ព្រះមហាក្សត្រចេញព្រះរាជក្រឹត្យផ្តល់នីតិសម្បទានយោបាយឡើងវិញ ដល់មន្ត្រីជាន់ខ្ពស់នៃគណបក្សសង្គ្រោះជាតិដែលត្រូវបានតុលាការរំលាយចំនួន៣រូប បន្ទាប់ពីត្រូវបានហាមឃាត់មិនឱ្យធ្វើសកម្មភាពនយោបាយរយៈពេល៥ឆ្នាំតាមអំណាចសាលដីការបស់តុលាការកំពូល។
តាមព្រះរាជក្រឹត្យចុះថ្ងៃទី១៥ ខែកុម្ភៈ ឆ្នាំ២០២២ ព្រះមហាក្សត្រ ព្រះករុណា ព្រះបាទសម្ដេចព្រះបរមនាថ នរោត្ដម សីហមុនី បានត្រាស់បង្គាប់ផ្ដល់នីតិសម្បទានយោបាយឡើងវិញដល់មន្ត្រីគណបក្សគណបក្សប្រឆាំងចំនួន៣រូប រួមមាន លោក ចាន់ ចេង លោក កែត ឃី និងលោកស្រី ពត ពៅ។
លោក ចាន់ ចេង ជាតំណាងរាស្ត្រមណ្ឌលខេត្តកណ្ដាល លោក កែត ឃី និងអ្នកស្រី ពត ពៅ ជាសមាជិកគណៈកម្មាធិការនាយកមកពីគណបក្សសង្គ្រោះជាតិដែលត្រូវតុលាការរំលាយ ត្រូវបានហាមឃាត់មិនឱ្យធ្វើសកម្មភាពនយោបាយសម្រាប់រយៈពេល៥ឆ្នាំតាមអំណាចសាលដីកាលេខ ៣៤០ (ឆ) ចុះថ្ងៃទី១៦ ខែវិច្ឆិកា ឆ្នាំ២០១៧ របស់តុលាការកំពូល។
គិតមកទល់ពេលនេះ អតីតថ្នាក់ដឹកនាំអតីតគណបក្សសង្រ្គោះជាតិ (CNRP) ជាង៣០រូប ក្នុងចំណោម១១៨រូប ដែលជាប់បម្រាមធ្វើនយោបាយ ត្រូវបានព្រះមហាក្សត្រផ្ដល់នីតិសម្បទានយោបាយឡើងវិញតាមសំណើរបស់ក្រសួងមហាផ្ទៃ និងនាយករដ្ឋមន្ត្រី៕
