មន្ត្រីតុលាការអះអាងថា ចៅក្រមស៊ើបសួរបានសម្រេចឃុំខ្លួនជនត្រូវចោទជាជនជាតិចិនចំនួន ៣នាក់ក្នុងពន្ធនាគារខេត្តព្រះសីហនុកាលពីថ្ងៃទី២ ខែមីនា ខណៈម្នាក់ទៀតត្រូវបានពន្យារពេលឃុំខ្លួនដោយសារបញ្ហាសុខភាព ពាក់ព័ន្ធព័ត៌មាន«ទាសករលក់ឈាម» ដែលអាជ្ញាធរថាជារឿងប្រតិដ្ឋ។
អ្នកនាំពាក្យអយ្យការអមសាលាដំបូងខេត្តព្រះសីហនុ លោក ហួត វិចិត្រ ដែលអះអាងថាជាអ្នកចាត់ការផ្ទាល់លើករណីនេះ ប្រាប់វីអូឌីនាយប់ថ្ងៃទី៣ ខែមីនា ថា លោកបានបញ្ជូនជនសង្ស័យទាំង ៣នាក់ទៅចៅក្រមស៊ើបសួរ ហើយចៅក្រមស៊ើបក៏បានសម្រេចឃុំខ្លួនពួកគេ៣នាក់ផងដែរ។
លោកថា៖ «ខ្ញុំបានបញ្ជូនជនសង្ស័យទាំង៣នាក់ទៅចៅក្រមស៊ើបសួរពាក់ព័ន្ធបទចោទមានផ្តល់សេចក្តីប្រកាសដោយភូតកុហក ញុះញង់អោយមានការរើសអើង តាមបញ្ញតិមាត្រា ៤៩៦ និង ៦៣៣ នៃក្រមព្រហ្មទណ្ឌ។ ចៅក្រមស៊ើបសួរបានសម្រេចឃុំខ្លួនជនត្រូវចោទទាំង ៣នាក់ក្នុងពន្ធនាគារខេត្តព្រះសីហនុហើយកាលពីម្សិលមិញ។ ជនត្រូវចោទទាំង៣នាក់ ជាជនជាតិចិន»។
អ្នកនាំពាក្យអយ្យការអមសាលាដំបូងខេត្តព្រះសីហនុរូបនេះបន្តថា ដោយឡែកបុរសឈ្មោះ LI YA YUAN LUN ដែលអះអាងថាជាជនរងគ្រោះ ក៏ត្រូវបានចោទប្រកាន់ និងស្នើសុំឃុំខ្លួនផងដែរ ប៉ុន្តែដោយស្ថានភាពសុខភាពរបស់គាត់ នៅពុំទាន់ប្រសើរ ទើបត្រូវពន្យារពេលឃុំខ្លួនសិន។
លោកថា៖ «គាត់ត្រូវបានចោទប្រកាន់ និងស្នើសុំឃុំខ្លួនគាត់ផងដែរ តែដោយកត្តាសុខភាពគាត់ពុំទាន់ប្រសើឡើងវិញ ទើបបន្តអោយគាត់នៅព្យាបាលឯមន្ទីរពេទ្យនៅភ្នំពេញ»។
ចំណែក អ្នកនាំពាក្យសាលាដំបូងខេត្តព្រះសីហនុ លោក លី ចាន់ដារ៉ា បានផ្តល់ឯកសារដែលបង្ហាញថាចៅក្រមបានចោទប្រកាន់អ្នកពាក់ព័ន្ធ ៣នាក់ និងបុរសជនជាតិចិនម្នាក់ទៀតដែលត្រូវបានសារព័ត៌មាន និងបណ្ដាញទំនាក់ទំនងសង្គមមួយចំនួនចុះផ្សព្វផ្សាយថា ត្រូវបានចាប់បង្ខាំងធ្វើជាទាសករលក់ឈាមនៅតំបន់ឆៃណាថោន ក្នុងខេត្តព្រះសីហនុ ពីបទស្រដៀងៗគ្នា។
ក្នុងនោះ លោក LI YA YUAN LUN អាយុ ៣១ ដែលអះអាងថាជាជនរងគ្រោះ ត្រូវបានចោទពីបទ «ជនបរទេសចូលមកកម្ពុជាដោយគ្មានការអនុញ្ញាត» កាលពីអំឡុង ខែមិថុនា ឆ្នាំ២០២១ ដល់អំឡុងខែកុម្ភៈ ឆ្នាំ២០២២ ប្រព្រឹត្តនៅខេត្តព្រះសីហនុ និងរាជធានីភ្នំពេញ។ លើសពីនេះ លោកក៏ត្រូវបានចោទពី បទញុះញង់ឱ្យមានការរើសអើង និងផ្តល់សេចក្តីប្រកាសដោយភូតកុហក ប្រព្រឹត្តនៅរាជធានីភ្នំពេញ កាលពីអំឡុងខែកុម្ភៈ ឆ្នាំ២០២២ តាមមាត្រា ២៩ នៃច្បាប់ស្តីពីអន្តោប្រវេសន៍ និងមាត្រា ៤៩៦ មាត្រា ៦៣៣ នៃក្រមព្រហ្មទណ្ឌ។
