គណៈកម្មាធិការជាតិរៀបចំការបោះឆ្នោត (គ.ជ.ប) បញ្ជាក់ថា មានគណបក្សនយោបាយចំនួន១១ហើយដែលបានត្រៀមចុះឈ្មោះនិងដាក់បេក្ខភាពឈរឈ្មោះ បម្រើឱ្យការបោះឆ្នោតជ្រើសរើសក្រុមប្រឹក្សាឃុំ-សង្កាត់ សម្រាប់នីតិកាលទី៥ខាងមុខនេះ ខណៈកាលបរិច្ឆេទនៃការទទួលចុះឈ្មោះនៅសល់ពេលប្រមាណ១០ថ្ងៃទៀតប៉ុណ្ណោះ។
លោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត ឱ្យដឹងនៅថ្ងៃទី២១ ខែកុម្ភៈនេះថា មកដល់ពេលនេះ មានគណបក្សនយោបាយចំនួន១១ហើយដែលបានដាក់លិខិតមក គ.ជ.ប ដើម្បីស្នើសុំគោលការណ៍សម្រាប់ឱ្យតំណាងគណបក្សនៅថ្នាក់ក្រោមជាតិ មានស្រុក ខណ្ឌ ឃុំសង្កាត់ អាចធ្វើជាតំណាងជំនួសប្រធានបាន ក្នុងការចុះហត្ថលេខា ដាក់បេក្ខភាព និងចុះឈ្មោះគណបក្សនយោបាយរបស់ខ្លួន។
លោកបន្តថា តាមរយៈយន្តការនេះមានន័យថា គណបក្សទាំង១១នេះនឹងត្រៀមចូលរួមការបោះឆ្នោតជ្រើសរើសក្រុមប្រឹក្សាឃុំ-សង្កាត់ដែលនឹងប្រព្រឹត្តទៅក្នុងពេលខាងមុខនេះហើយ។ ប៉ុន្តែលោកអះអាងថា កាលបរិច្ឆេទពិតប្រាកដនៃការចុះឈ្មោះនិងដាក់បេក្ខភាពនេះនៅសល់ពេលប្រមាណ ១០ថ្ងៃទៀត ទើបអាចដឹងថានឹងមានគណបក្សនយោបាយសរុបចំនួនប៉ុន្មានដែលត្រូវចូលរួម។
លោកបន្តថា៖ «តាមប្រតិទិនទាល់តែដល់ថ្ងៃទី៤ រហូតដល់ថ្ងៃទី៦ បានយើងអាចដឹងបានថាមានគណបក្សនយោបាយប៉ុន្មានលោកដាក់បញ្ជីបេក្ខជនឈរឈ្មោះបោះឆ្នោត»។
គ.ជ.ប ឱ្យដឹងថា ពេលវេលានៃការចុះឈ្មោះសម្រាប់ដាក់បេក្ខភាពនិងគណបក្សនយោបាយសម្រាប់ប្រកួតប្រជែងក្នុងការជ្រើសរើសក្រុមប្រឹក្សាឃុំសង្កាត់នេះ នឹងប្រព្រឹត្តទៅនៅថ្ងៃទី៤ ដល់ថ្ងៃទី៦ ខែមីនា ឆ្នាំ២០២២។ សម្រាប់គណបក្សនយោបាយទាំង១១ដែលបានស្នើសុំគោលការណ៍ពី គ.ជ.ប នេះ រួមមាន គណបក្សប្រជាជនកម្ពុជា, គណបក្សកម្ពុជានិយម គណបក្សភ្លើងទៀន គណបក្សខ្មែរតែមួយ គណបក្សហ្វ៊ុនស៊ិនប៉ិច គណបក្សខ្មែរខេមរា គណបក្សកែទម្រង់កម្ពុជា គណបក្សសញ្ជាតិកម្ពុជា គណបក្សយុវជនកម្ពុជា គណបក្សខ្មែរស្រឡាញ់ជាតិ និងគណបក្សខ្មែររួបរួមជាតិ។
