ពន្ធដារ​ត្រៀម​ដាក់​ប្រព័ន្ធ​លេខកូដ​ក្រុមហ៊ុន​សង់បុរី​ឬ​ផ្ទះល្វែង បើ​មិន​បង់ពន្ធ​មិន​អាច​កាត់ឈ្មោះ​ផ្ទេរកម្មសិទ្ធិ​បាន

លោក គង់ វិបុល ថ្លែងក្នុងសិក្ខាសាលាផ្សព្វផ្សាយស្ដីពី “កាតព្វកិច្ចពន្ធលើប្រាក់ចំណូលប្រចាំឆ្នាំ ការបំពេញទម្រង់លិខិតប្រកាសពន្ធប្រចាំឆ្នាំ និងបទល្មើសពន្ធដារនិងបទល្មើសសម្អាតប្រាក់” ថ្ងៃទី០៣ ខែមីនា ឆ្នាំ២០២២។ (ហ្វេសប៊ុក៖ អគ្គនាយកដ្ឋានពន្ធដារ General Department of Taxation)

អគ្គនាយកដ្ឋានពន្ធដារ ​ត្រៀមដាក់ឱ្យប្រើប្រាស់នូវប្រព័ន្ធគ្រប់គ្រងលេខកូដសម្គាល់អចលនទ្រព្យ ចំពោះក្រុមហ៊ុនសង់បុរីឬផ្ទះល្វែងត្រូវបង់ពន្ធជូនរដ្ឋ បើពុំដូច្នោះ មិនអាចកាត់ឈ្មោះផ្ទេរកម្មសិទ្ធិបន្តបានឡើយ។

ក្នុងសិក្ខាសាលាស្ដីពីកាតព្វកិច្ចពន្ធលើប្រាក់ចំណូលប្រចាំឆ្នាំ ការបំពេញទម្រង់លិខិតប្រកាសពន្ធប្រចាំឆ្នាំ និងបទល្មើសពន្ធដារ និងបទល្មើសសម្អាតប្រាក់ អគ្គនាយកនៃអគ្គនាយកដ្ឋានពន្ធដារ លោក គង់ វិបុល បានថ្លែងថា ក្រុមហ៊ុនសង់បុរីឬផ្ទះល្វែងមួយចំនួនបានមកប្រកាសពន្ធថាធ្វើផ្ទះឬវីឡា ត្រឹមតែ១០០ទេ ប៉ុន្ដែនៅពេលទៅត្រួតពិនិត្យជាក់ស្ដែង គឺធ្វើរហូតដល់១៥០ទៅ២០០ផ្ទះ ដែលធ្វើឱ្យការបង់ពន្ធមិនស្មើភាពគ្នា។

ករណីនេះ លោក គង់ វិបុល បញ្ជាក់ថា នៅរយៈពេលដ៏ខ្លីខាងមុខនេះ អគ្គនាយកដ្ឋានពន្ធដារនឹងដាក់ឱ្យប្រើប្រាស់ប្រព័ន្ធគ្រប់គ្រងលេខកូដសម្គាល់អចលនទ្រព្យ ចំពោះក្រុមហ៊ុនសាងសង់បុរីឬផ្ទះល្វែង បើមិនបង់ពន្ធ មិនអាចកាត់ឈ្មោះផ្ទេរកម្មសិទ្ធិបន្តបានឡើយ។

លោក គង់ វិបុល មានប្រសាសន៍ថា៖ «យើងខ្ញុំនឹងរៀបចំនូវប្រព័ន្ធគ្រប់គ្រងនៃអចលនទ្រព្យ នៅពេលដែលសហគ្រាសដែលសាងសង់ជាបុរី សហគ្រាសដែលសាងសង់ជាផ្ទះ បើថាអត់បានមកបង់ពន្ធ ហើយអត់មានលេខ Tax QR កូដនោះទេ មានន័យថា មកកាត់ឈ្មោះលក់អត់ចេញទេ»។

លោកមានប្រសាសន៍បន្ថែមថា៖​ «ដើម្បីមានភាពស្មើគ្នាទាំងអស់គ្នា យើងខ្ញុំនឹងរៀបចំកម្មវិធីនេះ ដោយមាន QR កូដ រាល់ផ្ទះ-វីឡាមួយៗដែលអភិវឌ្ឍន៍ទៅចេញជាប្រព័ន្ធ ហើយបើថាអ្នកណាមកទិញផ្ទះបុរីហ្នឹង មានលេខហ្នឹងហើយពីម្ចាស់បុរី។ ហើយបើអ្នកណាទិញហើយ អ្នកណាទិញដោយគ្មាន QR កូដនេះ មានន័យថា ម្ចាស់បុរីអត់បង់ពន្ធនិងអត់បានចុះបញ្ជី»។

ប្រភពដដែលបញ្ជាក់ថា ប្រព័ន្ធគ្រប់គ្រងលេខកូដសម្គាល់អចលនទ្រព្យ ចំពោះក្រុមហ៊ុនសង់បុរីឬផ្ទះល្វែងនេះ អាចដំណើរការនៅចុងខែមេសា ឬក៏ដើមខែឧសភា ឆ្នាំ២០២២ ខាងមុខនេះ៕

ចែករំលែកព័ត៌មាន
រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ

ចុះឈ្មោះទទួលព្រឹត្តិបត្រព័ត៌មានវីអូឌី
តាមដានព័ត៌មាន វីអូឌី

VODEnglish.news

VODEnglish.news

Everybody Well-Informed, Everybody Empowered