សាលាដំបូងខេត្តកំពង់ស្ពឺ បានសម្រេចឱ្យសមាជិកសហគមន៍៦នាក់ត្រលប់មកផ្ទះវិញ ក្រោយពីសាកសួរជិតមួយថ្ងៃពេញ ពាក់ព័ន្ធរឿងជម្លោះដីព្រៃសហគមន៍ជាមួយក្រុមទាហាន ប៉ុន្តែដាក់ឱ្យស្ថិតក្រោមការស៊ើបអង្កេតតាមនីតិវិធីបន្តទៀត។
កាលពីថ្ងៃទី៧ ខែកុម្ភៈ ឆ្នាំ២០២២ តំណាងអយ្យការអមសាលាដំបូងខេត្តកំពង់ស្ពឺ លោក ទិន សុចិត្រា បានចេញដីកាកោះហៅជាលើកទី២ ឱ្យសមាជិកសហគមន៍៦នាក់ចូលភ្លឺនៅថ្ងៃទី២៣ ខែកុម្ភៈនេះ ក្រោយពីពួកគេនាំគ្នាតវ៉ាប្រឆាំងក្រុមទាហានមិនឱ្យធ្វើសកម្មភាពឈូសឆាយ និងកាប់បំផ្លាញព្រៃសហគមន៍មួយកន្លែង ស្ថិតក្នុងឃុំត្រពាំងជោរ ស្រុកឱរ៉ាល់ ខេត្តកំពង់ស្ពឺ។
សមាជិកសហគមន៍ម្នាក់ដែលត្រូវតុលាការកោះហៅ លោក ខន សារិទ្ធ ប្រាប់វីអូឌីនៅថ្ងៃព្រហស្បតិ៍នេះថា ក្រោយសាកសួរជាង៨ម៉ោង តុលាការបានសម្រេចឱ្យពួកគាត់ទាំង៦នាក់ត្រលប់ទៅផ្ទះវិញ និងបានព្រមានមិនឱ្យពួកគាត់តវ៉ាប្រឆាំងទាហានដែលឈូសឆាយនិងកាប់បំផ្លាញព្រៃឈើបន្តទៀត។
លោកបន្ថែមថា៖ «គាត់ [ព្រះរាជអាជ្ញា] ថាប្រសិនជាយើងនៅតែតវ៉ាទៀត យើងប្រឈមមុខនឹងផ្លូវច្បាប់ ពីព្រោះខាងគេនោះ[ភាគីទាហាន] គេមានអនុក្រឹត្យដែលសម្ដេចកាត់ឆ្វៀលឱ្យ។ បើយើងនៅតែតវ៉ា យើងនឹងប្រឈមមុខនឹងផ្លូវច្បាប់ ព្រះរាជអាជ្ញាគាត់និយាយអ៊ីចឹង ថាយើងប្រឆាំងច្បាប់ ប្រឆាំងរដ្ឋាភិបាល»។
យ៉ាងណា សមាជិកសហគមន៍រូបនេះអះអាងថា រូបលោកនៅតែបន្តសកម្មភាពទៀត ដោយសារព្រៃឈើដែលរដ្ឋាភិបាលផ្ដល់ទៅឱ្យក្រុមទាហាននោះជាព្រៃស្រោង ហើយពួកគាត់បានការពារជាង២០ឆ្នាំទៅហើយ។
សមាជិកសហគមន៍ម្នាក់ទៀត លោក សឹង សុខុម ឱ្យដឹងថា តុលាការខេត្តកំពង់ស្ពឺ បានចោទសួរលោកអំពីការញុះញង់ប្រជាពលរដ្ឋឱ្យទៅរារាំងក្រុមទាហានមិនឱ្យធ្វើសកម្មភាពឈូសឆាយនិងកាប់បំផ្លាញព្រៃសហគមន៍ ជាថ្នូរនឹងការទទួលបានដីក្បាល៣០ម៉ែត្របណ្ដោយ១០០ម៉ែត្រ និងលុយ៣០០ដុល្លារ ប៉ុន្តែលោកច្រានចោលការចោទសួរនេះ ដោយថា លោកមិនបានប្រព្រឹត្តដូចការចោទប្រកាន់ឡើយ។