លោក ហង្ស ពុទ្ធា លើកឡើងថា គណបក្សនយោបាយទាំង១១នេះបានដាក់លិខិតមកគណៈកម្មាធិការជាតិរៀបចំការបោះឆ្នោត ចាប់តាំងពីដើមខែកុម្ភៈ ឆ្នាំ២០២២។
បើតាមលោក ហង្ស ពុទ្ធា ផ្អែកលើនីតិវិធីបោះឆ្នោត ប្រសិនគណបក្សនយោបាយចង់ដាក់អ្នកសង្កេតការណ៍របស់ខ្លួន ដើម្បីអង្កេតអំឡុងពេលបោះឆ្នោត គឺត្រូវរង់ចាំ គ.ជ.ប ទទួលស្គាល់បញ្ជីបេក្ខជនដែលឈរឈ្មោះក្នុងរយៈពេល៧ថ្ងៃជាមុនសិន។
ចំពោះអ្នកសង្កេតការណ៍ក្នុងអំឡុងពេលបោះឆ្នោតមកពីអង្គការជាតិ និងអ្នកសារព័ត៌មានជាតិ អាចចាប់ផ្ដើមចុះឈ្មោះបាន ដោយគិតចាប់ពីថ្ងៃទី១៥ ខែកុម្ភៈ រហូតដល់ថ្ងៃទី២៥ ខែឧសភា។ ដោយឡែក អ្នកសង្កេតការណ៍អន្តរជាតិ និងអ្នកសារព័ត៌មានអន្តរជាតិវិញ គឺអាចចុះឈ្មោះបានចាប់ពីថ្ងៃទី១៥ ខែកុម្ភៈ រហូតដល់ថ្ងៃទី១ ខែមិថុនា។
អ្នកនាំពាក្យគណបក្សប្រជាជនកម្ពុជា លោក សុខ ឥសាន បញ្ជាក់ថា គណបក្សកាន់អំណាចមួយនេះបានត្រៀមខ្លួនរួចរាល់ហើយក្នុងការដាក់បេក្ខភាពមេឃុំ-ចៅសង្កាត់ ដែលបម្រើឱ្យការបោះឆ្នោតនៅទូទាំងប្រទេស ខណៈអ្នកនាំពាក្យគណបក្សភ្លើងទៀន លោក ថាច់ សេដ្ឋា លើកឡើងថា នឹងត្រៀមដាក់មេឃុំ-ចៅសង្កាត់ឱ្យបានចប់សព្វគ្រប់នៅដំណាច់ចុងខែកុម្ភៈនេះឱ្យបានគ្រប់រាជធានី-ខេត្ត។
ដោយឡែក លោក យ៉ែម បុញ្ញឬទ្ធិ ប្រធានគណបក្សកម្ពុជានិយម អះអាងថា គណបក្សរបស់លោកនៅមិនទាន់បានបញ្ចប់ការរៀបចំមេឃុំ-ចៅសង្កាត់ទៅតាមផែនការនៅឡើយទេ។ លោកបន្តថា ការចូលរួមបោះឆ្នោតជ្រើសរើសក្រុមប្រឹក្សាឃុំ-សង្កាត់សម្រាប់អាណត្តិនេះ គណបក្សកម្ពុជានិយម ដាក់មេឃុំចៅ-សង្កាត់ត្រឹម១០រាជធានីខេត្តប៉ុណ្ណោះ។ លោកបន្តថា ការរៀបចំមិនបានគ្រប់ចំនួនទាំង២៥រាជធានីខេត្តនេះ ដោយសារគណបក្សនេះទើបតែបង្កើតឡើងថ្មី ហើយពុំទាន់មានធនធាននិងលទ្ធភាពគ្រប់គ្រាន់ដើម្បីពង្រាយឱ្យបានទូទាំងប្រទេសនៅឡើយ។
