សហរដ្ឋអាមេរិកបានប្រកាសថា នឹងរៀបចំកិច្ចប្រជុំកំពូលអាមេរិក-អាស៊ាន នៅថ្ងៃទី២៨-២៩ ខែមីនា ឆ្នាំ២០២២នេះ នៅវិមានប្រធានាធិបតីអាមេរិក (White House) នៃរដ្ឋធានីវ៉ាស៊ីនតោន សហរដ្ឋអាមេរិក។
មន្ត្រីទទួលបន្ទុកផ្នែកព័ត៌មានប្រចាំវិមានប្រធានាធិបតីអាមេរិក អ្នកស្រី Jen Psaki បានប្រកាសកាលពីថ្ងៃម្សិលមិញថា ប្រធានាធិបតីអាមេរិកនឹងស្វាគមន៍មេដឹកនាំអាស៊ាននៅរដ្ឋធានីវ៉ាស៊ីនតោននៃសហរដ្ឋអាមេរិក នៅថ្ងៃទី២៨ និង២៩ ខែមីនាខាងមុខនេះ។ ប៉ុន្តែលិខិតនេះបញ្ជាក់ថា អាមេរិកនឹងគោរពតាមការសម្រេចរបស់អាស៊ានដែលថា កិច្ចប្រជុំនេះនឹងមិនអញ្ជើញមេដឹកនាំរបបយោធាភូមា លោក មីន អ៊ុងឡាំង ចូលរួមប្រជុំកិច្ចប្រជុំកំពូលអាមេរិក-អាស៊ាន នេះឡើយ។
អ្នកស្រី Jen Psaki បានសរសេរថា៖ «វាគឺជាអាទិភាពកំពូលមួយសម្រាប់រដ្ឋបាល Biden-Harris ដើម្បីបម្រើជាដៃគូដ៏រឹងមាំ និងគួរឱ្យទុកចិត្ត និងពង្រឹងអាស៊ានដែលមានអំណាច និងឯកភាពក្នុងការដោះស្រាយបញ្ហាប្រឈមនៃពេលវេលារបស់យើង»។
សេចក្ដីប្រកាសដដែលបន្តថា កិច្ចប្រជុំកំពូលនេះ គឺជាការចូលរួមចំណែករបស់ប្រធានាធិបតីអាមេរិក លោក ចូ បៃឌិន ដែលបានចូលរួមម្ដងកាលពីខែតុលា ឆ្នាំមុន។ ជាមួយគ្នានេះ សហរដ្ឋអាមេរិកបានប្រកាសផ្ដល់ជំនួយ១០២លានដុល្លារអាមេរិកដល់ប្រទេសនៅក្នុងតំបន់អាស៊ីអាគ្នេយ៍មួយនេះ ដើម្បីស្ដារសេដ្ឋកិច្ចនិងសុខុមាលភាពប្រជាជនឡើងវិញក្រោយវិបត្តិជំងឺកូវីដ-១៩ ការប្រយុទ្ធប្រឆាំងនឹងវិបត្តិប្រែប្រួលអាកាសធាតុ ការលើកកម្ពស់សមភាពយេនឌ័រ និងភាពជាអំណាចនៃស្ត្រី ជាដើម។
រដ្ឋលេខាធិការ និងជាអ្នកនាំពាក្យក្រសួងការបរទេសកម្ពុជា លោក ជុំ សុន្ទរី បានប្រាប់ វីអូឌី តាមសារអេឡិចត្រូនិចតេឡេក្រាមនៅថ្ងៃនេះថា លោកមិនមានយោបល់លើការកំណត់កាលបរិច្ឆេទនៃកិច្ចប្រជុំកំពូលអាស៊ាន-អាមេរិកនេះទេ។ លោកថា ឥណ្ឌូនេស៊ី គឺជាប្រទេសសម្របសម្រួលលើទំនាក់ទំនងរវាងអាស៊ាននិងអាមេរិកនេះ។
កម្ពុជាក្នុងនាមជាប្រធានអាស៊ាននៅមិនទាន់មានការបញ្ជាក់យ៉ាងណានៅឡើយទេ ជុំវិញការកំណត់កាលបរិច្ឆេទនៃកិច្ចប្រជុំកំពូលអាមេរិក-អាស៊ាននៅចុងខែមីនានេះ។ ក៏ប៉ុន្តែលោកនាយករដ្ឋមន្ត្រី ហ៊ុន សែន ធ្លាប់បានលើកឡើងពីការទទួលសារអញ្ជើញពីប្រធានាធិបតីអាមេរិក លោក ចូ បៃឌិន ខណៈមន្ត្រីជាន់ខ្ពស់រដ្ឋាភិបាល លោក ផៃ ស៊ីផាន ធ្លាប់បានលើកឡើងថា លោក ហ៊ុន សែន នឹងក្លាយជាមេដឹកនាំកម្ពុជាទីមួយដែលត្រូវបានទទួលស្វាគមន៍ដោយកម្រាលព្រំពណ៌ក្រហមនៅវិមានប្រធានាធិបតីអាមេរិក៕
