កូដករណាហ្គាវើលដ៍ចំនួន ៤នាក់ បានចូលខ្លួនទៅបំភ្លឺនៅស្នងការដ្ឋាននគរបាលរាជធានីភ្នំពេញ កាលពីរសៀលថ្ងៃសុក្រ ក្រោយរងការចោទថា បានរារាំងដល់ការអនុវត្តវិធានការសុខាភិបាលប្រយុទ្ធនឹងជំងឺកូវីដ-១៩ ប៉ុន្តែពួកគេបង្ហាញការសោកស្តាយដែលសមត្ថកិច្ច បានបញ្ជូនសំណុំរឿងនេះទៅតុលាការ មុនពួកគេចូលឆ្លើយបំភ្លឺទៅតាមការកំណត់។
ការចូលខ្លួនបំភ្លឺរបស់កូដករណាហ្គាវើលដ៍ទាំង៤រូបនេះ ធ្វើឡើងក្រោយមានដីកាបញ្ជាឱ្យចូលខ្លួនពីអយ្យការអមសាលាដំបូងរាជធានីភ្នំពេញ ពាក់ព័ន្ធនឹងករណី «រារាំងដល់ការអនុវត្តវិធានការ» ខណៈស្នងការនគរបាលរាជធានីភ្នំពេញ កាលពីថ្ងៃទី៥ ខែកុម្ភៈ បានតម្រូវឱ្យអ្នកទាំង៤បង្ហាញខ្លួនឱ្យបានមុនថ្ងៃទី១៩ ខែកុម្ភៈ ដើម្បីសាកសួរ។
ស្ត្រីជាកូដករណាហ្គាវើលដ៍ទាំង៤នាក់ដែលត្រូវចូលខ្លួនទៅបំភ្លឺនោះ រួមមាន ឈ្មោះ ខេង ចិន្ដា, អ៊ុក សុភ័ក្រម៉ូលីកា, អេង ស្រីបូ និង ម៉េង កាក់នីកា។
កូដករ និងជាសកម្មជនសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៏ដ កញ្ញា អេង ស្រីបូ ដែលបានទៅចូលបំភ្លឺនៅស្នងការដ្ឋាននគរបាលរាជធានីភ្នំពេញ បានលើកឡើងថា កញ្ញាមានការខកចិត្តដែលអាជ្ញាធរបញ្ជូនសំណុំរឿងរបស់អ្នកទាំង៤ទៅតុលាការ ទាំងដែលមិនបានផ្តល់ដំណឹងដល់ពួកគេ ខណៈការកំណត់នៃការចូលទៅបំភ្លឺនៅស្នងការដ្ឋាន នៅមិនទាន់ដល់កាលផុតកំណត់នៅឡើយ។
កញ្ញានិយាយថា៖ «ហេតុអីបានជាខ្ញុំចូលខ្លួនស្រាយបំភ្លឺមុនថ្ងៃទី១៩ [ខែកុម្ភៈ ហើយ] ថ្ងៃនេះទើបថ្ងៃទី១៨ហ្នឹង ហេតុអីបានខាងគាត់ៗនិយាយថាករណីខ្ញុំ ៤នាក់គឺត្រូវបញ្ជូនទៅតុលាការ? ខ្ញុំឆ្ងល់តែកន្លែងហ្នឹងទេ! ថាវាមានរឿងអី? ហេតុអីបានករណីរបស់ខ្ញុំអត់ទាន់ដល់ថ្ងៃផុតកំណត់ផង? ហេតុអីបញ្ជូនទៅតុលាការ?»។
យ៉ាងណា កញ្ញាថា នឹងរង់ចាំពិភាក្សាជាមួយអ្នកតវ៉ាផ្សេងទៀត ថាតើនឹងត្រូវធ្វើយ៉ាងណាបន្តទៀត បន្ទាប់ពីអាជ្ញាធរអះអាងថាករណីរបស់ពួកគេផុតពីដៃស្នងការដ្ឋាននគរបាលហើយ។
ប្រធានសហព័ន្ធសហជីពកម្មករចំណីអាហារ និងសេវាកម្មកម្ពុជា លោកស្រី អ៊ូ ទេពផល្លីន ដែលចូលរួមតាមដានការបង្ហាញខ្លួនរបស់កូដករទាំង៤នោះ ថ្លែងថា លោកស្រីពិតជាមិនយល់ពីនិតិវិធីរបស់អាជ្ញាធរទៅលើអ្នកតវ៉ាទាំង៤នាក់ ខណៈកាលបរិច្ឆេទក្នុងដីកាបញ្ជាឱ្យចូលខ្លួនស្រាយបំភ្លឺ ផុតកំណត់នៅថ្ងៃទី១៩ខែកុម្ភៈ ប៉ុន្តែអាជ្ញាធរបែរជាឆ្លើយតបថា សំណុំរឿងទាំងនោះបានផុតពីដៃស្នងការនៅថ្ងៃទី១៨ខែកុម្ភៈ នេះទៅវិញ។
លោកស្រីថា៖ «ព្រះរាជអាជ្ញាគឺជាអ្នកអនុវត្តច្បាប់។ តែដល់ពេលចេញមកមិនមានការសង់តង់គ្នា មិនមានការស៊ីសង្វាក់គ្នា រវាងអាជ្ញាធរហើយនិងតុលាការ ហើយនិងព្រះរាជអាជ្ញា ហើយ[គ្មានការ]ទំនាក់ទំនងមកសាមីជន។ មែនទែនទៅសាមីជនគាត់មកនេះមកដោយឆន្ទៈពិតប្រាកដរបស់គាត់តាមរយៈការបង្ហោះ page ផ្លូវការហ្នឹងឯង ដោយសារឃើញឈ្មោះគាត់ បើអត់ឃើញឈ្មោះគាត់ ក៏គាត់អត់មកដែរ»។
វីអូឌីមិនអាចសុំការបកស្រាយពីអគ្គស្នងការរង និងជាស្នងការនគរបាលរាជធានីភ្នំពេញ លោក ស ថេត និងអ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា បានទេពាក់ព័ន្ធករណីនេះ។
កាលពីថ្ងៃទី៥ ខែកុម្ភៈ សមត្ថកិច្ចរាជធានីភ្នំពេញ បានចាប់ខ្លួនកូដករក្រុមហ៊ុនណាហ្គាវើលដ៍ចំនួន៦នាក់ ប៉ុន្តែ៣នាក់ត្រូវបានដោះលែងទៅវិញ ខណៈកូដករ៣នាក់ទៀតត្រូវបានតុលាការចោទប្រកាន់និងឃុំខ្លួនពួកគាត់បណ្ដោះអាសន្ននៅពន្ធនាគារ ក្រោមបទចោទ «រារាំងដល់ការអនុវត្តវិធានការប្រយុទ្ធនឹងជំងឺកូវីដ-១៩»។
រហូតមកទល់ពេលនេះ មានថ្នាក់ដឹកនាំសហជីពនិងកូដករក្រុមហ៊ុនណាហ្គាវើលដ៍ចំនួន១១នាក់ហើយត្រូវបានតុលាការសម្រេចឃុំខ្លួន ដោយចោទប្រកាន់ពីបទ «ញុះញង់ឱ្យមានកូដកម្ម» និង «ល្មើសវិធានការច្បាប់ប្រឆាំងកូវីដ-១៩» ខណៈកូដករ៤នាក់ទៀតត្រូវប្រឈមការចាប់ខ្លួនក្រោមបទចោទថា «រារាំងដល់ការអនុវត្តវិធានការប្រយុទ្ធនឹងជំងឺកូវីដ-១៩» ផងដែរ៕