លោកបន្តថា៖ «ពាក់ព័ន្ធនឹងការរៀបចំបញ្ជីឈ្មោះបេក្ខជនរបស់គណបក្សកម្ពុជានិយម ក្រុមការងារតាមបណ្ដាខេត្តមួយចំនួនកំពុងរៀបចំបញ្ជីបេក្ខជន ប៉ុន្តែយើងបានរៀបចំនៅតាមបណ្ដាខេត្តតែប៉ុណ្ណោះ មិនបានគ្រប់ទាំង២៥រាជធានីខេត្តទេ»។
មិនខុសគ្នាទេ សម្រាប់លោក ខឺយ ស៊ីនឿន អនុប្រធានគណបក្សខ្មែរស្រឡាញ់ជាតិ អះអាងថា គណបក្សដែលទើបតែកកើតថ្មីថ្មោងមួយនេះ ក៏រៀបចំមេឃុំចៅ-សង្កាត់បានត្រឹមតែ១០រាជធានីខេត្តដែរ ហើយនៅតាមរាជធានីខេត្តដែលបានរៀបចំហើយនេះ ក៏មិនបានរៀបចំដាក់មេឃុំ-ចៅសង្កាត់ឱ្យបានគ្រប់ចំនួនឃុំដែរ។
ដោយឡែក អ្នកនាំពាក្យគណបក្សហ្វ៊ុនស៊ិនប៉ិច លោក ញឿន រ៉ាដែន ឱ្យដឹងថា គណបក្សរាជានិយមមួយនេះបានរៀបចំមេឃុំ-ចៅសង្កាត់ជិតរួចរាល់ហើយ សម្រាប់បម្រើឱ្យការបោះឆ្នោតជ្រើសរើសឃុំ-សង្កាត់នៅទូទាំងប្រទេសខាងមុខនេះ។
នាយកប្រតិបត្តិអង្គការនិកហ្វិច លោក សំ គន្ធាមី យល់ឃើញថា ការរៀបចំដាក់បេក្ខភាពបានតិចឬច្រើននៅតាមឃុំ-សង្កាត់របស់គណបក្សនយោបាយនីមួយៗ ហាក់មិនមានភាពសំខាន់នោះទេ។ លោកថា អ្វីដែលសំខាន់នោះនៅត្រង់ថាតើបេក្ខភាពមេឃុំ-ចៅសង្កាត់របស់គណបក្សនយោបាយនីមួយៗនោះ ម្ចាស់ឆ្នោតស្គាល់ដែរឬទេ ហើយកម្មវិធីនយោបាយទៀតសោត តើជាកម្មវិធីនយោបាយដែលទាក់ទាញការចាប់អារម្មណ៍បានកម្រិតណាពីអង្គបោះឆ្នោត។
លោកបន្តថា៖ «វាមានហើយ សេរី ពហុបក្ស ប៉ុន្តែគ្រាន់តែថាគណបក្សហ្នឹង វាប្រជាប្រិយភាពយ៉ាងម៉េច យើងមិនសូវច្បាស់ដែរណា៎! គ្រាន់តែថា វាមានប្រជាប្រិយខ្លាំងឬយ៉ាងម៉េច យើងអត់ដឹង! ជាពិសេសម្ចាស់ឆ្នោតហ្នឹងគាត់ស្គាល់ដែរអត់ ហើយបេក្ខជនមានរបៀបយ៉ាងម៉េច ហើយសមត្ថភាពហ្នឹងយ៉ាងម៉េច ហើយកម្មវិធីនយោបាយហ្នឹងបែបណាជាដើម គឺគេត្រូវមើលទាំងអស់ហ្នឹង»។
ការបោះឆ្នោតឃុំ-សង្កាត់ដែលនឹងប្រព្រឹត្តទៅនៅថ្ងៃអាទិត្យ ទី៥ ខែមិថុនា ឆ្នាំ២០២២ ខាងមុខនេះ គឺជាការបោះឆ្នោតលើកទី៥ ហើយដែលកម្ពុជាដាក់ឱ្យអនុវត្ត បន្ទាប់ពីមានកិច្ចព្រៀមព្រៀងសន្តិភាពទីក្រុងប៉ារីស ថ្ងៃទី២៣ ខែតុលា ឆ្នាំ១៩៩១៕
