កម្ពុជាសម្រេចឱ្យនាំចូលសាច់ និងទំនិញបង្កកផ្សេងៗពីប្រទេសជិតខាង ដោយមិនចាំបាច់ មានវិញ្ញាបនបត្រ ឬលិខិតបញ្ជាក់ថា គ្មានវីរុសកូវីដ-១៩ ចេញដោយអាជ្ញាធរមានសមត្ថកិច្ចនាំចេញបន្តទៀតឡើយ។
ការសម្រេចនេះ ធ្វើឡើងតាមរយៈលិខិតរបស់អគ្គនាយកដ្ឋានគយ និងរដ្ឋាករកម្ពុជា ដែលវីអូឌីទទួលបាននៅថ្ងៃអាទិត្យនេះ បានឱ្យដឹងថា ក្រោយពីសង្កេតឃើញស្ថានភាពនៃការឆ្លងរាលដាលជំងឺកូវីដ-១៩ ជាពិសេសវីវុសបំប្លែងថ្មី ប្រភេទ ដែលតា(Delta)នៅតាមបណ្តាប្រទេសប្រភពនាំចូលសាច់បង្កក និងទំនិញបង្កកផ្សេងទៀតចូលមកកម្ពុជា មានភាពធូរស្រាល។ លើសពីនេះ ស្ថានភាពការរីករាលដាលនៃវីរុសប្រភេទបំប្លែងថ្មី អូមីក្រុង (Omicron) ស្ថិតក្នុងស្ថានភាពអាចគ្រប់គ្រងបាន ហើយលទ្ធផលនៃការធ្វើតេស្តលើសាច់បង្កកនាពេលកន្លងមកពុំឃើញមានវត្តមានវីរុសកូវីដ-១៩ទៀតនោះ។
ករណីនេះ អគ្គនាយកដ្ឋានគយ និងរដ្ឋាករ សម្រេចលើកលែង «ការតម្រូវឱ្យមានវិញ្ញាបនបត្រ ឬលិខិតបញ្ជាក់ថា គ្មានវីរុសកូវីដ-១៩ ចេញដោយអាជ្ញាធរមានសមត្ថកិច្ចនាំចេញ» ដូចមានចែងក្នុងចំណុច២.នៃលិខិតលេខ ២២៩៩/២១ អគរ បន្តទៀតឡើយ។
លិខិតដដែលបញ្ជាក់ថា ចំពោះមុខទំនិញត្រជាក់ និងទំនិញបង្កក ដែលនាំចូលពីប្រទេសជិតខាង មន្ត្រីគយនិងរដ្ឋាករមានសមត្ថកិច្ច ត្រូវបន្តអនុវត្តវិធានការអនាម័យ និងវិធានការសុខាភិបាលឱ្យបានហ្មត់ចត់ ដោយបាញ់ថ្នាំសម្លាប់មេរោគលើសំបកវេចខ្ចប់ និងមធ្យោបាយដឹកជញ្ជូនទំនិញ។
ក្នុងសេចក្ដីប្រកាសព័ត៌មានរបស់ក្រសួងសុខាភិបាល ចុះថ្ងៃទី១៩ ខែកក្កដា ឆ្នាំ២០២១ បានឱ្យដឹងថា ក្នុងចំណោមសាច់ក្របីបង្កកចំនួន៥កុងតឺន័រដែលនាំចូលពីប្រទេសឥណ្ឌា ក្រសួងបានយកទៅធ្វើតេស្តកាលពីថ្ងៃទី១៧ ខែកក្កដា ឆ្នាំ២០២១ ជាលទ្ធផល សាច់ក្របីបង្កកចំនួន ៣កុងតឺន័រមានផ្ទុកវីរុសកូវីដ-១៩។
បើតាមស្ថានទូតឥណ្ឌាប្រចាំកម្ពុជា បង្ហាញរបាយការណ៍ថា ឥណ្ឌាជាទីផ្សារដ៏ធំមួយសម្រាប់ផ្គត់ផ្គង់សាច់ក្របីនិងអាហារនានា ខណៈកម្ពុជាក៏បាននាំចូលសាច់ក្របីពីប្រទេសឥណ្ឌាក្នុងតម្លៃជាង ១៧លានដុល្លារ (១៧,៧) កាលពីឆ្នាំ២០២០ ហើយចំនួនបានកើនឡើងជាង៦លានដុល្លារ (៦,៤) បើប្រៀបធៀបនឹងឆ្នាំ២០១៩៕