ក្រសួងសុខាភិបាលបានប្រកាសរកឃើញអ្នកជំងឺកូវីដ-១៩ ចំនួន ២នាក់បន្ថែមទៀតបានស្លាប់ដោយជំងឺនេះ កាលពីម្សិលមិញ ដែលធ្វើឱ្យកម្ពុជាមានអ្នកស្លាប់ដោយវីរុសកូវីដ-១៩ កើតឡើងសរុបចំនួន៣ ០១៧នាក់។
ការប្រកាសរកឃើញចំនួនអ្នកស្លាប់ដោយកូវីដ-១៩ ឡើងវិញនេះ ក្រោយពេលក្រសួងប្រកាសពីករណីគ្មានអ្នកស្លាប់ដោយសារជំងឺនេះចំនួន ៤៦ថ្ងៃជាប់ៗគ្នាមកហើយ ពោលគឺចាប់តាំងពីដើមខែមករាមក។
សេចក្ដីប្រកាសព័ត៌មានរបស់ក្រសួងសុខាភិបាល នៅថ្ងៃទី២០ ខែកុម្ភៈ ឆ្នាំ២០២២ បានឱ្យដឹងថា កាលពីម្សិលមិញ បានរកឃើញមានអ្នកជំងឺកូវីដ-១៩ ប្រភេទបំប្លែងខ្លួន «អូមីក្រុង»ចំនួន ៧៣៦នាក់។ អ្នកជំងឺដែលរកឃើញឆ្លងថ្មីទាំងនោះ មាន ៧៣០ករណី ជាការរកឃើញឆ្លងចូលក្នុងសហគមន៍ និង៦ករណីទៀត ជាការនាំចូលពីក្រៅប្រទេស។
តែយ៉ាងណាក្រសួងសុខាភិបាលមិនបានបញ្ជាក់ឡើយថា ករណីស្លាប់ថ្មី ២នាក់នោះ ជាអ្នកជំងឺប្រភេទមេរោគណាមួយច្បាស់នៅឡើយ ប៉ុន្តែលោកនាយករដ្ឋមន្ត្រី ហ៊ុន សែន ធ្លាប់អះអាងកាលពីពេលថ្មីៗនេះថា កម្ពុជាលែងមានជំងឺប្រភេទ ដែលតា ឬ អាល់ហ្វាទៀតហើយ ពោលគឺសុទ្ធតែប្រភេទអូមីក្រុងទាំងអស់។
ក្រសួងបញ្ជាក់ថា មកទល់ព្រឹកថ្ងៃអាទិត្យនេះ កម្ពុជារកឃើញករណីជំងឺកូវីដ-១៩ប្រភេទបំប្លែងខ្លួន «អូមីក្រុង» បានឆ្លងចូលទៅក្នុងសហគមន៍មានចំនួនសរុប ៥ ៣៣៣ករណី។
កម្ពុជាបានរកឃើញអ្នកឆ្លងវីរុសកូវីដ-១៩ បំប្លែងខ្លួន «អូមីក្រុង» ជាលើកដំបូង កាលពីថ្ងៃទី ១៤ខែធ្នូ ឆ្នាំ២០២១ លើស្ត្រីខ្មែរម្នាក់ ដែលធ្វើដំណើរពីប្រទេសហ្គាណា នៃតំបន់អាហ្វ្រិកខាងលិច មកកម្ពុជា។
គិតត្រឹមព្រឹកថ្ងៃអាទិត្យដដែលនេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន១២៦ ៤៨៩នាក់ ក្នុងនោះ អ្នកជំងឺព្យាបាលជាសះស្បើយចំនួន១២០ ៤៦២នាក់ អ្នកស្លាប់ចំនួន៣ ០១៧នាក់ និងករណីនាំចូលពីក្រៅប្រទេសចំនួន ២០ ៥៧២នាក់៕
