សកម្មជនដែលស្រឡាញ់ការងារសង្គម បាននាំគ្នាបន្តធ្វើយុទ្ធនាការបង្ហោះប៉ោងប៉ោងនៅថ្ងៃអាទិត្យនេះ ដើម្បីជាសារលើកទឹកចិត្តដល់ថ្នាក់ដឹកនាំនិងសកម្មជនសហជីពណាហ្គាវើលដ៍ថា ពួកគេមិននៅឯកាទេ ព្រមទាំងទាមទារឱ្យតុលាការដោះលែងពួកគេដែលកំពុងជាប់ឃុំទាំង ១១នាក់ឱ្យមានសេរីភាពវិញ។
ក្នុងទំព័រហ្វេសប៊ុករបស់កញ្ញា ឈឿន ដារ៉ាវី បានឱ្យដឹងនៅថ្ងៃអាទិត្យទី២០ ខែកុម្ភៈនេះ ថា យុវជនខ្មែរថាវរៈ រួមជាមួយយុវជនខេត្តសៀមរាបនៅសប្តាហ៍ទី២នេះ បានបន្តបង្ហោះប៉ោងប៉ោងចំនួន១០០បន្ថែមទៀតនៅចំណុចភ្នំក្រោម ក្នុងខេត្តសៀមរាប ដើម្បីបង្ហាញសារបែបឌឺដងទៅក្រុមហ៊ុនណាហ្គាវើលដ៍អំពីភាពជោគជ័យនៃការធ្វើទុក្ខបុកម្នេញលើបុគ្គលិកនិងថ្នាក់ដឹកនាំសហជីព។
លើសពីនេះ ការបង្ហោះប៉ោងប៉ោងនោះ ក៏ជាសារលើកទឹកចិត្តដល់ពួកគេកំពុងជាប់ឃុំ និងស្នើឱ្យដោះស្រាយវិវាទការងារជូនកម្មករ រួមទាំងដោះលែងថ្នាក់ដឹកនាំសហជីព និងសកម្មជនចំនួន ១១នាក់ឱ្យមានសេរីភាពវិញ។
កាលពីថ្ងៃទី៥ ខែមករា ឆ្នាំ២០២២ ថ្នាក់ដឹកនាំនិងសកម្មជនសហជីពចំនួន៨នាក់ ក្នុងនោះមានប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ ផង ត្រូវបានតុលាការសម្រេចឃុំខ្លួនបណ្ដោះអាសន្នព្រៃស ក្រោមការចោទប្រកាន់ពីបទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍» តាមមាត្រា៤៩៤ និង៤៩៥ នៃក្រមព្រហ្មទណ្ឌ ក្រោយពីពួកគេដឹកនាំក្រុមកូដករទាមទារសិទ្ធិ និងលក្ខខណ្ឌការងារនៅក្នុងក្រុមហ៊ុនកាស៊ីណូណាហ្គាវើលដ៍។
កាលពីថ្ងៃទី៥ ខែកុម្ភៈ សមត្ថកិច្ចរាជធានីភ្នំពេញបានចាប់ខ្លួនកូដករក្រុមហ៊ុនណាហ្គាវើលដ៍ចំនួន៦នាក់ ប៉ុន្តែ៣នាក់ត្រូវបានដោះលែងទៅវិញ ខណៈកូដករ៣នាក់ទៀតត្រូវបានតុលាការចោទប្រកាន់ និងឃុំខ្លួនពួកគាត់បណ្ដោះអាសន្ននៅពន្ធនាគាររាជធានីភ្នំពេញ ក្រោមបទចោទ «រារាំងដល់ការអនុវត្តវិធានការប្រយុទ្ធនឹងជំងឺកូវីដ-១៩»។
យ៉ាងនេះក្តី កាលពីថ្ងៃទី១៨ ខែមករា ឆ្នាំ២០២២ សហជីពអន្តរជាតិ បានផ្ញើលិខិតមួយទៅកាន់លោកនាយករដ្ឋមន្ត្រី ហ៊ុន សែន ដោយលើកឡើងថា វិវាទការងារនៅក្រុមហ៊ុនណាហ្គាវើលដ៍បានកើតចេញពីការបរាជ័យជាយូរណាស់មកហើយរបស់ភាគីក្រុមហ៊ុន ក្នុងការគោរពសិទ្ធិកម្មករនិងសហជីព ចំពោះកិច្ចចរចាដោយសមូហភាព ដើម្បីទទួលបានប្រាក់ឈ្នួលនិងលក្ខខណ្ឌការងារកាន់តែល្អប្រសើរ។
លិខិតនោះបន្តថា ក្រុមហ៊ុនណាហ្គាវើលដ៍ មិនបានគោរពតាមគោលការណ៍របស់រដ្ឋាភិបាលលើការងារ សុវត្ថិភាព និងការការពារសុខភាពក្នុងអំឡុងពេលមានជំងឺកូវីដ-១៩នោះទេ។
ផ្ទុយទៅវិញ បុគ្គលិកនិយោជិតចំនួន១ ៣២៩នាក់ត្រូវបានបញ្ឈប់ពីការងារ ដោយមិនបានពិគ្រោះយោបល់ក្រោមច្បាប់ការងារកម្ពុជាឡើយ ហើយក្នុងចំណោមនោះមានបុគ្គលិក១ ១០០នាក់ គឺជាសមាជិកសហជីព៕
