ជនជាតិចិនមួយរូបដែលមានភារកិច្ចក្នុងការជួយសង្គ្រោះមនុស្ស ដែលត្រូវបានគេយកមកជួញដូរនិងធ្វើជាទាសករនៅខេត្តព្រះសីហនុ និងទូទាំងប្រទេស កំពុងតែស្ថិតនៅក្រោមការស៊ើបអង្កេតរបស់សមត្ថកិច្ច។ នេះបើតាមការឱ្យដឹងពីក្រុមអ្នកស្ម័គ្រចិត្តកម្ពុជា-ចិន។
ក្រុមអ្នកជួយសង្រ្គោះនេះទទួលបានការស្នើសុំឱ្យជួយជារៀងរាល់សប្ដាហ៍ពីជនជាតិចិនដែលលើកឡើងថា ពួកគេកំពុងត្រូវបានឃុំខ្លួននៅក្នុងទីតាំងការងារមួយចំនួនក្នុងប្រទេសកម្ពុជា និងត្រូវបានបង្ខំឱ្យធ្វើសកម្មភាពបោកប្រាស់តាមអ៊ីនធឺណិត ដែលក្នុងនោះជនជាតិថៃ បង់ក្លាដែស តៃវ៉ាន់ និងជនបរទេសផ្សេងទៀត ក៏ធ្លាប់ត្រូវបានជួយសង្គ្រោះពីប្រតិបត្តិការឆបោកស្រដៀងគ្នានេះផងដែរ។
យោងតាមសេចក្ដីថ្លែងការណ៍ខ្លីមួយដោយក្រុមស្ម័គ្រចិត្តកម្ពុជា-ចិន ដែលស្ថិតនៅក្រោមសមាគមពាណិជ្ជកម្មចិននៅកម្ពុជា បានឱ្យដឹងថា លោក Chen Baorong ដែលជាប្រធានក្រុមស្ម័គ្រចិត្តកម្ពុជា-ចិន កំពុងស្ថិតនៅក្រោមការស៊ើបអង្កេតដោយនគរបាលកម្ពុជា គិតចាប់តាំងពីថ្ងៃសុក្រសប្ដាហ៍មុន។
ទាក់ទិននឹងករណីនេះ ក្រុមការងារនៃក្រុមស្ម័គ្រចិត្តដដែលបានឱ្យដឹងកាលពីថ្ងៃសៅរ៍ថា ក្រុមស្ម័គ្រចិត្តកម្ពុជា-ចិន គាំទ្រដល់សមត្ថកិច្ចក្នុងការស្វែងរកការពិត ផ្ដន្ទាទោសឧក្រិដ្ឋជនឱ្យបានធ្ងន់ធ្ងរ និងផ្ដល់ការពន្យល់ឱ្យបានច្បាស់លាស់ដល់គ្រប់ភាគីទាំងអស់។
ស្នងការនគរបាលរាជធានីភ្នំពេញ លោក ស ថេត កាលពីថ្ងៃសុក្រ ក៏បានថ្លែងឱ្យដឹងយ៉ាងខ្លីថា ជនជាតិចិនរូបនេះស្ថិតនៅក្រោមការស៊ើបអង្កេតរបស់អគ្គស្នងការនគរបាលជាតិ ខណៈដែលអគ្គស្នងការរងនគរបាលជាតិ លោក អ៊ី សុខឃី បានប្រាប់ឱ្យអ្នកសារព័ត៌មានរង់ចាំមើលពីចំណាត់ការរបស់សមត្ថកិច្ចបន្តទៀត។
