អ្នកភូមិជាច្រើននាក់នៅឃុំជ្រៃឃ្មុំ ស្រុកស៊ីធរកណ្ដាល ខេត្តព្រៃវែង ចោទអាជ្ញាធរមូលដ្ឋានថាបានគប់គិតគ្នាចាក់ដីលុបប្រឡាយទឹក ដើម្បីយកដីលក់ឱ្យក្រុមហ៊ុន និងធ្វើឱ្យពលរដ្ឋគ្មានប្រព័ន្ធទឹកសម្រាប់បង្កបង្កើនផល តែអាជ្ញាធរច្រានចោលការចោទនេះ។
ពលរដ្ឋរស់នៅឃុំជ្រៃឃ្មុំម្នាក់ លោក ឈិត ថា ប្រាប់ វីអូឌី នៅចន្ទនេះថា អ្នកភូមិប្រហែល១០០នាក់ តំណាងពលរដ្ឋជាង៣០០គ្រួសារ រស់នៅភូមិឡាំឡូង ឃុំជ្រៃឃ្មុំ ស្រុកស៊ីធរកណ្ដាល បាននាំគ្នាតវ៉ានៅលើដីជម្លោះជាបន្តបន្ទាប់ ចាប់ពីថ្ងៃទី២២ ខែកុម្ភៈ រហូតមកដល់ថ្ងៃនេះ ដើម្បីទាមទារទៅអាជ្ញាធរភូមិឃុំកាយអាចម៍ដីចេញពីប្រឡាយទឹកវិញ។
លោកអះអាងថា អាជ្ញាធរមូលដ្ឋានបានគប់គិតគ្នាចាក់ដីលុបប្រឡាយទឹកមួយខ្សែនៅក្នុងសហគមន៍ ដោយធ្វើឱ្យប៉ះពាល់ដល់ប្រជាពលរដ្ឋជាង៣០០គ្រួសារដែលធ្លាប់អាស្រ័យផលពីប្រឡាយមួយនេះ។
លោកបន្ថែមថា៖ «ពួកយើងតវ៉ារឿងមេភូមិឱ្យឈ្មួញទិញដីចាក់លុបប្រឡាយទឹកដែលប្រជាជនធ្លាប់អាស្រ័យផល និងលុបដីអូរ មិនដឹងជាលុបធ្វើអីទេ! […] ខ្ញុំបានទៅសួរមេភូមិដល់ផ្ទះ គាត់ថាឱ្យខ្ញុំបិទភ្នែកបិទច្រមុះ នេះបានចំជាមេភូមិមែន! ឱ្យខ្ញុំបិទភ្នែកបិទច្រមុះម៉េចកើត បើចាក់ដីលុបប្រឡាយអស់ហើយ តើប្រជាជនខ្ញុំបានទឹកអីប្រើប្រាស់»។
ពលរដ្ឋម្នាក់ទៀត លោក ឡាយ ធី នៅភូមិឡាំឡូង ឃុំជ្រៃឃ្មុំដែរ អះអាងថា អាជ្ញាធរមូលដ្ឋានតែងតែគំរាមកំហែងចំពោះពលរដ្ឋណាដែលសកម្មចេញមុខតវ៉ា និងរារាំងមិនឱ្យមានការចាក់លុបប្រឡាយនេះ។ លោកបន្តថា អាជ្ញាធរឃុំមិនមែនគប់គិតគ្នាលុបប្រឡាយទឹកតែមួយកន្លែងនោះទេ គឺនៅមានជាច្រើនកន្លែងផ្សេងទៀត ប៉ុន្តែអ្នកភូមិតវ៉ាតែកន្លែងដែលប៉ះពាល់ដល់ការអាស្រ័យផលរបស់ពួកគាត់តែប៉ុណ្ណោះ។
