អគ្គនាយករដ្ឋាករទឹកស្វយ័តក្រុងភ្នំពេញ អះអាងថា នៅចុងឆ្នាំ២០២៣ ពលរដ្ឋរស់នៅរាជធានីភ្នំពេញទាំងមូលនឹងមានទឹកប្រើប្រាស់គ្រប់គ្រាន់ ខណៈចាប់ពីដើមឆ្នាំ២០២៤ទៅ រដ្ឋាករទឹកធានាថាទឹកនៅក្នុងរាជធានីភ្នំពេញនឹងលែងចោទជាបញ្ហាទៀតហើយ។
ការថ្លែងនេះធ្វើឡើងក្នុងសន្និសីទសារព័ត៌មានស្ដីពី «វឌ្ឍនភាពមូលដ្ឋានឃុំ-សង្កាត់ និងទិសដៅការងារបន្ដរបស់រដ្ឋបាលរាជធានីភ្នំពេញ» នៅថ្ងៃទី១ ខែមីនា ឆ្នាំ២០២២នេះ។
អគ្គនាយករដ្ឋាករទឹកស្វយ័តក្រុងភ្នំពេញ លោក ឡុង ណារ៉ូ លើកឡើងថា បច្ចុប្បន្ន រាជធានីភ្នំពេញមានបញ្ហាខ្វះខាតលើការផ្គត់ផ្គង់ទឹកដែលបូមពីទន្លេមកផ្ទៃអាងស្តុកប្រមាណ១ ០០០ ទៅ២ ០០០ម៉ែត្រគូប ក្នុងមួយម៉ោង ឬស្មើប្រមាណ២៤ ០០០ម៉ែត្រគូប ទៅ៤៨ ០០០ ម៉ែត្រគូប ក្នុងមួយថ្ងៃ។
លោកថា បញ្ហាចោទនេះទាមទារឱ្យមានការបំពេញនូវសេចក្ដីត្រូវការ ខណៈពលរដ្ឋចូលមករស់នៅទីក្រុងកាន់តែច្រើន ហើយនីវ៉ូទឹកទន្លេមេគង្គទាបនៅរដូវប្រាំង។
លោកថា ក្នុងក្រុងមានសម្ពាធខ្ពស់ ដែលការប្រើប្រាស់ទឹកក៏អស់ច្រើនដែរ ស្របពេលនៅកម្ពុជា ពលរដ្ឋម្នាក់ប្រើទឹកក្នុងមួយថ្ងៃប្រមាណ២០០ទៅ២៨០លីត្រ ខណៈជាទូទៅពលរដ្ឋគួរតែប្រើអស់ប្រមាណ១៥០លីត្រក្នុងមួយថ្ងៃ។
លោក ឡុង ណារ៉ូ ថា៖ «តាមការគ្រោងទុករបស់យើង គឺចុងឆ្នាំ២០២៣ យើងនឹងមានទឹកប្រើប្រាស់គ្រប់គ្រាន់។ ដើមឆ្នាំ២៤ [២០២៤] គឺធានាថាទឹកនៅក្នុងរាជធានីភ្នំពេញ គឺលែងមានបញ្ហា គឺគ្រប់គ្រាន់ទាំងអស់»។
លោកថា សព្វថ្ងៃ រដ្ឋាករទឹកមានក្រុមការងារសាងសង់រោងចក្រផលិតទឹក ក្រុមសាងសង់ពង្រីកបំពង់មេនាំទឹកនៅបាតទន្លេសាបដែលមានមុខកាត់២ម៉ែត្រ ដែលនឹងសង់នៅខែឧសភានេះ។
អគ្គនាយករដ្ឋាករទឹកស្វយ័តក្រុងភ្នំពេញរូបនេះ ស្នើពលរដ្ឋប្រើប្រាស់ទឹកសន្សំសំចៃក្នុងរដូវប្រាំងនេះ ដើម្បីជួយដល់តំបន់ជាយក្រុងឱ្យមានទឹកប្រើប្រាស់ក្នុងស្ថានភាពខ្វះខាតនេះ។
ពលរដ្ឋរស់នៅសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ កញ្ញា ជា បូរ៉ានី ប្រាប់ថា នៅទីតាំងដែលកញ្ញាស្នាក់នៅខ្វះទឹកស្អាតប្រើប្រាស់ បើទោះបីជាបានភ្ជាប់ប្រព័ន្ធទឹកស្អាត និងប្រើម៉ូទ័រជំរុញទឹកក៏ដោយ។
កញ្ញា ជា បូរ៉ានី ថា៖ «ជាពិសេសគឺនៅពេលថ្ងៃតែម្ដង អត់មានទេ ទាល់តែយប់ឡើង! ពាក់កណ្ដាលយប់ឯណោះ បានវាមានទឹកអីមកខ្លះ។ អ៊ីចឹងតម្រូវយើងឡើងបើកទឹកនៅពេលយប់ សម្រាប់ដាក់ធុងទុកប្រើប្រាស់នៅពេលថ្ងៃអីអ៊ីចឹងទៅ បើមិនអ៊ីចឹងទេ គឺអត់មានទឹកប្រើប្រាស់ទេ»។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង ថ្លែងថា បញ្ហាខ្វះទឹកជាបញ្ហាប្រឈមខ្លាំងចំពោះពលរដ្ឋរស់នៅរាជធានីភ្នំពេញ ខណៈពួកគាត់ជួបការលំបាកក្នុងតម្រូវការរស់នៅប្រចាំថ្ងៃ ដូចជាទឹកសម្រាប់ងូត ជាពិសេសគ្រួសារដែលមានសមាជិកច្រើន ដែលប៉ះពាល់ដល់ពេលវេលាចេញប្រកបការងាររបស់ពួកគេ។
លោក គិមអេង ថា៖ «វាប៉ះពាល់ដែរដល់អាជីវកម្ម បើសិនគាត់ធ្វើអាជីវកម្មតូចតាចអី។ ជាពិសេសគឺប៉ះពាល់ដល់អ្នកដែលប្រកបមុខរបរតូចតាច បើសិនជាមានបញ្ហាខ្វះខាតទឹក ក៏ជាបញ្ហាប្រឈមមួយធំណាស់។ ដើម្បីដោះស្រាយបញ្ហានេះ ខ្ញុំថារដ្ឋគួរតែមានការគ្រប់គ្រងទឹក ហើយមានតំបន់ស្តុកទឹក […]»។
លោកថា រដ្ឋគួរតែស្ដារព្រែកនិងបឹងដែលមាននៅរាជធានីភ្នំពេញសម្រាប់ស្តុកទឹក ខណៈបឹងមួយចំនួនត្រូវបានគេបង្ហូរទឹកស្អុយចូល ដែលធ្វើឱ្យទឹកទាំងនោះមិនអាចប្រើប្រាស់បាន៕