណែក ករណីឆ្លងអូមីក្រុងក្នុងសហគមន៍វិញ ក្រសួងថា គិតមកដល់ថ្ងៃទី១៩ ខែកុម្ភៈនេះ បានកើនដល់៤ ៦០៣ នាក់ហើយ។ ការបន្តរកឃើញអ្នកឆ្លងកូវីដ-១៩ អូមីក្រុងនេះ បានជម្រុញឱ្យលោកនាយករដ្ឋមន្ត្រី ហ៊ុន សែន ចេញបញ្ជាជាថ្មីទៀតថ្ងៃទី១៧ ខែកុម្ភៈ ឆ្នាំ២០២២ ទៅអាជ្ញាធរនិងក្រសួងពាក់ព័ន្ធឱ្យបង្កើនប្រសិទ្ធភាពទប់ស្កាត់ហានិភ័យប្រព័ន្ធសុខាភិបាល ក្រោយពីរកឃើញថា មេរោគបំប្លែងថ្មីប្រភេទ «អូមីក្រុង» កំពុងឆ្លងលឿនក្នុងសហគមន៍នាប៉ុន្មានសប្ដាហ៍ជាប់គ្នាមកនេះ៕