លោកបន្តថា លោកក៏បានបដិសេធចោលចំពោះការចោទប្រកាន់ផ្សេងៗពីសំណាក់ភាគីទាហានមកលើរូបលោក និងបានស្នើដល់តុលាការទម្លាក់ចោលការចោទប្រកាន់លើពួកគាត់ទាំង៦នាក់ផងដែរ។
លោកបន្ថែមថា៖ «ខ្ញុំបានឆ្លើយថា ទាំងអស់ហ្នឹង វាសុទ្ធតែជាការប្រតិដ្ឋរបស់ភាគីទាហានហ្នឹងហើយ។ តាមពិត ការធ្វើអ៊ីចឹង គឺពួកខាងហ្នឹងឯង។ ហើយចម្លើយខ្ញុំមួយទៀត ខ្ញុំឆ្លើយថា ខ្ញុំគ្មានសមត្ថភាពឯណាញុះញង់កេណ្ឌប្រជាពលរដ្ឋបានទេ ខ្ញុំគ្មានអំណាចអ្វីទាំងអស់ ហើយប្រជាពលរដ្ឋដែលគាត់ទៅតវ៉ា អាហ្នឹងដោយសារគាត់មានឆន្ទៈថាដីហ្នឹងជាដីព្រៃសហគមន៍ គាត់បានអាស្រ័យផលពីព្រៃឈនៅហ្នឹង។ ជាឆន្ទៈរបស់ពួកគាត់ វារឿងរបស់ពួកគាត់ ខ្ញុំគ្មានសមត្ថភាពឯណាទៅកេណ្ឌប្រជាពលរដ្ឋបានទេ»។
យ៉ាងណា អ្នកនាំពាក្យសាលាដំបូងខេត្តកំពង់ស្ពឺ លោក វ៉ឺត មឃៈ មានប្រសាសន៍ថា សំណុំរឿងនេះមិនទាន់សម្រេចថាយ៉ាងណានៅឡើយទេ ដោយព្រះរាជអាជ្ញាដាក់ស្ថិតក្រោមការស៊ើបអង្កេតបន្តទៀត។
លោកបន្ថែមថា៖ «ពួកគាត់ទាំង៦នាក់ហ្នឹងបានចូលឆ្លើយបំភ្លឺតាមការកោះហៅរបស់ព្រះរាជអាជ្ញា លោក ទិន សុចិត្រា ហើយ។ អ៊ីចឹងបន្តទៀត គឺស្ថិតក្នុងការអង្កេតរបស់គាត់បន្តទៀត ដោយមិនទាន់សម្រេចថាយ៉ាងណានៅឡើយទេ»។
បើតាមសមាជិកសហគមន៍ លោក ខន សារិទ្ធ កាលពីថ្ងៃទី២២ ខែកុម្ភៈ ឆ្នាំ២០២២ មានការប៉ះទង្គិចគ្នាមួយរវាងពលរដ្ឋនិងក្រុមទាហាន រហូតដល់ទាហានផ្ទុះអាវុធនិងប្រើហិង្សាលើពលរដ្ឋឱ្យរងរបួសស្រាល ខណៈក្រុមពលរដ្ឋចូលទៅរារាំងមិនឱ្យក្រុមទាហានបន្តកាប់បំផ្លាញព្រៃសហគមន៍។
