លោកនាយករដ្ឋមន្ត្រី ហ៊ុន សែន មិនលើកទឹកចិត្តឱ្យមានការផ្ដាច់ខ្លួនខេត្តមួយចំនួនរបស់ចិន ដូចជា ហុងកុង តៃវ៉ាន់ ទីបេ និងជឺចាំង ចេញពីសាធារណរដ្ឋប្រជាមានិតចិនឡើយ ពោលគឺលោកនៅតែគោរពតាមគោលនយោបាយចិនតែមួយ។
ថ្លែងក្នុងឱកាសពិធីសម្ពោធដាក់ឱ្យប្រើប្រាស់ជាផ្លូវការកំណាត់ផ្លូវជាតិលេខ៣ ភ្នំពេញ-កំពត នាថ្ងៃទី២ ខែមីនា ឆ្នាំ២០២២នេះ លោក ហ៊ុន សែន មានប្រសាសន៍ពីគោលជំហររបស់កម្ពុជា ដោយគាំទ្រចិនតែមួយ ហើយមិនចង់ឱ្យដែនដីទាំងនោះផ្ដាច់ខ្លួនពីចិនឡើយ។
លោកមានប្រសាសន៍ថា៖ «ខ្ញុំមិនលើកទឹកចិត្តឱ្យមានការផ្ដាច់ខ្លួន ក៏មានន័យជួយគាំទ្រទៅចិនដែរ»។
លោកមានប្រសាសន៍បន្តថា៖ «យើងអាចគិតជាឧទាហរណ៍ នៅសុខៗស្រាប់តែមានប្រទេសណាមួយកាត់ខេត្តតាកែវចេញពីទឹកដីកម្ពុជារបស់យើង តើយើងយល់ព្រមដែរឬទេ? ប្រាកដណាស់ គឺមិនព្រមជាដាច់ខាត។ នេះក៏មិនមែនជាសារអ្វីនោះទេ ក៏ប៉ុន្តែជាជំហររបស់យើងវិញ យ៉ាងដូច្នេះ» ។
សាស្ដ្រាចារ្យផ្នែកវិទ្យាសាស្ត្រនយោបាយ លោក ឯម សុវណ្ណរ៉ា លើកឡើងថា តៃវ៉ាន់អាចនឹងផ្ដាច់ខ្លួនចេញពីចិនបាននាពេលអនាគត ដោយសារតែមានការជួយគាំទ្រពីខាងអឺរ៉ុប ក៏ដូចជាអាមេរិក ដែលមានការគាំទ្រយ៉ាងខ្លាំងដែរ។ ដោយឡែក ចំពោះរដ្ឋផ្សេងទៀត ដូចជាទីបេ ជឺចាំង និងហុងកុង គឺពិតជាពិបាកណាស់ក្នុងការផ្ដាច់ខ្លួនចេញជារដ្ឋឯករាជ្យ ព្រោះតែមានការគ្រប់គ្រងយ៉ាងរឹងមាំពីកុម្មុយនីស្តចិន។
លោកសាស្ដ្រាចារ្យ ឯម សុវណ្ណរ៉ា បន្តទៀតថា អាស៊ានជាតំបន់ដែលទទួលស្គាល់គោលនយោបាយចិនតែមួយ (One China Policy) ខុសពីលោកខាងលិចដែលទទួលស្គាល់ឯករាជ្យភាពរបស់តៃវ៉ាន់ ហើយព្រមទាំងមានទំនាក់ទំនងការទូតនិងពាណិជ្ជកម្មជាមួយតៃវ៉ាន់ថែមទៀតផង។
តៃវ៉ាន់ គឺជាដែនកោះមួយដែលស្ថិតនៅកៀកនឹងចិន ដោយពុះចែកដោយច្រកសមុទ្រចម្ងាយជាង១០០គីឡូម៉ែត្រប៉ុណ្ណោះពីគ្នា។ តៃវ៉ាន់ ក៏ជាសម្ព័ន្ធមិត្តចាស់របស់សហរដ្ឋអាមេរិក។
ក្រោយបក្សកុម្មុយនីស្តចិនឡើងកាន់អំណាចនៅឆ្នាំ១៩៤៩ សហរដ្ឋអាមេរិកនៅតែបន្តទទួលស្គាល់សាធារណរដ្ឋចិន ឬតៃវ៉ាន់ ថាជារដ្ឋាភិបាលស្របច្បាប់របស់ចិន រហូតដល់ឆ្នាំ១៩៧៩ ទើបអាមេរិកផ្លាស់ប្ដូរមកទទួលស្គាល់រដ្ឋាភិបាលចិនដីគោកវិញ។
ដោយឡែកដែនដី ជឺចាំង ហុងកុង និងទីបេ ជាតំបន់ដែលនៅមានភាពប្រទាញប្រទង់រហូតមកទល់ពេលបច្ចុប្បន្ន ដោយរដ្ឋទាំងនោះនៅចិញ្ចឹមចិត្តចង់ផ្ដាច់ខ្លួនទៅជារដ្ឋឯករាជ្យចេញពីការគ្រប់គ្រងរបស់ចិនកុម្មុយនីស្ត៕