ក្រុមប្រឹក្សាជាតិដើម្បីស្ត្រីរបស់រដ្ឋាភិបាល បានលើកឡើងពីភាពចាំបាច់រួមគ្នាដោះស្រាយបញ្ហាស្ត្រី ដើម្បីបង្កើនភាពអង់អាចរបស់ពួកគេក្នុងកិច្ចការសង្គម ក្រោយពីរកឃើញថា ការប្រឈមថ្មីៗនៅបន្តកើតឡើង បើទោះបីមានការខំប្រឹងប្រែងពីស្ថាប័នពាក់ព័ន្ធ។
លោកនាយករដ្ឋមន្ត្រី ហ៊ុន សែន នៅព្រឹកថ្ងៃចន្ទនេះ បានចូលរួមកិច្ចប្រជុំបូកសរុបលទ្ធផលការងារឆ្នាំ២០២២ របស់ក្រុមប្រឹក្សាជាតិកម្ពុជាដើម្បីស្រ្តី នៅទីស្ដីការគណៈរដ្ឋមន្ត្រី។
ក្រោយបិទបញ្ចប់កិច្ចប្រជុំបិទទ្វារ លោកនាយករដ្ឋមន្ត្រី ហ៊ុន សែន បានបង្ហោះសារនៅលើហ្វេសប៊ុកថា ក្នុងកិច្ចប្រជុំនោះ លោកស្រី ជូ ប៊ុនអេង ប្រធានក្រុមប្រឹក្សាជាតិកម្ពុជាដើម្បីស្រ្តី បានជំរុញឱ្យស្ថាប័នពាក់ព័ន្ធ រួមគ្នាបន្តដោះស្រាយបញ្ហាស្រី្ត បើទោះបីលោកស្រីថា បញ្ហាមួយចំនួនត្រូវបានដោះស្រាយក៏ដោយ។
លោកស្រីថា៖ «របាយការណ៍លទ្ធផលការងារឆ្នាំ២០២០-២០២១ បង្ហាញពីវឌ្ឍនភាពការប្រឈមថ្មីៗ និងចំណុចសេសសល់ទាំងឡាយ ដែលយើងទាំងអស់គ្នាចាំបាច់ត្រូវខិតខំបន្តការដោះស្រាយក្នុងបរិការណ៍នៃជំងឺកូវីដ-១៩ ដើម្បីស្ដារនិងជំរុញការអភិវឌ្ឍគ្រប់វិស័យតាមរយៈការបន្តអនុវត្តវិធានការផ្នែកគោលនយោបាយ កម្មវិធីនិងសកម្មភាពជាក់លាក់នានា ក្នុងការលើកកម្ពស់សមភាពយេនឌ័រ និងបង្កើនភាពអង់អាចដល់ស្ត្រី ដើម្បីការអភិវឌ្ឍប្រកបដោយបរិយាប័ន្ននិងចីរភាព»។
យ៉ាងណា លោកស្រី ជូ ប៊ុនអេង បញ្ជាក់ថា ការអភិវឌ្ឍសមត្ថភាពស្ត្រីជាថ្នាក់ដឹកនាំនៅថ្នាក់ជាតិនិងថ្នាក់ក្រោមជាតិ ការអភិវឌ្ឍសមត្ថភាពស្ត្រីជាថ្នាក់ដឹកនាំនិងមន្ត្រីរាជការជានារីនៅថ្នាក់ជាតិ ត្រូវបានយកចិត្តទុកដាក់ខ្ពស់ដោយថ្នាក់ដឹកនាំស្ថាប័ននីមួយៗ។
លោកស្រីបញ្ជាក់ថា ពីឆ្នាំ២០២០-២០២១ ស្ត្រីចំនួន២ ២៣៥នាក់ នៃចំនួនអ្នកចូលរួមសរុប៣ ៨៧១នាក់ បានចូលរួមសិក្ខាសាលាវគ្គបណ្ដុះបណ្ដាល និងជំនាញនានាទាំងក្នុងប្រទេសនិងក្រៅប្រទេស។ បន្ថែមពីនេះ លោកស្រីថា នៅរដ្ឋបាលថ្នាក់ក្រោមជាតិ និងក្រសួងកិច្ចការនារី បានរៀបចំកម្មវិធីអភិវឌ្ឍន៍សមត្ថភាពមន្ត្រីកិច្ចការនារី ក្នុងការអនុវត្តការងារ ការស្វែងរកការគាំទ្រមតិ ការបញ្ជ្រាបយេនឌ័រ និងបរិយាប័ន្ន សីលធម៌សង្គម និងភាពជាអ្នកដឹកនាំ និងដាក់បញ្ចូលទៅក្នុងកម្មវិធីវិនិយោគឃុំ-សង្កាត់ និងសមាហរណកម្មផែនការឃុំ-សង្កាត់ ថ្នាក់ ក្រុង ស្រុក ខណ្ឌ៕