កាលពីថ្ងៃទី២០ ខែសីហា ឆ្នាំ២០២១ រដ្ឋាភិបាលបានចេញអនុក្រឹត្យមួយកាត់ដីទំហំជាង២៦០ហិកតា (២៦២,២៤ហិកតា) ពីដែនជម្រកសត្វព្រៃភ្នំឱរ៉ាល់ ស្ថិតភូមិសាស្ត្រភូមិពោធិ៍មាស ឃុំត្រពាំងជោរ ស្រុកឱរ៉ាល់ ខេត្តកំពង់ស្ពឺ ដើម្បីបែងចែកទៅឱ្យគ្រួសារកងទ័ពនៃបញ្ជាការដ្ឋានរថក្រោះកងទ័ពជើងគោក និងពលរដ្ឋចំនួន៤១គ្រួសារ សម្រាប់ធ្វើលំនៅឋាន និងបង្កបង្កើនផល ប៉ុន្តែត្រូវបានអ្នកភូមិអះអាងថា ដីតំបន់នេះជាសហគមន៍ឧត្ដមស្រែខ្ពស់ ដែលពួកគេបានចុះបញ្ជី និងការពារជាង២០ឆ្នាំទៅហើយ។
ប្រធានអង្គការប្រឆាំងអំពើពុករលួយ ទប់ស្កាត់ការបំផ្លាញធនធានធម្មជាតិ និងការពារសិទ្ធិពលរដ្ឋ (ACNCIPO) លោក ជា ហ៊ាន ប្រាប់វីអូឌីកាលពីថ្ងៃម្សិលមិញថា ការកាត់ដីពីដែនជម្រកសត្វព្រៃភ្នំឱរ៉ាល់របស់ក្រសួងបរិស្ថាន ដើម្បីបែងចែកទៅឱ្យគ្រួសារកងទ័ពនៅឃុំត្រពាំងជោរនោះ គឺមានភាពមិនប្រក្រតីជាច្រើន។
លោកថា កន្លងមក ក្រសួងបានកាត់ដី៧៥ហិកតាពីដែនជម្រកសត្វព្រៃភ្នំឱរ៉ាល់ ដែលជាប់ជាមួយ«ព្រៃសហគមន៍ឧត្ដមស្រែខ្ពស់»ទៅគ្រួសារកងទ័ពម្តងរួចមកហើយ ប៉ុន្តែគ្រួសារកងទ័ពទាំងនោះមិនបានរស់នៅអាស្រ័យផលឡើយ ដោយពួកគេបានយកដីនោះទៅលក់ឱ្យឈ្មួញ ហើយយកឈ្មោះយោធាមួយក្រុមទៀតមកសុំដីសង្គមកិច្ចពីរដ្ឋាភិបាលបន្តទៀត ដែលបណ្ដាលប៉ះពាល់ដល់ដីសហគមន៍ និងបង្កបានជាជម្លោះជាមួយប្រជាពលរដ្ឋ។
ប្រធានអង្គការរូបនេះ អះអាងថា នៅចុងសប្ដាហ៍នេះ អង្គការរបស់លោកនឹងដាក់លិខិតមួយទៅក្រសួងបរិស្ថាន ដើម្បីសុំអន្តរាគមន៍និរាករណ៍អនុក្រឹត្យដែលបានកាត់ដីទំហំជាង២៦០ហិកតាទៅឱ្យគ្រួសារកងទ័ពនោះ ដោយថា ប្រសិនបើបន្តកាត់ដីតំបន់ការពារទៅឱ្យគ្រួសារកងទ័ពទៀត នឹងធ្វើឱ្យវិនាសហិនហោចព្រៃឈើ សត្វព្រៃ និងដីរបស់រដ្ឋផងដែរ។
អ្នកភូមិអះអាងថា កាលពីដើមឡើយ សហគមន៍ «ឧត្ដមស្រែខ្ពស់» មានផ្ទៃដីព្រៃទំហំជាង២ ០០០ហិកតា ប៉ុន្តែក្រោយមកមានក្រុមហ៊ុនឯកជន និងក្រុមទាហាន បានចូលទៅរំលោភយកជាបន្តបន្ទាប់ ដោយបច្ចុប្បន្នសហគមន៍នេះសល់ដីទំហំជិត១ ០០០ហិកតា (៨៨៧ហិកតា) ប៉ុណ្ណោះ៕