យោងតាមសន្តិសុខ និងបុគ្គលិកផ្នែកទទួលភ្ញៀវនៅការិយាល័យសមាគមពាណិជ្ជកម្មចិននៅកម្ពុជា ក្នុងទីក្រុងភ្នំពេញ បានឱ្យដឹងថា បុរសប្រមាណ៥នាក់ស្ថិតនៅក្នុងឈុតឯកសណ្ឋានពណ៌ខ្មៅ បានមកកាន់ការិយាល័យរបស់ពួកគេកាលពីព្រឹកថ្ងៃសុក្រ និងបន្ទាប់មកបានចាកចេញទៅជាមួយលោក Chen Baorong បន្ទាប់ពីជជែកគ្នាអស់រយៈពេលខ្លី។
សភាពាណិជ្ជកម្មចិននៅកម្ពុជា កាលពីថ្ងៃព្រហស្បតិ៍កន្លងទៅ ក៏បានថ្កោលទោសចំពោះករណីបាញ់ប្រហារ ចាប់ជំរិត និងជំរិតទារប្រាក់លើជនជាតិចិននៅកម្ពុជា ពាក់ព័ន្ធនឹងល្បែងស៊ីសងតាមប្រព័ន្ធអនឡាញ និងសកម្មភាពបោកប្រាស់នានាផងដែរ។
លិខិតមួយរបស់សភាពាណិជ្ជកម្មបានឱ្យដឹងថា៖ «វិធីសាស្ត្រនៃឧក្រិដ្ឋកម្មមួយចំនួន គឺហាក់មានសកម្មភាពសាហាវឃោរឃៅ។ សកម្មភាពទាំងនោះបានបង្កឱ្យមានជាការខឹងសម្បារយ៉ាងខ្លាំងពីសំណាក់ជនរួមជាតិចិននៅកម្ពុជា និងនៅក្នុងប្រទេសចិនផងដែរ»។
ទាក់ទិនករណីនេះ សភាពាណិជ្ជកម្មចិននៅកម្ពុជាបានជំរុញដល់មន្ត្រីជំនាញពាក់ព័ន្ធទាំងឡាយឱ្យបង្រ្កាបក្រុមដែលប្រព្រឹត្តសកម្មភាពខុសច្បាប់ទាំងនេះ។
ការបើកការស៊ើបអង្កេតរបស់សមត្ថកិច្ចលើលោក Chen Baorong នេះ ត្រូវបានធ្វើឡើងស្របពេលដែលមានការកើនឡើងនៃការចាប់អារម្មណ៍យ៉ាងខ្លាំង និងភាពចម្រូងចម្រាសទាក់ទងនឹងករណីមួយដែលលើកឡើងអំពីការបង្ខាំងមនុស្សដើម្បីធ្វើជាទាសករលក់ឈាមនៅក្នុងខេត្តព្រះសីហនុ។
កាលពីដើមខែកុម្ភៈ ស្ថានទូតចិនប្រចាំនៅព្រះរាជាណាចក្រកម្ពុជាបានរាយការណ៍ពីករណីបុរសម្នាក់ដែលត្រូវបានចាញ់បោកតាមរយៈការផ្សព្វផ្សាយការងារមួយ និងត្រូវបានបង្ខំឱ្យចូលមកកាន់កម្ពុជាដោយខុសច្បាប់។
ស្ថានទូតបន្តថា៖ «ក្រោយមក បុរសខាងលើនេះត្រូវបានឃុំខ្លួនដោយខុសច្បាប់ពីសំណាក់ក្រុមអ្នកលេងល្បែងស៊ីសងតាមប្រព័ន្ធអ៊ីនធឺណិត និងឆបោកនៅតំបន់ឆាយណាថោន ខេត្តព្រះសីហនុ ដោយធ្វើជាទាសករដើម្បីបូមឈាមលក់រហូតដល់ធ្លាក់ខ្លួនក្នុងស្ថានភាពសុខភាពធ្ងន់ធ្ងរ»។
