អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) នៅថ្ងៃទី១ ខែមីនានេះ បានដាក់ឱ្យដំណើរការសេវាកម្មចូលពិនិត្យមើលឯកសារ និងដំណើរការសាកល្បងការចូលពិនិត្យមើលមូលដ្ឋានទិន្នន័យតុលាការ ដើម្បីបង្កើនការចូលមើលកំណត់ហេតុសំណុំរឿងរបស់សាធារណជន។
យោងតាមសេចក្ដីប្រកាសព័ត៌មានរបស់អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) បានឱ្យដឹងថា តាមរយៈកម្មវិធីខាងលើនេះ សាធារណជនដែលចង់ស្វែងរកឯកសារជាក់លាក់ពាក់ព័ន្ធដំណើរការតុលាការនៅចំពោះមុខ អ.វ.ត.ក នៅពេលនេះ អាចដាក់ពាក្យស្នើសុំពិនិត្យឯកសារបានដោយផ្ទាល់ពីគេហទំព័រ។
អ.វ.ត.ក នឹងជួយក្នុងការស្វែងរកព័ត៌មានដែលបានស្នើសុំ ហើយប្រសិនបើចាត់ប្រភេទជាឯកសារសាធារណៈ ឯកសារពាក់ព័ន្ធទាំងនេះ នឹងត្រូវកំណត់អត្តសញ្ញាណ និងបង្ហោះទៅក្នុងគេហទំព័រ អ.វ.ត.ក ប្រសិនបើមិនទាន់មាន។
ប្រភពដដែលបន្តថា អ្នកសិក្សាស្រាវជ្រាវ និងអ្នកប្រកបវិជ្ជាជីវៈនានា ដែលត្រូវការចូលពិនិត្យមើលកំណត់ត្រាសំណុំរឿងសាធារណៈនៅក្នុងបណ្ណសារឌីជីថលរបស់ អ.វ.ត.ក ក៏អាចដាក់ពាក្យស្នើសុំចូលពិនិត្យមើលមូលដ្ឋានទិន្នន័យនេះផងដែរ។
បន្ទាប់ពីដំណាក់កាលសាកល្បងដំបូង ការចូលពិនិត្យមើលមូលដ្ឋានទិន្នន័យបែបនេះនឹងដាក់បញ្ចូលជាបណ្ដើរៗផងដែរនូវដៃគូពាក់ព័ន្ធផ្សេងទៀត ដោយមានការបង្កើតគេហទំព័រថ្មីមួយនៅក្នុងឆ្នាំ២០២៣ ហើយបុគ្គលគ្រប់រូបនឹងអាចចូលពិនិត្យមើលបាន។
ទិដ្ឋភាពទាំងពីរនេះត្រូវបានអនុវត្តដោយស្របទៅតាមកិច្ចព្រមព្រៀងបន្ថែមទៅនឹងកិច្ចព្រមព្រៀងរវាងអង្គការសហប្រជាជាតិ និងរដ្ឋាភិបាលកម្ពុជានេះ ដែលតម្រូវឱ្យ អ.វ.ត.ក រក្សានិងគ្រប់គ្រងបណ្ណសាររបស់ខ្លួន ឆ្លើយតបទៅនឹងសំណើសុំចូលពិនិត្យមើលឯកសារ និងផ្សព្វផ្សាយព័ត៌មានទៅដល់សាធារណជន ពាក់ព័ន្ធអង្គជំនុំជម្រះវិសាមញ្ញក្នុងតុលាការកម្ពុជា។
កាលពីខែសីហា ឆ្នាំ២០២១ ភាគីរដ្ឋាភិបាលកម្ពុជា និងអង្គការសហប្រជាជាតិ បានចុះហត្ថលេខាលើកិច្ចព្រមព្រៀងបន្ថែម ដើម្បីឈានទៅបញ្ចប់ការងាររបស់អង្គជំនុំជម្រះវិសាមញ្ញក្នុងតុលាការកម្ពុជា បន្ទាប់ពីបានដំណើរការអស់រយៈពេល១៥ឆ្នាំ៕