លោកបន្ថែមថា៖ «ឱ្យតែអ្នកភូមិគាត់និយាយអីបន្តិច គាត់គំរាមចាប់គេដាក់គុកដាក់ច្រវាក់។ គាត់ប្រើតែភាសាអ៊ីចឹង ដល់ពេលអ៊ីចឹងអ្នកភូមិខ្ញុំភ័យខ្លាច គាត់អត់ហ៊ានតវ៉ាទេ។ និយាយទៅ គាត់មិនមែនយកតែមួយកន្លែងហ្នឹងទេ គាត់រំលោភយកដីប្រឡាយដែលជាដីរដ្ឋ ៣ទៅ៤កន្លែងទៀត ប៉ុន្តែអ្នកភូមិមិនហ៊ានតវ៉ា គាត់ទាមទារតែកន្លែងណាដែលប៉ះពាល់ដល់ពួកគាត់ ហើយគាត់ទាមទារឱ្យបានទឹកប្រើប្រាស់វិញទេ»។
វីអូឌី មិនអាចសុំការឆ្លើយតបពីមេឃុំជ្រៃធំ និងមេភូមិឡាំឡូងបានទេ ពាក់ព័ន្ធករណីនេះ។
ប៉ុន្តែបើតាមស្មៀនឃុំជ្រៃឃ្មុំ លោក អ៊ុក ថេន ឱ្យដឹងថា ក្រុមហ៊ុនឯកជនមួយបានទិញដីពីប្រជាពលរដ្ឋនៅជាប់ប្រឡាយទឹក ហើយបានឱ្យមេឃុំមើលការខុសត្រូវលើការចាក់បំពេញដីដែលបានទិញនោះ។
ស្មៀនឃុំរូបនេះបន្តថា ពេលគ្រឿងចក្ររបស់ក្រុមហ៊ុនចាក់បំពេញដីរបស់ខ្លួនដែលបានទិញនោះ គឺបានហៀរចូលប្រឡាយទឹក ដែលធ្វើឱ្យប្រជាពលរដ្ឋមិនសប្បាយចិត្ត និងបាននាំគ្នាតវ៉ាទាមទារឱ្យកាយចេញវិញ។ លោកថា ក្រោយពីពលរដ្ឋតវ៉ា ខាងអាជ្ញាធរឃុំបានសន្យាកាយអាចម៍នោះចេញវិញ ដោយសុំទុករយៈពេល៧ថ្ងៃចាប់ពីថ្ងៃចន្ទនេះទៅ។
លោកបន្ថែមថា៖ «ព្រឹកមិញនេះ ក្រោយពលរដ្ឋគាត់តវ៉ាទៀត យើងបានធ្វើកិច្ចសន្យាជាមួយគាត់ហើយ។ យើងនឹងឱ្យក្រុមហ៊ុនកាយអាចម៍ដីហៀរប្រឡាយវិញ។ រឿងមានតែប៉ុណ្ណឹង អត់មានអីធំដុំទេ ហើយក្រុមហ៊ុនចាប់ផ្ដើមពីថ្ងៃនេះហើយ»។
អ្នកភូមិអះអាងថា អាជ្ញាធរបានសន្យាជាមួយពលរដ្ឋជាច្រើនដងហើយថានឹងកាយអាចម៍ដីចេញពីប្រឡាយទឹក ប៉ុន្តែរហូតមកដល់ពេលនេះ គឺអាជ្ញាធរមិនបានអនុវត្តតាមឡើយ ទើបពួកគាត់ផ្ទុះការតវ៉ា ហើយថា ប្រសិនបើអាជ្ញាធរមិនព្រមធ្វើតាមសន្យាទេ ពួកគេនឹងធ្វើការតវ៉ាជាថ្មីទៀត ដោយថា ប្រសិនបើប្រឡាយទឹកនោះត្រូវបានបិទ ពួកគាត់ជាង៣០០គ្រួសារគ្មានប្រព័ន្ធទឹកសម្រាប់បង្កបង្កើនផលទៀតឡើយ៕