ទោះជាយ៉ាងណា អគ្គស្នងការដ្ឋាននគរបាលជាតិ នៅថ្ងៃចន្ទម្សិលមិញនេះ បានចេញសេចក្ដីប្រកាសព័ត៌មានមួយដោយបានលើកឡើងថា ករណីនេះគឺជាការប្រតិដ្ឋព័ត៌មានដោយជនរងគ្រោះ ខណៈដែលរូបគេ រួមទាំងអ្នកពាក់ព័ន្ធចំនួន៣នាក់ទៀត នឹងត្រូវបញ្ជូនទៅតុលាការ ដើម្បីចាត់ការតាមផ្លូវច្បាប់។
សេចក្ដីប្រកាសព័ត៌មានបានបន្តថា៖ «បុរសទាំងនេះបានលួចឆ្លងដែនចូលប្រទេសកម្ពុជាដោយខុសច្បាប់ ប៉ុន្តែដោយមានជំងឺប្រចាំកាយ ក៏បានទាក់ទងមនុស្សមួយក្រុម ដើម្បីជួយរកវិធីដោះស្រាយបញ្ហារបស់ខ្លួន […] ក្នុងការរៀងចំគម្រោងប្រតិដ្ឋព័ត៌មានក្លែងក្លាយ ដើម្បីគេចផុតពីការទទួលខុសត្រូវចំពោះមុខច្បាប់នៅកម្ពុជា»។
ករណីរកឃើញនេះ អគ្គស្នងការដ្ឋាននគរបាលជាតិក៏បានអំពាវនាវឱ្យសារព័ត៌មាននិងអ្នកប្រើប្រាស់បណ្ដាញសង្គមធ្វើការកែសម្រួលឡើងវិញនូវការផ្សព្វផ្សាយព័ត៌មាននេះ ដើម្បីចៀសវាងការភ័ន្តច្រឡំ និងប៉ះពាល់បរិយាកាសសង្គម ព្រមទាំងបង្កឱ្យមានភាពភ័យខ្លាចដល់ទេសចរណ៍ជាតិនិងអន្តរជាតិ រួមទាំងអ្នកវិនិយោគនៅកម្ពុជាផងដែរ។
ស្ថានទូតចិនប្រចាំនៅកម្ពុជា កាលពីថ្ងៃចន្ទ ក៏បានចេញសេចក្ដីថ្លែងការណ៍មួយទាក់ទងនឹងករណីនេះផងដែរ ដោយបានលើកឡើងថាបុរសរូបនេះមានជំងឺថ្លើមធ្ងន់ធ្ងរ បន្ទាប់ពីបានមកដល់ប្រទេសកម្ពុជា។
នៅឯមន្ទីរពេទ្យ Bethune Cambodia China First ក្នុងរាជធានីភ្នំពេញ កាលពីថ្ងៃចន្ទម្សិលមិញ បុគ្គលិកម្នាក់បានឱ្យដឹងថា បុរសរូបនេះស្ថិតក្នុងស្ថានភាពធ្ងន់ធ្ងរ ដោយត្រូវការឈាមជាច្រើនបន្ថែមទៀត ហើយបច្ចុប្បន្ននេះ ស្ថិតនៅក្រោមការយាមកាមពីសំណាក់សមត្ថកិច្ច។
នៅរសៀលថ្ងៃដដែល អគ្គស្នងការរងនគរបាលជាតិ លោក អ៊ី សុខឃី ក៏បានមានប្រសាសន៍ឱ្យដឹងថា លោក Chen Baorong គឺស្ថិតនៅក្នុងចំណោមមនុស្ស ៤នាក់ ដែលត្រូវជាប់ពាក់ព័ន្ធជាមួយនឹងចំណាត់ការរបស់តុលាការ ដោយលោកថា សំណុំរឿងនេះនឹងត្រូវបញ្ជូនទៅសាលាដំបូងខេត្តព្រះសីហនុ៕
បកប្រែនិងសម្រួលពីអត្ថបទដើមភាសាអង់គ្លេស៖ Rescue Team Leader Under Police Investigation
ដោយលោក ភុន ច័ន្ទឧសភា