ឯកសារដដែលបន្តថា ស្ត្រីឈ្មោះ TAN XIAO MEI អាយុ៤១ឆ្នាំ ត្រូវចោទពីបទផ្តើមគំនិតក្នុងអំពើញុះញង់ឱ្យមានការរើសអើង និងផ្តល់សេចក្តីប្រកាសដោយភូតកុហក ប្រព្រឹត្តនៅខេត្តព្រះសីហនុ កាលពីអំឡុងខែកុម្ភៈ ឆ្នាំ២០២២ តាមមាត្រា ២៨ មាត្រា ៤៩៦ និងមាត្រា ៦៣៣ នៃក្រមព្រហ្មទណ្ឌ។
ចំណែក បុរសឈ្មោះ CHEN BAO RONG អាយុ៤៩ឆ្នាំ និងបុរសឈ្មោះ CHEN XIAO HUA អាយុ៤១ឆ្នាំត្រូវចោទពីបទញុះញង់ឱ្យមានការរើសអើង ជ្រៀតជ្រែកដោយខុសច្បាប់ទៅក្នុងការបំពេញមុខងារសាធារណៈ ប្រើប្រាស់ដោយខុសច្បាប់នូវឯកសារបញ្ជាក់វិជ្ជាជីវៈ និងផ្តល់សេចក្តីប្រកាសដោយភូតកុហក ប្រព្រឹត្តនៅរាជធានីភ្នំពេញ កាលពីអំឡុងខែកុម្ភៈ ឆ្នាំ២០២២ តាមមាត្រា ៤៩៦, ៦០៩, ៦១៣ និងមាត្រា ៦៣៣ នៃក្រមព្រហ្មទណ្ឌ។
អគ្គស្នងការដ្ឋាននគរបាលជាតិ បានលើកឡើងក្នុងសេចក្ដីប្រកាសព័ត៌មានចុះថ្ងៃទី២៨ ខែកុម្ភៈ ឆ្នាំ២០២២ ថាក្រោយពីឃើញសារព័ត៌មាន និងបណ្ដាញទំនាក់ទំនងសង្គមមួយចំនួនចុះផ្សព្វផ្សាយព័ត៌មានស្ដីការចាប់បង្ខាំងជនជាតិចិនធ្វើជាទាសករលក់ឈាមនៅតំបន់ឆៃណាថោន ក្នុងខេត្តព្រះសីហនុ រួចមក អង្គភាពជំនាញបានចុះស្រាវជ្រាវរកឃើញថាព័ត៌មាននោះជារឿងប្រតិដ្ឋ។
នគរបាលជាតិបានបញ្ជាក់ថា ព័ត៌មានទាំងនោះប្រតិដ្ឋឡើងដោយឈ្មោះ LI YA YUAN LUN ស្នាក់នៅមន្ទីរពេទ្យប៊ីធនកម្ពុជា-ចិន រាជធានីភ្នំពេញ និងអ្នកពាក់ព័ន្ធចំនួន៣នាក់ទៀត។
យ៉ាងណា លោក LI YA YUAN LUN ដែលអះអាងថា ជាជនរងគ្រោះធ្លាប់បានលើកឡើងអំពីប្រតិបត្តិការឆបោកនៅកម្ពុជា ដែលត្រូវបានគេបូមឈាមរបស់គាត់ជាច្រើនដងតាំងពីខែសីហា ឆ្នាំ២០២១ ក្នុងខេត្តព្រះសីហនុ ធ្វើឱ្យស្ថានភាពសុខភាពគាត់ទន់ខ្សោយ និងមានហានិភ័យខ្ពស់។
លោកលើកឡើងថា គេចាប់ផ្ដើមបូមឈាមរបស់គាត់ ដោយសារតែលោកបដិសេធមិនព្រមធ្វើការនូវអ្វីដែលជាការចង់បានរបស់ពួកគេ។
កាលពីថ្ងៃព្រហស្បតិ៍សប្តាហ៍មុន សភាពាណិជ្ជកម្មចិននៅកម្ពុជា ក៏បានថ្កោលទោសចំពោះករណីបាញ់ប្រហារ ចាប់ជំរិត និងជំរិតទារប្រាក់លើជនជាតិចិននៅកម្ពុជា ពាក់ព័ន្ធនឹងល្បែងស៊ីសងតាមប្រព័ន្ធអនឡាញ និងសកម្មភាពបោកប្រាស់នានាផងដែរ។
លិខិតមួយរបស់សភាពាណិជ្ជកម្មបានឱ្យដឹងថា៖ «វិធីសាស្ត្រនៃឧក្រិដ្ឋកម្មមួយចំនួន គឺហាក់មានសកម្មភាពសាហាវឃោរឃៅ។ សកម្មភាពទាំងនោះបានបង្កឱ្យមានជាការខឹងសម្បារយ៉ាងខ្លាំងពីសំណាក់ជនរួមជាតិចិននៅកម្ពុជា និងនៅក្នុងប្រទេសចិន»។
សភាពាណិជ្ជកម្មចិននៅកម្ពុជា ក៏បានជំរុញដល់មន្ត្រីពាក់ព័ន្ធទាំងឡាយឱ្យបង្រ្កាបក្រុមដែលប្រព្រឹត្តសកម្មភាពខុសច្បាប់ទាំងនេះ៕
