ស្ថាបនិក និងជានាយកប្រតិបត្តិក្រុមហ៊ុន SpaceX លោក Elon Musk បានប្រកាសឱ្យដឹងកាលពីថ្ងៃសៅរ៍កន្លងទៅថា Starlink ដែលជាក្រុមហ៊ុនផ្ដល់សេវាអ៊ីនធឺណិតផ្កាយរណបរបស់ខ្លួនកំពុងតែដំណើរការនៅក្នុងប្រទេសអ៊ុយក្រែនហើយ ខណៈដែលប្រទេសនេះបច្ចុប្បន្នកំពុងទទួលរងនូវបញ្ហាដាច់ចរន្តអគ្គិសនីដោយសារតែការលុកលុយពីរុស្ស៊ី។
សារព័ត៌មាន CNN បានស្រង់សម្ដីស្ថាបនិកក្រុមហ៊ុនរូបនេះ ដែលបានឱ្យដឹងនៅលើបណ្ដាញសង្គមធ្វីតទ័រ (Twitter) ថា៖ «សេវាកម្មរបស់ Starlink បច្ចុប្បន្នកំពុងតែដំណើរការនៅក្នុងប្រទេសអ៊ុយក្រែនហើយ»។
ការផ្ដល់សេវាអ៊ីនធឺណិតផ្កាយរណបដល់ប្រទេសមួយនេះ ត្រូវបានធ្វើឡើងបន្ទាប់ពីមានការស្នើដោយឧបនាយករដ្ឋមន្ត្រីអ៊ុយក្រែន លោក Mykhailo Fedorov ទៅកាន់លោក Elon Musk ស្របពេលដែលប្រទេសខ្លួនរងការវាយប្រហារដោយរុស្ស៊ី។ នេះបើយោងតាមការឆ្លើយឆ្លងសាររវាងអ្នកទាំង២លើបណ្ដាញសង្គមធ្វីតទ័រ កាលពីថ្ងៃសៅរ៍។
សារដែលលោក Mykhailo Fedorov បានសរសេរទៅកាន់លោក Elon Musk តាមរយៈបណ្ដាញសង្គម បានលើកឡើងថា៖ «ខណៈពេលដែលអ្នក [លោក Elon Musk] ព្យាយាមគ្រប់គ្រងភពអង្គារ រុស្ស៊ីព្យាយាមកាន់កាប់អ៊ុយក្រែន ហើយខណៈពេលដែលគ្រាប់រ៉ុក្កែតរបស់អ្នកបានចុះចតដោយជោគជ័យលើលំហនោះ រ៉ុក្កែតរបស់រុស្ស៊ីវាយប្រហារប្រជាជនស៊ីវិលអ៊ុយក្រែន។ យើងសូមធ្វើការស្នើសុំដល់រូបលោកផ្ដល់ឱ្យអ៊ុយក្រែននូវស្ថានីយអ៊ីនធឺណិតផ្កាយរណប Starlink ដើម្បីជួយដល់យើង»។
គួរបញ្ជាក់ថា ការឆ្លើយឆ្លងសារតាមរយៈបណ្ដាញសង្គមនេះក៏ត្រូវបានធ្វើឡើងស្របពេលដែលប្រធានាធិបតីរុស្ស៊ី លោក វ្លាឌីមៀរ ពូទីន បានបញ្ជាឱ្យកងកម្លាំងយោធាប្រទេសរបស់លោក ដែលរួមមានអាវុធនុយក្លេអ៊ែរ ស្ថិតក្នុងការត្រៀមនិងប្រុងប្រយ័ត្នខ្ពស់ ខណៈដែលកិច្ចពិភាក្សារវាងគណៈប្រតិភូរុស្ស៊ី និងអ៊ុយក្រែន ក៏នឹងត្រូវធ្វើឡើងនៅព្រឹកថ្ងៃចន្ទនេះផងដែរ៕