មន្ត្រីជាន់ខ្ពស់គណបក្សសង្គ្រោះជាតិដែលត្រូវបានតុលាការរំលាយ លោក សុន ឆ័យ បានប្រកាសចូលរួមជីវភាពនយោបាយជាមួយគណបក្សភ្លើងទៀន បន្ទាប់ពីលោកទទួលបានសិទ្ធិធ្វើនយោបាយឡើងវិញកាលពីពេលកន្លងមក។
ក្នុងសេចក្ដីប្រកាសព័ត៌មានចេញនៅថ្ងៃទី១ ខែមីនា ឆ្នាំ២០២២ តំណាងរាស្ត្រគណបក្សសង្គ្រោះជាតិ លោក សុន ឆ័យ បានអំពាវនាវឱ្យប្រជាពលរដ្ឋចូលរួមនិងគាំទ្រ «គណបក្សភ្លើងទៀន» ឱ្យបានគ្រប់ៗគ្នា។ លោកបន្តថា ចាប់ពីថ្ងៃទី១ ខែមីនា ឆ្នាំ២០២២ តទៅ រូបលោកបានសម្រេចចូលជាសមាជិកនៃគណបក្សភ្លើងទៀន។
វីអូឌី មិនអាចសុំការបញ្ជាក់បន្ថែមពីលោក សុន ឆ័យ បានទេ នៅថ្ងៃអង្គារនេះ។
អ្នកនាំពាក្យគណបក្សភ្លើងទៀន លោក ថាច់ សេដ្ឋា ប្រាប់វីអូឌីថា លិខិតសុំចូលរួមជីវភាពនយោបាយជាមួយគណបក្សភ្លើងទៀនរបស់លោក សុន ឆ័យ រូបលោកបានទទួលហើយ ប៉ុន្តែចំពោះការផ្ដល់តួនាទីវិញ លោកថានៅមិនទាន់សម្រេចយ៉ាងណានៅឡើយទេ។
លោកបង្ហាញជំហរថា គណបក្សនេះគឺជាក្ដីសង្ឃឹមថ្មីមួយក្នុងការជួយស្ដារលទ្ធិប្រជាធិបតេយ្យប្រទេសកម្ពុជា ខណៈបច្ចុប្បន្ន លោកថា គណបក្សភ្លើងទៀនក៏មានប្រជាពលរដ្ឋគាំទ្រច្រើនផងដែរ។
លោកថា៖ «មិនត្រឹមតែអតីតមន្ត្រីជាន់ខ្ពស់គណបក្សសង្គ្រោះជាតិទេ សូម្បីតែប្រជាពលរដ្ឋក៏ចូលរួមសកម្មដែរជាមួយគណបក្សភ្លើងទៀន។ ដូច្នេះ យើងមានក្ដីសង្ឃឹម ការតស៊ូរបស់យើងអាចនឹងជួយស្ដារលទ្ធិប្រជាធិបតេយ្យឡើងវិញបាន ហើយក៏ជាគណបក្សមួយមានឥទ្ធិពលប្រកួតប្រជែងជាមួយគណបក្សកាន់អំណាចបាន»។
នាយកប្រតិបត្តិអង្គការអភិវឌ្ឍន៍ផ្នត់គំនិត លោកបណ្ឌិត សេក សុជាតិ ចាត់ទុកការបង្ហាញក្ដីរំពឹងរបស់គណបក្សនយោបាយជារឿងធម្មតា ប៉ុន្តែលទ្ធផលយ៉ាងណានោះ អាស្រ័យលើការសម្រេចរបស់ប្រជាពលរដ្ឋ និងគោលនយោបាយរបស់គណបក្សទាំងនោះ។
លោកថា៖ «យើងមិនអាចព្យាករទុកបានទេ ប៉ុន្តែអ្វីដែលយើងអាចនិយាយបាន គឺគ្រាន់តែថាតើប្រជាពលរដ្ឋគាត់មានទំនុកចិត្តលើគណបក្សភ្លើងទៀនកម្រិតណា។ ហើយយើងក៏រង់ចាំមើលសកម្មភាពរបស់គាត់ រួមទាំងគោលនយោបាយដែលគាត់ដាក់ចេញដើម្បីប្រកួតប្រជែងជាមួយគណបក្សនយោបាយដទៃហ្នឹង តើមានឥទ្ធិពលនិងចំណុចពិសេសអ្វីខ្លះធ្វើឱ្យប្រជាពលរដ្ឋទុកចិត្តងាយទៅគាំទ្រអ៊ីចឹង»។
លោក សុន ឆ័យ ជាអ្នកតំណាងរាស្ត្រមណ្ឌលរាជធានីភ្នំពេញ និងជាសមាជិកគណៈកម្មាធិការអចិន្ត្រៃយ៍គណបក្សសង្គ្រោះជាតិ។ លោក សុន ឆ័យ ជាមន្ត្រីជាន់ខ្ពស់គណបក្សសង្គ្រោះជាតិមួយរូបក្នុងចំណោម១១៨រូបផ្សេងទៀតដែលត្រូវបានតុលាការដកហូតសិទ្ធិមិនឱ្យធ្វើនយោបាយរយៈពេល៥ឆ្នាំ ក្រោយតុលាការកំពូលរំលាយគណបក្សប្រឆាំងមួយនេះកាលពីខែវិច្ឆិកា ឆ្នាំ២០១៧ តាមបណ្ដឹងរបស់ក្រសួងមហាផ្ទៃ។
នៅក្នុងព្រះរាជក្រឹត្យមួយកាលពីថ្ងៃទី៣ ខែកញ្ញា ឆ្នាំ២០២០ ព្រះមហាក្សត្រ នរោត្ដម សីហមុនី បានត្រាស់បង្គាប់ផ្ដល់នីតិសម្បទា ឬផ្ដល់សិទ្ធិធ្វើនយោបាយដល់លោក សុន ឆ័យ ឡើងវិញ តាមការស្នើសុំរបស់លោកនាយករដ្ឋមន្រ្តី ហ៊ុន សែន ក្រោយពីមន្ត្រីជាន់ខ្ពស់បក្សប្រឆាំងរូបនេះបានដាក់លិខិតស្នើសុំទៅក្រសួងមហាផ្ទៃក្នុងឆ្នាំដដែលនោះ៕
