ពលរដ្ឋជាច្រើននាក់មកពី៤សហគមន៍ក្នុងស្រុកឱរ៉ាល់ និងស្រុកថ្ពង ខេត្តកំពង់ស្ពឺ បានប្រមូលផ្ដុំគ្នានៅមុខសាលាដំបូងខេត្ត នៅព្រឹកថ្ងៃពុធនេះ ខណៈតុលាការបានកោះហៅសមាជិកសហគមន៍ចំនួន៦នាក់ឱ្យចូលឆ្លើយបំភ្លឺ ក្រោយពួកគេរារាំងក្រុមទាហានមិនឱ្យឈូសឆាយដីព្រៃសហគមន៍។
កាលពីថ្ងៃទី៧ ខែកុម្ភៈ ឆ្នាំ២០២២ តំណាងអយ្យការអមសាលាដំបូងខេត្តកំពង់ស្ពឺ លោក ទិន សុចិត្រា បានចេញដីកាកោះហៅជាលើកទី២ ឱ្យសមាជិកសហគមន៍៦នាក់នោះចូលបំភ្លឺជាថ្មីទៀតនៅថ្ងៃទី២៣ ខែកុម្ភៈនេះ ក្រោយពីពួកគេនាំគ្នាតវ៉ាប្រឆាំងក្រុមទាហានមិនឱ្យធ្វើសកម្មភាពឈូសឆាយ និងកាប់បំផ្លាញព្រៃសហគមន៍មួយកន្លែង ស្ថិតក្នុងឃុំត្រពាំងជោរ ស្រុកឱរ៉ាល់។
មន្ត្រីសម្របសម្រួលសហគមន៍នៅសមាគមសម្ព័ន្ធសហគមន៍កសិករកម្ពុជាប្រចាំខេត្តកោះកុង និងកំពង់ស្ពឺ លោក ញ៉ិល ភាព ដែលតាមឃ្លាំមើលករណីនេះ ឱ្យដឹងថា ពលរដ្ឋប្រហែល៤០០នាក់មកពីសហគមន៍ត្រពាំងជោរ សហគមន៍ឧត្ដមស្រែខ្ពស់ សហគមន៍អមលាំង និងសហគមន៍រស្មីសាមគ្គី ស្ថិតក្នុងស្រុកឱរ៉ាល់ និងស្រុកថ្ពង បានប្រមូលផ្ដុំគ្នាឈរលើកបដានៅមុខតុលាការខេត្តកំពង់ស្ពឺ ដើម្បីគាំទ្រ និងទាមទារឱ្យទម្លាក់ចោលការចោទប្រកាន់លើសមាជិកសហគមន៍ទាំង៦នាក់នោះ។
សមាជិកសហគមន៍៦នាក់ រួមមាន លោក ឡោ សុលី, លោក ឈួន ខឿន, លោក ខន សារិទ្ធ, លោក ឈន ធា, លោក សយ សាត និងលោក សឹង សុខុម ត្រូវបានតុលាការកោះហៅឱ្យឆ្លើយបំភ្លឺ ក្រោមបទចោទដូចៗគ្នា រួមមាន «ធ្វើឱ្យខូចខាតដោយចេតនា គំរាមកំហែង ជេរប្រមាថជាសាធារណៈ និងញុះញង់បង្កអសន្តិសុខធ្វើឱ្យប៉ះពាល់ដល់សង្គម» ទៅតាមបណ្ដឹងរបស់បុគ្គលឈ្មោះ ប៉ែន សារិទ្ធ ដែលអ្នកភូមិអះអាងថាជាមន្ត្រីទាហាន។
វីអូឌី នៅមិនទាន់អាចសុំការបញ្ជាក់ជុំវិញករណីនេះពីអ្នកនាំពាក្យសាលាដំបូងខេត្តកំពង់ស្ពឺ នៅឡើយទេ នៅព្រឹកនេះ។
ប្រជាសហគមន៍ឧត្ដមស្រែខ្ពស់ ស្ថិតនៅភូមិពោធិ៍មាស ឃុំត្រពាំងជោរ ស្រុកឱរ៉ាល់ ខេត្តកំពង់ស្ពឺ បានមានជម្លោះដីព្រៃសហគមន៍ជាមួយក្រុមទាហានតាំងពីចុងឆ្នាំ២០២១ ក្រោយពីទាហានប្រើប្រាស់គ្រឿងចក្រ និងកម្លាំងចូលទៅកាប់បំផ្លាញព្រៃសហគមន៍ឧត្ដមស្រែខ្ពស់ ដែលពួកគេអះអាងថា ទទួលបានសម្បទានដីសង្គមកិច្ចពីរដ្ឋាភិបាលរួចហើយ ប៉ុន្តែត្រូវរារាំងដោយក្រុមអ្នកភូមិ។
កាលពីថ្ងៃទី២០ ខែសីហា ឆ្នាំ២០២១ រដ្ឋាភិបាលបានចេញអនុក្រឹត្យមួយកាត់ដីទំហំជាង២៦០ហិកតា (២៦២,២៤ហិកតា) ពីដែនជម្រកសត្វព្រៃភ្នំឱរ៉ាល់ ស្ថិតភូមិសាស្ត្រភូមិពោធិ៍មាស ឃុំត្រពាំងជោរ ស្រុកឱរ៉ាល់ ខេត្តកំពង់ស្ពឺ ដើម្បីបែងចែកទៅឱ្យគ្រួសារកងទ័ពនៃបញ្ជាការដ្ឋានរថក្រោះកងទ័ពជើងគោក និងពលរដ្ឋចំនួន៤១គ្រួសារ សម្រាប់ធ្វើលំនៅឋាន និងបង្កបង្កើនផល ប៉ុន្តែត្រូវបានអ្នកភូមិអះអាងថា ដីតំបន់នេះជាសហគមន៍ឧត្ដមស្រែខ្ពស់ ដែលពួកគេបានចុះបញ្ជី និងការពារជាង២០ឆ្នាំ៕
